Wa Sarabyin A Mungga: Karai Kasang A Tsawra Myit Hpe Gara Hku NNa Hkalum Na Gaw Ma Kaji Ni Chyu Sha Chye Nga Ai

Laban shani na mungga hta Wa sarabyin Francis kawn Karai Kasang gaw kaja grau ai amu bungli ni hpe shangut shakre ya ai hte mung kan hpe sim sa ai hku galai shai ya ai hpe yu let anhte hkum hpe anhte ni myit dik myit hkut la chye ra ai hpe n-gun jaw tsun shadum lai wa ai.

St. Peter Square shara hta Laban Missa sa du shang lawm nga ai hpung masha ni hpe Wa sarabyin Francis kawn (Mt. 11:25) dai ni kabu kara shiga hta na la lu sai the maren Madu Yesu kawn Kawa Karai kaw akyu hpyi ai hte Karai kasang a amu ma hkra hpe gara hku hkap hkalum  la na hte seng nna “ma kaji ni hta” tsun shapraw dan ai hpe chyeju dum chye ra ai lam hpe myit sawn sumru yu na matu daini anhte ni marai hkum shagu hpe saw shaga nga ai.

Anhte a makau gupyin hta ma kaji ni nga ai lam dan dawng nga ai zawn Karai kasang mung anhte a makau gupyin hta bungli galaw taw ai lam mung dan dawng nga ai hpe anhte ni myit dum nga ai kun? shing nrai dai hku sha aten nga shalai taw nga ai kun? ngu ai hpe kamsham ai kashu kasha ni tinang hkum tinang san dik lik yu nga ga ngu nna tsun shadum lai wa ai.

Wa sarabyin kawn Madu Yesu akyu garai n hpyi shi yang Karai kasang gaw shi a amu magam ni hpe bai myit dum shangun ya ai. (Mt, 11:5) hta anhte ni hti yu yang mu lu na re “Myi nmu ai hpe myi mu shangun ai, manggang byin ai ni hpe jasan jaseng ya ai, jam jau ai ni hpe mung kaja ai kabu gara shiga na lu na lam lajang ya ai” ndai lam ni yawng gaw Karai Kasang hku nna ndai mungkan ga hta galaw nga ai magam bungli namik kumla ni mung rai nga ai.

Ja chyum mungga hta anhte hpe asan sha shadum ya nga ai Karai Kasang gaw anhte mungkan masha ni hpe hkye hkrang la ai chyeju jaw ya ai bai anhte hpe shamai shatsai ya nga ai hte shi hkum shi shadan shadawng nga ai lam hpe mung Wa sarabyin tsun lai wa ai.

Madu Yesu gaw  Kawa Karai kasang hpe chyeju dum nga ai hpa majaw ta shi a hkrik hkam ai lam gaw shi a tsawra myit kaba hta shang lawm nga ai hte tsawra myit nlawm ai magam bungli hpe galoi mung n galaw ai a majaw rai nga ai.

Tinang hkum tinang grai myit kaba ai, rai dum ai hte tinang byin mayu ai hku myit sawn la chye ai ni gaw Karai Kasang a Tsawra myit hpe chye lu na lam nmai byin nga ai. Tinang a tinggyeng hte tinang hkum tinang grai arawng la chye ai masha ni hte ngai gaw gade a garum shing tau lam mung nra ai ngu nna hkap la ai masha ni gaw Karai Kasang hpe Wa ngu nna shaga na n- grin ai ni rai nga ai hpe Wa sarabyin kawn tsun lai wa ai.

Madu Yesu gaw shi a ten hta lusu ai mare kaba masum rai nga ai “Chorazin, Bethsaida, Capernaum ni Karai Kasang a hpung shingkan namik kumla hpe n chye hkap la ai mare kaba masum nga nna shamying ai wa ai .

Kaji ai ni gaw Karai kasang amu magam hpe gara hku hkap tau la ra na hpe chye nga ai , Madu Yesu gaw Kawa Karai hpe chyeju dum shakawn nga ai, bai dinghpring ai hte tinang hkum hpe chye tsawra ai ni hta Karai Kasang gaw mau hpa re ai shi a magam bungli ni hpe dan dawng shangun nga ai.

Wa sarabyin Francis gaw Karai Kasang a man hta na kaja ai kyang lailen ngu ai gaw “tinang a hkum hpe tsawra chye ai hte kaja ai magam bungli ni hpe galaw shakut nga ai lam rai nga ai.

Hpang jahtum hku na Wa sarabyin Francis gaw daini na mungkan hta anhte hpe ahkyak ai shiga ni hte ka up taw nga tim “ma kaji ni zawn” mau hpa atsam hte mungkan hpe anhte ni gara hku garum shing tau galai shai shangun lu na hte shani shagu Karai Kasang anhte a matu galaw ya nga ai, jaw ya nga ai magam bungli, chyeju ni hpe anhte chyeju dum chye ra ai lam ni hpe galaw sa na matu nang ngai kam sham ai kashu kasha ni yawng hpe saw shaga nga ai.