Wa Sarabyin a Mungga, Aug 2, 2018

2013, Sept 14 ya shani WaSarbyin Francis hkawn tsun lai wa ai mungga

Akyu hpyi ai, hkrap myi prwi hkrat ai hku nna sha Udang ai mung sung lam hpe Chye na lu mai nga ai (Sept 14, 2013)

Udang a mung sung lam gaw shing gyim masha ni a matu hkyik hkam dik ai mung sung lam langai rai nga ai the ndai mung sung lam hpe akyu hpyi ai hku nna, hkrap myi prwi ni hku nna sha sit shang lu na rai nga ga ai. Ndai udang a mung sung lam hta, makam masham a kaji kawa ni tsun sharin shaga ya lai wa ai lam rai nga ai kaja ai hte nkaja ai hpun lahkawng a lapran garan ging hka la chye ai machye machyang hte seng ai shing gyim masha a labau hte karai kasang a labau hpe mu mada lu nga ga ai.

Hpun ngu ai shing gyim masha hku nna nhkru nkaja ai lam ni law law galaw tawt lai wa ai lam nga lai wa saga ai zawn, hpun a marang e anhte shing gyim masha ni hpe hkye hkrang la ai lam de woi la sai, shing gyim masha ni shut hpyit tawt lai wa sai nhkru nkaja ai lam ni hpe raw dat hkyam sa jaw ya ai mung ndai hpun rai nga ai. Ndai gaw tsawra ai myit a majaw asak jaw ya ai hkye la Madu hpe mu tam la lu na matu shing gyim masha ni hkawm sa ai labau, shing gyim masha ni a labau nan rai nga ai. “Mungkan ga hpe tara dara u ga nga nna, Karai Kasang gaw dai Kasha hpe mungkan ga de shangun dat wu ai n rai; mungkan ga gaw shi a marang e hkye hkrang la ai hkrum lu na she, shangun dat wu ai.” Udang ngu ai hpun gaw anhte yawng hpe hkye la sai. Tinang hkum hpe tinang jaw dum ai, hkum tsup dum ai, anhte a gum rawng gum tawng ai, myit tsaw myit dap ai, mungkan ga hpe tinang mu mada hku jaw dum nna dai tinang jaw dum masa the hkawm sa nga mayu ai, mungkan ga hpe je yang mayu ai shing gyim masha ni a shawng nnan na ‘hpun’ ngu ai a shut hpyit ai lam ni kaw nna ndai udang ngu ai hpun gaw shing gyim masha hpe hkye la sai rai nga ai. Ndai gaw shing gyim masha a mabyin labau nan rai nga ai.

Karai kasang a labau hpe mung ndai udang hta mu lu nga ai, hpa majaw nga yang karai kasang hta mung labau mabyin nga nga ai ngu nna tsun lu mai nga ai. Anhte shing gyim masha a mabyin labau kata de karai kasang shang bang wa mayu nga ai hte shing gyim masha hte rau karai kasang yu hkawm sa mayu nga ai. Shing gyim masha hpe hkye sharaw la mayu ai a majaw, shangun ma a mabyin hpe yin la ai, shing gyim masha atai sa la ai hku nna karai kasang gaw shi a hkum hpe dik hkra shagrit kau nga ai. shing gyim masha hpe sharawt la lu hkra udang hta si ai du hkra madat mara ai mabyih du hkra shagrit kau ai hpe karai kasang hkam la nga ai.

Ndai hkrun lam mabyin hpe tsawra ai a majaw karai kasang yu hkawm sa ai rai nga ai. Tsawra ai a majaw ndai lam hpe karai kasang shabyin ai re, ngu ai hta lai nna kaga tsun sang lang dan lam hpa mung nnga nga mali ai. Dai ni ndai udang hpe sharawt mada yu nna shing gyim masha a labau hte karai kasang a labau hpe myit yu nga ga. Madu yesu gun dagraw la lai wa sai hka dik ai lagat ntsin nam chyim hpe ndai udang hpe sharawt mada yu nna chyim yu nga ga. Raitim mung ndai mung sung lam gaw hkyik hkam kaba dik ai mung sung lam rai nga ai majaw anhte tinang a atsam the sha chye na lu na matu nbyin mai na ga ai.

Nan bat langai, Ndai udang nhpang hta lahput hput di nna akyu hpyi ai lam a marang e mung, hkrap mi prwi hte ndai udang hpe sharawt mada yu ai a marang e mung ndai udang a mung sung lam hpe anhte kachyi mi chye lu na ga ai. Ndai udang a mung sung lam de anhte hpe sit shani sa wa shangun lu ai lam gaw myi prwi si ni rai nga ai. Anhte a masin salum kata hkrap madai ai lam ni nnga ai sha ndai udang a mung sung lam hpe anhte galoi mung chye na lu na nrai nga ga ai. Tinang a shut hpyit mara a matu yawn hkrap madai ai, tinang a hpu nau ni hkrum sha nga ai nji nmu lam ni a matu hkrap yawn madai ai, madu yesu a nji nmu lam hpe mada yu ai, ndai lam ni hku nna sha udang a mung sung lam hpe anhte chye na lu na rai ga ai. Anhte a yawn hkrap madai ai hta anhte hkrai galoi mung nrai nga na ga ai.

Pru lam nmu mai ai lam zawn re ai raitim, pru lam nnga ai lam nre ai ndai udang a mung sung lam de anhte sit shang ai lam hta, anhte a kanu hte dai kanu a lata anhte galoi mung ra na rai nga ai. Ndai udang mung sung lam gaw kade wa nan hkyik hkam ai mung sung rai nga ai ngu ai lam hpe anhte chye na wa lu hkra Nu Maria anhte hpe garum ya rit ga, ndai mung sung lam gaw grai nan dwi ai mung sung lam rai nga ai zawn hkyik ai nji nmu lam lawm nga ai mung sung lam rai nga ai majaw madu a hka dik ai nni nkri lam ni hpe mung anhte grau chye na wa hkra Nu Maria garum ya rit ga, shi kaw garum hpyi nga ga. Anhte hkum nan hkawm sa ra ang ai ndai udang hkrun lam hta Nu Maria anhte hte rau manang tai hkawm sa lawm ya nga u ga, ndai hkrum lam gaw anhte hkum shagu Nu hte rau dai udang nhpang hta lahput hput di let hkrap ngu hkrap ngoi ai hte hkawm sa nga ra na hkrum lam rai nga ai.