Wa Sarabyin A Mungga

Wa Sarabyin “Madu Lamu Kasa Akyu Hpyin” ten, Karai Kasang a myit galu kaba hkam sharang ai lam gaw anhte a masin salum na myit mada shara hpe hpaw ya ai re tsun hpaw da ai.

Karai Kasang a myit galu kaba hkam sharang ai myit masin hpe katsi la lu na matu  Nu Maria garum ya u ga. Karai Kasang gaw shi a kashu kasha ni mat mat na n ra sharawng ai. Nu Maria gaw Kawa Karai Kasang a tsaw ra myit hte anhte hpe tsaw ra nga ai.

Hkaulam mam hte tsing tu ga shadawn hpe lakap nna Karai Kasang a myit galu kaba hkam sharang ai lam gaw anhte a masin salum na myit mada shara hpe hpaw ya ai re ngu Wa Sarabyin tsun ai.

Laban shani hti ang ai Kabu Gara Shiga hta Madu Yesu gaw tinang a yi hkauna hta nli kaja ai hkaulam mam hpe hkai shaprut da ai ga shadawn rai nga ai. Shana ten hta, hpyen wa sa nna n kaja ai tsing si hpe sa gat bang ya ai.

Hkaulam mam hte tsing arau tu nga ai hpe mu ai n chyang ma ni tsing hpe tsan kau mayu ma ai. Madu chyawm gaw dai tsing baw jang mam hpun mung baw nang wa na tsang ai majaw shu la dan la aten du hkra lat na matu tsun shadum da ai.

Tsing sat ai ni tsing si tsi gat ai majaw anhte hte anhte lamu ga hpe hkra machyi kaba bying shangun nga ai.

Ga shadawn hta na hkauna madu gaw Karai Kasang rai nga ai. Dai hkauna madu gaw galoi mung nli tum kaja htum hpe sha gat hkai ai. Shi a yaw shada pandung gaw kaja ai apu asi ni awng la na hpe sha myit mada ai.

Hpyen gaw Tsadan rai nga ai. Tsadan gaw n ju n dawng ai wa rai nna, Karai Kasang a magam hpe manawn masham myit kaba hte jahten sharun ai wa rai nga nga ai. Karai Kasang hpe aten shagu shingjawng ai wa rai nga ai.

Tsa dan a yaw shada lam gaw Karai Kasang a hkye hkrang la magam hpe dingbai dingna jaw ai. N kaja ai magam bungli galaw ai ni hku nna Karai kasang a ja mungdan hpe jahten sharun na matu myit shuk myit um ang lam tai hkra; mu la shut hkam la shut ai lam ni jaw bang ya nna jahten sharun kau na matu sha rai nga ai.

Hkaulam mam hte tsing tu ni gaw jum tet n lu ai kaja ai hte n kaja ai lam hpe hkrang shapraw ai kumla n rai nga ai. Karai Kasang a hpang hkan ai ni hte Tsadan a hpang hkan ai shingyim masha ni hpe hkrang madun ai she rai nga ai nga nna Wa Sarabyin matut tsun ai.

Manawn masham ai majaw, kahtit kahtawk, gasat gala bying ai lam ni nga wa nna shada garan ginhka mat ai kun dinghku, shing nrai, wuhpung wuhpawng ni hpe anhte mu hkrum yu ga ai. Grai sawng ai shatan n hkan ga tsun ai lam anhte hta bying pru chye nga ai.

Dai zawn Shatan n hkan tsun na matu gumlau hkrum ai hta hkrat sum ai majaw hpu nau ni hpe hkra machyi jahten kau ai lam ni law law bying nga ai.

N’hkru ai lam ni gaw Karai Kasang a masin hte hti htang shai ai majaw Karai Kasang a shangun ma anhte ni dai n hkru n kaja ai lam ni hpe kau da ra ga ai. Karai Kasang a shangun ma ni gaw myit galu kaba ra ai; hkam sharang ra ai; n hkru n kaja ai ni hpe jahpoi asawng na malai, je yang na malai, myit kalu kaba ai hte hkam sharang ya ra ai; shanhte hpe hkye la ra ai.

Pranwan ladaw (16) hta hti ang ai kabu gara shiga gaw hkrung nga ai labau mung re; ta tut hkrang shala madun ya nga ai mung re ngu Wa Sarabyin tsun da ai. Nli kaja gat hkauna madu Karai Kasang myit ai hte n-chyang shingyim masha ni a myit ai n bung ai lam a shai hkat ai lam dan dawng nga ai.

N-chyang ma gaw hkaulan mam hpun ni lapran tu ai tsing tu ni hpe baw kau na matu madung da myit ai. Hkauna madu Karai Kasang gaw tsing tu ni lapran na hkaulan mam hpun ni hpe makawp maga na matu madung da myit ai.

“Hpu nau ni a n dep n hkap ai masat jarit ni hte gawng kya ai lam ni hpe krau sha na matu sha sin maja nga ai” ni hpe mung Wa Sarabyin Francis kawn shadum sadi jaw da ai.

Karai Kasang a shingran hta shawng lawm nga ai ni gaw n mu mada ai mai kaja lam ni hpe mu chye lu ma ai. Dai gaw, Nawku Hpung labau hta yet yet dan hkrung wa na rai nna, Nawku hpung hpe rawt jat galu kaba wa shangun ai lam tai nga ai.

Mungga jahtum hta Wa Sarabyin gaw “Mai kaja ai magam galaw ai ni hpe Karai Kasang shagrau na rai nna, n hkru ai ni hpe gaw mara dam jaw na ra ai” ngu tsun shadum da ai hpe Vatican kawn ndau da ai.

19 July 2020, 13:00

https://www.vaticannews.va/en/pope/news/2020-07/pope-at-angelus-god-s-patience-opens-our-hearts-to-hope.html

 

Add new comment

2 + 0 =