Wa Sarabyin a mungga

Lk 11:29-32 “Shawa masha ni gumbawm wa ma ai shaloi, shi tsun hpang wu ai gaw, Ndai prat na ni gaw n hkru ai amyu rai nga ai: shanhte lamik kumla tam nga ma ai; rai ti mung, Yona a lamik kumla hta kaga, hpa lamik kumla mung shanhte hpa n dan na nme ai. Yona gaw Ninewe masha ni a man e lamik kumla tai wa ai zawn, dai Masha Kasha mung, ndai amyu a man e, lamik kumla tai na ra ai. Dai tara dara ai nhtoi hta, dingda mung na hkawhkam jan gaw, ndai prat na amyu hte rau rawt wa nna, shanhte hpe daw dan na ra ai: kaning rai nme law, shi gaw Shawlumon a hpaji madat na, ga jahtum de na sa du ai: yu mu, ndai yang e Shawlumon hta grau kaba ai wa nga nga ai. Tara dara ai nhtoi hta Ninewe masha ni gaw, ndai prat na amyu hte rau rawt wa nna, shanhte hpe daw dan na ma ra ai; kaning rai nme law, Yona hkaw tsun ai ga majaw, shanhte myit malai lu ma ai: yu mu, ndai yang e Yona hta grau kaba ai wa nga nga ai.”

“Ndai prat na ni gaw n hkru ai amyu rai nga ai” nga ai Madu Yesu a ga gaw grai nan ja ai ga rai nga ai. Tsawra myit kaba hte shi a hpang hkan nang nga ai masha ni hpe tsun ai ga chyawm gaw nrai nga ai. Shi Madu hpe jahten kau lu na matu mahkam hkam, hkan hkoi nga ai Yuda salang ni, tara sara ni hpe sha-ang nna tsun ai lam rai nga ai. Ndai Yuda sang ni, tara sara ni hku nna lamik kum la galaw dan na matu Madu yesu hpe tsun nga ma ai rai nga ai. Dai re majaw, Yona a lamik kumla hta kaga hpa lamik kumla mung shanhte hpe ndan na re, ngu nna Madu Yesu htan ai rai nga ai. Yona a nkaja ai lai kyang gaw, Nineveh mare de sa su ngu nna madu matsun dat yang kaga mungdan de hprawng mat wa ai, hkan sa ra ai tara ni yawng nga ai, dai hpe hkan sa nga mu ga, shyit hpyit tawt lai ai ni shanhte galaw sai mara the maren je yang ai hkrum mu ga, ngu ai myit jasat rai nga ai. ndai zawn re ai myit jasat rawng ai masha ni hpe “hypocrites” sawt ai masha ni, ngu nna madu yesu tsun shamying ai rai nga ai.

Masha ni myit malai lu wa mu ga shakut ya mayu ai myit nrawng ai myit jasat rai nga ai. Ndai zawn re ai myit jasat rawng ai masha ni hpe Yona a lamik kumla hta lai nna kaga lamik kumla ndan na re, nga nna madu yesu tsun ai. Yona gaw nga kaba a kan hta masum ya masum na rawng lai wa ai, nga nna Mahte a kabu gara ai shiga hta mu lu nga ai. Shi madu a si hkam ai the lup hta masum ya rawng nna bai hkrung rawt wa ai lam hpe sha-ang nna tsun ai lam rai nga ai.

Kabu gara ai shiga hta madu yesu tsun ai ga shadawn langai mi nga ai, masha lahkawng nawku htingnu hta akyu sa hpyi ai, langai gaw tinang a hkum hpe chyoi pra dum ai Hparishe, kaga wa gaw shut hpyit mara lu ai kang hta sha ai masha rai nga ai, Pharishe wa gaw, ngai gaw ndai kang hta sha ai wa zawn mara lu ai wa nrai, nga nna myit let, shi a hkum hpe chyoi pra dum nna teng sha hkye la ai hkrum na wa re, ngu nna myit nga ai, kang hta sha ai, shut hpyit ai wa chyawm gaw karai kasang a matsan dum ai the raw dat hkyam sa jaw ya na matu hpyi nga ai. Madu yesu a si hkam ai the bai hkrung rawt ai a marang e jaw ya na ngu nna tsun sadi jaw da ai lam gaw shi a tsawra matsan dum ai lam the raw dat hkyam sa jaw ya ai lam rai nga ai.

Tinang galaw ai mai kaja ai lam ni a majaw hkye hkrang la ai hkrum na re, ngu nna myit nga ai Hkristian ni kade mi she nga nga ma ai kun? Mai kaja ai magam bungli galaw ai ngu ai lam gaw kaja ahkyak ai lam rai nga ai zawn, ra ai lam mung rai nga ai. Tsawra matsan dum ai mai kaja ai magam bungli ni ngu ai gaw Karai kasang a matsan dum lama ai tsawra myit hpe bai htang ai lam, shaleng ya ai lam ni rai nga ai. Raitim mung tsawra matsan dum lama ai ngu ai lam nlawm ai magam bungli ngu ai san san the sha hkye hkrang la ai hkrum lu na matu nram nga ai. Yona a myit sat lawat gaw, teng man ding hpring ai wa re, njaw ai nkaja ai lam ngai hpa n galaw ai, ngu nna tinang a hkum hpe chyoi pra dum ai myit jasat rai nga ai. Ndai zawn re ai myit jasat rawng ai masha ni hpe “nhkru ai amyu ni” ngu nna madu yesu tsun ai. Dingda mung na hkawhkam jan gaw, ndai prat na amyu hte rau rawt wa nna, shanhte hpe daw dan na ra ai, nga nna madu yesu sadi jaw ai. Tara mai gan masha hpe madaw tara agyi shatai dat na ngu ai lachyum rai nga ai, hpa majaw nga yang dai tara mai gan hkawm hkam jan gaw, tara mai gan masha rai nga ai raitim, nsim nsa karai kasang a hpaji byeng ya hpe hkan tam nga ai majaw rai nga ai.

Tinang a prat hpe ding man dum, chyoi pra dum ai Yona a myit jasat rawng ai lam gaw anhte hpe “hypocrites” sawt ai masha hpyi hpun ai masha ni tai mat wa shangun lu nga ai. Ndai gaw grai ahkyak shatai nna sadi ra ai ana kanu na rai nga ai. Yona nga kaba a kan hta masum ya masum na rawng lai wa ai lamik kumla gaw, anhte hpe hkya hkrang la ai lam aw ya na matu, madu yesu a si hkam ai the bai hkrung rawt wa ai lam a marang e madun shaleng ya ai Karai Kasang a tsawra matsan dum lama ai lam nan rai nga ai. Yona a lamik kumla hku nna anhte hpe shadum nga ai lam, saw shaga nga ai lam gaw, anhte yawng gaw shut hpyit ai hkrai rai ga ai majaw sum nung shingdi shagrit shanem ai myit the Madu Yesu a hpang hkan nang ra ga ai, ngu ai lam rai nga ai. Ndai gaw anhte yawng hpe saw shaga nga ai lam rai nga ai zawn anhte lata la ra na lam mung rai nga mali ai.

NB. 2013 ning Oct 14 ya jahpawt na Missa hkungga hta hkaw tsun lai ai Wa sarabyin Francis a mungga

Ka gale ai- Jau Bernard