Wa Sarabyin: Misa Hkungga Gaw Mara Lu Ai Ni A Madu Lusha Rai Nga Ai; San Pra Ai Ni Hpe Shagrau Kumhpa Hpa Na Matu N Re Ai

June 6, Yesu Hkristu A Chyoi Pra Hkum hte Sai Poi laban shani, “Madu A Lamu Kasa Akyu Hpyi” Ngut Ten, Wa Sarabyin Francis Misa Hkungga a lam sang lang da nga ai.

Nawku Hpung masha yawng gaw tinang a prat hpe Madu Yesu zawn kumhpa shatai da ra ga ai, ngu Marku 14:12-16, 22-26, hpe lakap nna shadum n-gun jaw da nga ai.“Misa Hkungga gaw mara lu ai ni hpe tsawra lam madun airai nga ai; san seng san pra ai ni hpe shagrau ai kumhpa sha n re ai.”

Madu Hkristu a mungga ni hte nga sat nga sa sat lawat ni yawng gaw anhte a masin salum hpe kabu pyaw shangun ai. Shi a chyoi pra ai lata hte muk hpe la nna, chyeju shakawn let, ahkyep alep di nhtawm, tsun mu ai gaw “ndai hpe la nna sha mu, ndai gaw nye a hkum rai nga li ai, ngu Madu Yesu tsun let muk a nsam hta shi a hkum hpe shabyin tawn da ya ai lam Wa Sarabyin Francis bai kahtap tsun dan da nga ai.

Ndai gaw Madu Yesu anhte hpe jaw ai kaba htum ai Sakramentu Chyeju Kumla rai nga ai. Dai gaw shawang myit hte daw jau ai lam hte garan gachyan hkat ai lam hpe madun ai mung rai nga ai.

Daw Jau Ai Lam Gaw Kaba Htum

Yesu Madu masha hpawng hpe daw jau ai hta muk hpe grai law hkra shajin da nna daw jau ai n rai nga ai; Shi a kasa ni hte, shalai wa ai poi nhtoi hta, rau rai nga yang, shi a hkum (asak) hpe garan jaw nna daw jau ai she rai nga ai. Dai gaw kaba dik htum ai daw jau lam nan rai nga ai. Hpang jahtum daw sha poi hta Yesu Madu shi a hkum hpe, muk hpe ahkyep alep di ai zawn di nna kasa ni hpe garan jaw ai. Dai garan jaw ai ahkyep alep shagu hta manu dan ai chyeju atsam ningja ni rawng nga ai.

Asak Jaw Ya Ai Tsawra N-gun Atsam

Misa Hkungga hta ahkyep ai muk gaw asak jaw ya ai tsawra n-gun atsam rai nga ai. Ahkyep alep di ai muk a nsam ni kaji mat ai raitim, Karai Kasang a maren sha re ai tsawra myit gaw dai muk nsam shagu kaw rawng nga ai. Maren sha re ai Yesu a tsawra n-gun atsam gaw yawng hta rawng nga ai. Dai tsawra n-gun atsam gaw asak hpe jaw ya nga ai, kahkyin gumding lam hp mung jaw ya nga ai.

Misa Hkungga hta garan jaw ai muk a nsam hta na Madu Yesu a hkum hte sai gaw shut pyi mara galaw ai ni hpe kaja lam de galai shai wa na matu ra kadawn ai n-gun atsam jaw bang ya ai. Tsawra myit hpe jaw bang ya ai rai nga ai.

Madu Yesu shana aten hta gumle gumlau ai hkrum lai wa ai; Shi hte rau sha ai kasa ni hta na Shi hte lata rau kashin ai wa e gumle gumlau hkum ai rai nga ai; Dai aten Yesu Madu Shi a asak muk anhte hpe jaw ya sai; Kaba dik chyeju kum hpa hpe jaw ya ai.

N Kaja ai lam ni hpe mai kaja ai lam hte bai htang ra ai

Yesu Madu gaw n kaja ai lam hpe mai kaja lam hte bai tai ai. Yesu Madu Yuda a “n galaw shut na nngai” ngu ai ga hpe “galaw shut na rai ndai” ngu ai matsan dum ga hte bai htan ya ai; Yesu Madu gaw mara lu ai ni hpe dam n jaw ai; shanhte a matu Shi a asak hpe mahtang jaw kau nu ai.

Anhte Misa Hkungga hpe hkam la ai shaloi, Yesu Madu anhte hpe dai hte maren galaw ai; Shi anhte hpe chye ai; chye mung chye na ya ai; Anhte mara lu ai ni re ai, shut kataw lai wa ai, shut kataw nga ai, matut nna shut kataw na ma ai hpe Yesu Madu asan sha chye da ai; Raitim, Shi anhte hpe shi hta langai sha jawm hpawng de wa na hpe galoi mung n jahkring kau ai. Anhte hpe Shi hta galum kahkying gumdin shangun ai.

Misa Hkungga gaw san seng san pra ai ni a matu shagrau kumhpa n re ai; mara lu ai ni a matu lusha she rai nga ai; anhte ni Chyoi Pra Hkum Sakramentu hpe hkam la shagu Yesu Madu anhte hta prat a lachyum ningnan hpe jaw bang ya nga ai.

Anhte gaw anhte hkum hpe anhte jasan jaseng la n lu ga ai; Yesu madu a marang e sha jasan jaseng hkam la lu ga ai.

Misa Hkungga gaw Yesu Madu hte matut mahkai jawm pawng wa shangun ai. Misa Hkungga a marang e anhte ni jasan jaseng hkam la lu ga ai. Dai gaw Yesu Madu hta matut mahkai jawm pawng wa ai majaw rai nga ai; n kaja ai lam ni hpe mung mai kaja ai lam hku tai htang lu shangun ai; Dai majaw Karai Kasang anhte hta galaw nga ai zawn, anhte mung hpu nau ni a ntsa tsawra daw jau nga ra ga ai ngu Wa Sarabyin Francis “Madu Yesu a Chyoi Pra Hkum hte Sai poi laban shani, Madu a Lamu Kasa Akyu Hpyi Ngut ten,” mungga htawn da ya ai.

By Fr. Patrick Gawmaw Hkawng Yae

#vaticannews #rvakachinservice

Source : Vatican News