Wa Sarabyin: Medjugorje Hta Galaw Ai Ramma Hpawng Lawm Ai Ni Hpang Video Message Hte N-gun Jaw Ai Shiga

August 1- 6 laman, Bosnia- Herzegovina, Medjugorje, Mladifest kaw zup hpawng nga ma ai Ramma ni hpe, August 2 ya shani, Wa Sarabyin Francis, Video Message hte n-gun jaw mungga tsun shana da ai lam Vatican Shiga Dap kaw nna ndau da ya ma ai.

Nu Maria a kasi hpe hkam la let Karai Kasang kaw tinang a hkum hpe myit dik myit pyaw ai hte ap tawn da na matu saw shaga shadum da nga ai.

Dai Ramma zuphpawng a ga manoi “What must I do to inherit eternal life?” Htani htana asak Sali wunli hkam la lu na matu ngai hpa galaw ra na” ngu ai ga san hte myit sumru zuphpawng sa ai re lam chye lu ai. Chyum daw hpe Mt 19:16-22; Mk 10:17-22; Lk 18:18-23 ni hta na lu su ai ramma langai a lam hpe hti sumru na matu lata da ma ai. Dai ramma wa, sumsing Sali wunli hpe hkam la lu na matu Karai Kasang kaw kabu gara let sa hkrum nna ga san san ai lam rai nga ai.

Wa Sarabyin Francis gaw zuphpawng hta shang lawm ai ramma ni dai ga manoi hpe atsawm sha myit sumru la lu na hpe myit sharawng awng ai lam shi a mungga hta tsun da nga ai.

Ndai akyu hpyi zuphpawng ni hta Yesu Hkristu hte matut mahkai ai lam hpe, grau nna, shi a sakhkrung mungga hpe hti sumru ai, Misa Hkungga nawng jau ai hta shang lawm ai, chyoi pra hkum kawan akyu hpyi ai, prinem lam la ai mara raw sakramentu hpe hkam la ai, ndai mahkrun lam ni hku galaw ai gaw Karai Kasang hpang de sa ai rai nga ai, ngu Wa Sarabyin Francis n-gun jaw da nga ai.

Htani Htana asak hpe hkam la lu na lagaw lahkam gaw nihtep ai htingbu wa hpe tsaw ra ai lam rai nga ai. Shawng lahkam hpe hkam ai gaw tinang a ni htep ai htingbu wa hpe teng man jaw ang ai hte tsaw ra ai lahkam rai nga ai.

Yesu Madu gaw dai ramma a “myit sharawng awng ai lam” hpe mu ai; bai, shi a “gawng kya ai ai lam” hpe mung mu ya ai. Shi a sharawng awng ai gaw sumsing mungdan madu lu na lam rai nna, gawng kya ai lam gaw mungkan dinghta sutgan hpe marin ai lam rai nga ai, ngu Wa Sarabyin Francis jahpra dan da nga ai.

Dai majaw lahkawng ngu na lahkam gaw tara hkan shadik ai rai jang, shing n rai, alu atan galaw, garum jaw garum ya yang sha ngu ai logic masa lam kaw nna tsaw grau ai sumru hkam la ai lam hta hkawm sa ai hpe tsun ai rai nga ai.

“Nang ding hpring mayu n yang gaw, wa su, nang lu ai arai ni mahkra dut kau nna, matsan mayan ni hpe garan jaw u; shing rai jang sumsing lamu ntsa e sutgan ni lu na rin dai, ngai kaw mung sa nna hkan nang rit, ngu nna Yesu shi hpe tsun wu ai (Mt 19:21).

Ndai gaw grau sung, grau kung hpan lam hta hkawm sa na matu Yesu Madu saw shaga ai rai nga ai. Tinang madu ai Mungkan dinghta sutgan ni gaw dai tinang a masin salum hpe dut dang shangun ai lam kaba byin shangun ai hpe myit dum shangun ai mung rai nga ai, hpe Wa Sarabyin tsun ai rai nga ai.

Dai majaw gaw anhte ni dinghta myit marin ai lam ni yawng hpe kau da ra ai. Dai dinghta myit marin ai kaw nna lawt lu ra ai hpe Madu Yesu tsun mayu ai rai nga ai ngu Wa Sarabyin sang lang da nga ai.

Hkristu Madu hte nihtep ai hku nga lu hkra shakut ai gaw kabu pyaw lam kaba rai nga ai. Yesu Madu hkang da ai lam hpe “Mai sa” ngu htan lu na matu dinghta myit marin ai lam ni yawng hpe kau da ra ga ai; Nu Maria kaw kam hpa nga ga; shi gaw atsam marai ban ya na ra ai; shi gaw Yesu Madu hpe mungkan ga de gun sa ai wa rai nga ai; anhte a prat ni hpe hpu nau ni a matu kumhpa tai nga ga, ngu Wa Sarabyin Francis, Ramma ni hpe Video message hku n-gun jaw da ai mungga hpe Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-08/pope-to-youth-in-medjugorje-follow-christ-with-courage-and-joy.html