Wa Sarabyin: Masha Yawng A Salum Simsa Lam De Galai Shai Wa Mu Ga Akyu Hpyi Ya

May 16, Paska Ladaw hta (7) ngu na laban, Yesu Madu Sumsing Lamu de lung wa ai poi laban shani, Vatican kaw du nga ai Myanmar mung shawa masha ni hte rau Wa Sarabyin Francis Misa Hkungga naung jau ya ai hta Karai Kasang Myanmar mung masha ni hte rau shinggyim masha ni yawng a masin salum simsa ai de galai shai ya u ga matu yaw shada ai re lam chye lu ai.

Myanmar mungdan a daru magam hpe Myanmar hpyendap kawn zingla kau ai February 1 ya shani kawn ya du hkra rai yang shata masum jan wa sai rai nna, ndai laman hta Myanmar mung shawa masha tsa kaba hku sat hkrum masai hte hkring kaba re ai mung shawa masha hkala nba hkrum nga sai rai nga i ngu Vatican Shiga Dap kawn ndau da ya ma ai.

Mungga hpe Kabu Gara Shiga hta na shaw la ai rai nna, Yesu Madu Shi a manang ni hku mung kanawn ai Kasa shi langai (11) ni kaw nna pru lung wa na matu shajing ai aten shanhte a matu akyu hpyi ya let sharing shaga, num htet ga ni hte ga sadi ni tawn da ya ai mabyin gaw anhte ni ni a prat hta mung byin nga ai hkam sha yak ai mabyin masa rai nga ai ngu Wa Sarabyin Francis shingdaw da nga ai.

Kawa Karai Kasang kaw akyu hpyi ai hta “reng hkang nga mu” ngu ai ga si hpe jai lang da ai lam mung shi a mungga hta tsun da nga ai.

Myanmar mung masha ni hta gumshen ai lam, daw sa ai lam hte dip sha ai lam ni hpe hkrum nga ma ai lam, dai zawn re ai masa lam ni hpe gara hku reng hkang da na saw shaga hkrum saga ai hpe anhte hkum anhte bai san sumru ra ga ai ngu mung tsun da nga ai.

Ya na zawn yak hkrak jam jau hkrum ai prat hta bai htang ai shaloi, (1) makam hta matut hkawm sa ra ai, (2) gahkyin gumding lam ngang gring ding yang rai ra ai, (3) Teng man ai hta matut tsap sa wa ra ai, ngu Wa Sarabyin matut shadum n-gun jaw da nga ai.

Makam hte maren hkawm sa ga.

Pru lawt lam hku n mu ai ten, myit htum gawng run lam hpe koi yen kau lu na matu makam myit anhte hta nga ra ai. Kabu Gara Shiga hta Yesu Madu shi a myi Kawa Karai Kasang hpang de gara hku mada yu nna myit ru myit tsang lam hpe gara hku koi yen kau lu ai lam kasi madun ya nga ai.

Yesu Madu gaw n hkru n kaja ai lam ni hte myit ru myit yawn ai lam ni hpe n hkrum hkra koi hprawng yen mat ai lam n galaw ai rai nna Shi a kasa ni hpe mung shi zawn sha hprawng yen mat ai lam n nga ai sha dai hpe hparan sa wa na matu n-gun jaw da ai lam, makam hta ngang gring ai gaw anhte ni sumsing de mada yu nga ai rai nna, n ju ndawng ai, matai htang, matai dawp ai lam ni kaw nna mung koi yen lu ai; yawng hpe kahpu kanau tai nga na matu saw shaga nga ai Tsawra Karai Kasang hta myit maju jung myit manoi nga lu ai; Akyu hpyi a lam gaw madung zaw rai nga ai; mayak manghkang kaw na hprawng koi mat na matu n re ai; dai mayak manghkang hkrum ai hta tsawra myit mada lam ni hpe anga nga shangun ra ai.

Myit Hkrum Kahkying Gumding Nga ga.

Yesu Madu, Shi a kasa ni lapran myit hkrum kahkying gumding lam hpying tup nga nga u ga matu, Kawa Karai Kasang kaw akyu hpyi ai; kun dinghku langai hta nau na myit majing hte tsaw ra ai gaw ka-up da ai; garan ginhka chye ai ana kanu hpe koi yen kau ra ai. Anhte a kun dinghku ni hta, wuhpung wuhpawng ni hta, nawku hpung hta pyi n ju n dawng lam, manawn masham lam, tingkyen myit myit ai lam hte jeyang dawdan myit chyu rawng ai lam ni nga nga chye ai; hpa majaw nga yang dai garan ginhka ai lam gaw myit garan ginhka lam hpe chyu shabyin ai satan kaw na rai nga ai.

Rai ti mung, anhte ni manau manang myit rawng ai tsawra myit hte nau na myit majing rawng ai tsawra myit hta sak hkrung hkawm sa lu na matu dai hpe tam la lu na saw shaga hkrum nga ga ai. Kadai raitim, kaji htum re ai mabyin masa lam hta pyi simsa ai hte nau na myit majing hte shada chye na let kanawn mazum sa wa ra ga ai.  Simsa lam hte nau na myit majing rawng wa ai lam ni gaw kaji kajaw re ai mabyin masa ni kaw nna hpang wa ai rai nga ai. Nawku hpung gaw dai lam hpe shabyin shatsaw sa wa na matu shada manhkrum hkrum shaga bawng ban ai lam galaw nna hpu nau ni yawng myig mang langai hta sha ginlum kahkying gumding wa shangun na matu saw shaga hkrum saga ai.

Teng Man Dinghpring ai Masin Salum bang da ga.

Teng man dinghpring ai lam hpe jum tek da ai ngu ai gaw myit mang ai lam hpe makawp maga na matu sha n re ai zawn, makam masham lam hte sharing shaga ai lam ni hpe makawp maga na matu sha mung n re ai; raitim, Hkristu Madu hta manoi nga na matu hte Kabu Gara Shiga hpe manu shadan hkap la kap hpa na matu she rai nga ai. Teng man dinghpring ai lam hta hkawm sa ai ngu ai gaw mungkan shinggyim sumru ai lam Kabu Gara Shiga hte nhtan shai ai lam n nga ai hpe tsun ai; shinggyim prat masa hte galoi mung hkrup rai jaw ang ai hpe tsun ai.

Majan hte n ju n dawng ai lam bying nga ai shinggyim wuhpung wuhpawng hte mung masa lam lapran Kabu Gara Shiga hpe ga sadi dung let simsa lam hpe gaw de sa wa ai ra ga ai. Ndai masa lam hku rai yang sha masa lam hpe galai shai lu na rai nga ai. Dai masa hpe gaw gap lu na matu atsam marai ra ai; Karai Kasang gaw n lum n tsi madang hta nga ai hpe n jai lang ai.

Hpang jahtum mungga hta “Karai Kasang gaw yawng a masin salum hpe simsa shangun ya u ga matu akyu hpyi let masha hkum ngau shagu a myit mada shara n jasum kau mung ga hte dai ni na nhtoi hta raitim Madu Yesu a htinglu htinglai ya ai lam Kawa Karai Kasang hte anhte ni a lapran anga nga u ga, bai nna, n kaja ai lam mahkra hta na mung anhte hpe makawp maga ya u ga matu Wa Sarabyin Francis akyu hpyi ya da ya nga ai lam Vatican Shiga Dap kaw nna ndau da nga ai.

Source : Vatican News