Wa Sarabyin: Mara Dat Hkyamsa Lam Gaw Shinggyim Ahkaw Ahkang Hte Seng Ai

Wa Sarabyin: Mara Dat Hkyamsa Lam Gaw Shinggyim Ahkaw Ahkang Hte Seng Ai

February 6, Laban shana daw maga, Italian television shiga dap kaw Fabio Fazio, “che tempo che fa” lamang hte shapoi ai hta Wa Sarabyin Francis hte hkrum shaga ai lamang lawm wa ai. Ndai lam ni hpe htai ya ai hpe gaw Casa Santa Marta wang dum nta kaw nna galaw ai rai nga ai.

Online mahkrun lam hku hkrum shga ai hta majan lam, htawt sit nga hkawm ai lam, makawp maga lanu lahku na mahkrun lam, kanu kawa ni hte kashu kasha ni a kanaawn mazum lam, n hkru n kaja ai hte yak hkak jam jau lam, akyu hpyi na lam, Nawku Hpung a shawng lam, hpu nau shada ra kadawn ai lam ni lawm nga ai.

Majan

Majan lam hte seng nna san ai shaloi, “kahpu kanau yan lapran majan byin ai gaw Karai Kasang shinggyim lasha hte numsha hpe hpan ai hpang kade nna yang hpang lai wa sai rai nga ai; majan gaw galoi, gara kaw raitim, hten run lam hpe shabyin ai; Ga hadawn: hkai sun galaw ai, kashu kasha ni hpe bau maka ai, kun dinghku hpe sharawt ai, ndai lam ni gaw shinggyim wuhpung wuhpawng hpe gaw sharawt gaw gap ai rai nga ai; hpyen gasat ai gaw dai hpe jahten sharun ai; majan gaw jahten sharun jak langai zawn rai nga ai,” ngu majan a lam hpe sang lang dan ai.

Htawt sit nga hkawm ai lam

Htawt sit nga hkawm ai hte seng nna san ai shaloi, “majan a majaw matsan mayan rai htawt sit nga hkawm ai ni nga wa ai; Greece hte Turkey mungdan jarit hta htawt sit nga hkawm ai masha marai 12 si taw nga ai hpe mu lu ai gaw, htawt sit nga hkawm ai ni hpe n mu jahpai hpai ai, karan ginhka ai manghkang nan rai nga ai; htawt sit nga hkawm ai lam hpe shayawm la lu na matu gaw majan hpe jahkring ra ai; majan n mai hpaw ai,” ngu Wa Sarabyin byin htai da ai.

Hkying mun sen wan hku re ai htawt sit nga hkawm ai masha ni hpe n tara ai hku daw dan masat ai lam ni hpe koi yen kau ra ai lam, shanhte a bawng ring rawt jat na lam hpe madung da galaw sa wa ra ai lam mung tsun shadum da ai.

Makawp maga lanu lahku na mahkrun lam

Makawp maga lanu lahku na lam hte seng nna san ai shaloi, “hpan da hkrum ai nga yawng nga pra hpe makawp maga ra ai lam, yawng a dum nta rai nga ai mungkan hpe makawp maga ra ai lam, yu lakawn ai hta yawng a matu akyu ara hpe madung da yu lakawn ai myit jasat, myit sat lawat, myit manaw ni nga ra ai lam, hpu nau myit majing hte shada ni htep ai hku makawp maga lanu lahku ra ai lam, mai kaja ai hte yawng a akyu ara hpe galaw ai hta wanglu wanglang shang lawt ai masa hte rai ra ai lam, Wa Sarabyin Francis shadum jahprang ga hte htai da ai.

N hkru n kaja ai hte yak hkak jam jau lam

N hkru n kaja ai hte mayak lam ni hte seng nna san ai shaloi, “myit san seng ai ni hpe hkra machyi shangun ai lam nga chye ai; dai gaw Karai Kasang ngai hpe n yu ai, n lakawn ai ngu myit la hkam la shut ai lam rai nga ai.

Satan gaw dai zawn re ai myit shut mang shut ai myit masa hpe bang ya nga ai. Dai majaw masha law law wa hkan sa ra ai mungkan shinggyim tara lam ni hpe tawt lai ma ai. Dai tara hpe hkan sa na atsam n rawng byin chye ma ai. Anhte a kashu kasha ni hparai yak hkak jam jau ma ai rai? Ndai ga san hpe hkrak tam n lu ai raitim, Karai Kasang hta kam hpa nga nngai, Karai Kasang hpe tsaw ra shakut nga nngai; Karai Kasang hpe kam ai rai yang hpa rai kashu kasha ni jam jau hkrum ma ai rai, ngu nye hkum hpe ngai san tim mahtai hkrak n mu ai; Karai Kasang a tsaw ra myit gaw atsam grai kaba ai, mahkra dang chye ai tsaw ra myit rawng ai wa rai nga ai; Raitim, de a hti htang re ai manawn masham, n ju n dawng, jahten sharun ai lam ni gaw masha langai ngai a marang mungkan hta n hkru n kaja ai lam hkai shaprut prut rai nga ai,” ngu Wa Sarabyin Francis tsun sang lang dan ai.

Akyu hpyi na lam

Akyu hpyi ai a ahkyak ai lam hte seng nna san ai shaloi, “Akyu hpyi ai gaw tinang hkum nan hta atsam n nga ai ngu hkam sha ai ma langai zawn ‘ah wa, ah nu’ ngu shaga nga ai hte bung ai; Akyu hpyi ai ngu gaw anhte hta atsam n nga ai, mara lu ai, masat shadang ngu ai nga ai, n hkum n tsup ai hpe myit dum ai lam mung rai nga ai. Akyu hpyi ai a marang e, n-gun atsam ban la lu ai, masat shadang hta lai jan nna lu la shangun ai; anhte Hkristan ni a matu akyu hpyi ai gaw Kawa Karai Kasang hte hkrum shaga ai, shi kaw sit shang shaman hkam la ai rai nga ai,” ngu Wa Sarabyin Francis tsun sang lang dan ai.

Nawku Hpung a shawng lam

Nawku Hpung a shawng lam hte seng nna san ai shaloi, mung masa lam hta, sut masa lam hta, shinggyim masa lam hta, kaning re ai masa lam hta raitim, ‘Fratelli tutti’ matsun sharin shaga ai hte maren sak hkrung sa na ra ga ai lam, dai gaw sai rum nau na myit majing hte yawng a dum nta ndai mungkan hta rau nga rau pra sak hkrung nga na matu sharin shaga da ai re lam, yawng a akyu ara hpe madung da let lamyi laman shagu tinang lu ai n-gun atsam bang, rau hkawm sa na matu sharin shaga matsun da ai re lam Wa Sarabyin Francis tsun sang lang da ai.

Matut nna mung Wa Sarabyin, San  apostolic exhortation ‘Evangelii nuntiandi’ hte ‘Evangelii gaudium’ matsun laika hte maren Buhkawm Akyu Hpyi Ai Nawku Hpung hta lawm ai nawku hpung masha ni gaw sasana magam hta kam sham, myit hkrum, rau ta gindun let sak hkawm sa ra ai lam mung tsun da ai.

Nawku Hpung a shawng lam a matu “Mungga Masha Tai Wa Sai” ngu ai hta, anhte ni kalang mi bai daju wa ra ga ai, ngu mung tsun sang lang da ai.

Hpu nau shada ra kadawn ai lam

Hpu Nau shada ra kadawn hkat ai lam hte seng nna, Slg. Frazio “Wa Sarabyin shingtai hkam sha yu ai kun? Wa Sarabyin hta manang kaja ni gaw nga ai kun?,” ngu san ai shaloi, “Ngai hpe karum shingtau ya ai manang kaja law law nga nngai; ngai mung masha langai mi rai nngai majaw ra rawng gawng kya ai lam ni law law nga nngai; shanhte ni ngai a lam atsawm sha chye ma ai hte chye mung chye na ya ma ai; ngai hta manang kaja law law ra nga nngai; shawng na Wa Sarabyin ni gaw sak hkrung let san seng san pra ai hku nga lai wa ma ai; ngai gaw shanhte zawn n nga lu shi nngai; ngai hta shinggyim hku hkau lam grai ra kadawn nga ai; dai majaw mung ndai Santa Marta wang kaw masha law law hte hkrum shaga ai hpe nang mu n rai; dai gaw ngai a sak hkrung nga ai prat masa re; ngai hte rau nga ai masha gaw n law ma ai raitim, shanhte gaw ngai a teng man manang kaja ni nan rai ma ai,” ngu shi a shinggyim hku hkau lam hpe tsun hkai dan ai.

Wa Sarabyin Francis gaw 1990 Junly 16 ya shani Carmel Nu Maria hpe ga sadi hkam da ai lam hpe mung tsun dan wa ai. Dai gaw TV n yu na matu rai nga ai. “Ngai TV n yu ai; raitim dai zawn n yu ai gaw dai hpe mara shagun ai gaw n re ai,” ngu tsun sang lang dan ai. Shi gaw lai wa sai aten hta yungwi shingni music, grau nna classical music hpe myit lawm ai lam tsun dan let grai wa lachyum n sung, akyu n byin ai raitim mani pyaw hpa lam ni gaw, shi a matu tsi langai rai nga ai ngu mung tsun dan wa ai.

By Fr. Patrick Gawmaw Hkawng Yae

https://www.vaticannews.va/en/pope/news/2022-02/pope-francis-war-is-a-contradiction.html