Wa Sarabyin: Manu Dan Nhprang Sut Rai Ni Hte Galaw Shachyaw Da Ai Hpara Sumla Ni Hpe Koi Mu! Asak Hte Seng Ai Hpe Tam Mu!

image from Vatican Website

July 31, laban shani, San Peter Shawa Pa hta, “Madu A Lamu Kasan Akyu Hpyi Ga” tsun ten, Wa Sarabyin Francis, dai shani hti ang ai Kabu Gara Shiga Chyum Laika daw ni hpe sumru woi let, ja gumhpraw sutgan lam de madung da mat na matu gunglau hkrum nga ai masha hkum shagu hpe shadum sadi jaw da nga ai. Karai Kasang a ‘tsaw ra myit hpe tam la chye ai rai yang gaw htum ngu n nga ai chyeju kumhpa ni hpe hkam la lu na re lam tsun shadum da nga ai.

Hti ang ai Kabu Gara Shiga gaw, sahti kasha langai mi kahpu hte Sali wunli karan na matu Yesu hpe tsun shadut shangun ai lam rai nga ai (Lk 12:13-21).

Nammak lawhpa myit a majaw byin wa ai karan ginhka ai lam, shing n rai, n tara lawhpa ai lam gaw prat hpe jahten kau lu ai rai nna, lawhpa myit manoi ai lam hpe shabyin ya lu ai ‘ana’ tai wa chye ai.

Nammak Lawhpa Myit A Hkrit Tsang Shara

Sutgan lawhpa myit gaw, chyahkring hkring, shi a shi byin pru wa chye ai. Shinggyim masha ni lu ai hta grau jan lu mayu ai myit law wa magang shanglawt ai myit hte nga lu na n loi wa ai, simsa ai hte n nga lu wa ai.

Lawhpa myit kaba ai gaw shinggyim wuhpung wuhpawng a matu dingbai dingna kaba langai tai nga ai lam, daini na anhte a prat hta maren mara n re ai lam ni grai tsaw taw nga ai. Dai gaw labau hta n byin lai wa yu ai kumla langai rai nga ai. N kaja ai kum la rai nga ai. shinggyim masha law malawng gaw matsan ma ai rai nna, n law masha ni sha lai lai jan jan lu su nga mai na ai. Dai gaw ‘bung kumla’ n rai nga ai.

“Majan hte hpai shai nna ga li ga law ai lam ni hpe sumru yu ga. Arang bang amyat tam ai lam hte sut rai law hpa ai lam gaw dai majan hte hpai shai nna ga li ga law ai a shing du kaw galoi mung nga nga chye ai. Majan a shingdu kaw amyat gade ram nga ai kun? Teng ai lam langai gaw, majan a matu laknak ni dut mari ai lam nan rai nga ai” nga nna Wa Sarabyin Francis sawk sagawn madi madun da nga ai.

Mammak lawhpa myit nga na matu lau la ai lam gaw, n-gun kaba ai ni hte sut masa lam ni hta sha n ga, shinggyim masha shagu a masin salum hta rawng nga chye ai.

Tinang hkum a prat hpe masam maram yu nna sut rai ni hta myit dun, n dun ai hpe dinglik yu ra ai. Galoi mung jan nna ra ai, shing n rai, n law ai ngu apu angun galaw yu ai kun?  Hpu nau ni a matu aten jaw ai kun? Shing n rai, mammak lawhpa myit a majaw dinghpring dingman lam hpe hprai kau ga ai kun? Tinang hkum bai san jep yu ra ai.

Law hpa ai lam hpe nawku ai masha nga wa chye ai hpe sadi ra ai. Sutgan gaw Karai magam gun ai hta nga ra ai ngu hkam la ai shagu, “madu lahkawng hpe daw jau n lu ai. Karai Kasang hte sutgan” langai hpe sha lata nna nawku ra ai, ngu Yesu Madu shadum lai wa ai. Lahkawng yan hpe nawku n lu ai, n mai ai.

Karai Kasang myit ra sharawng ai hku sut su ai ni tai nga ra ai. Matsan dum lama ai tsaw ra myit su ai hpe tsun mayu ai. Ndai sut su ai lam gaw kadai hpe mung myit n ru shangun ai, ga li ga law n byin shangun ai, hpai shai karan ginhka ai lam mung n byin shangun ai. jaw karum jaw chye ai, garan jaw ya chye ai, gam garan lang chye ai gaw Karai Kasang a sut su ai lam hpe madu lu ai rai nga ai.

Mungkan arung arai tam mahkawng ai hta grau ahkyak ai gaw dingman dinghpring ai hte sak hkrung ai lam rai nga ai.

Anhte gaw Karai Kasang hte, shinggyim masha shada, makau grupyin nga yawng nga pra hte, matut mahkai ai hta myit masin kaja ra ai, ladat jaw ra ai.

Lawhpa myit hte n re ai sut su lam a matu ladat shaw atsam dat shakut sa wa ga.

Anhte a Kanu Nu Maria gaw shinggyim prat a matu htani htana grin ai sut gan, dinghpring dingman ai hku tam la lu ai sut rai ni a lam hpe chye na hkawn hkrang lu na matu garum ya u ga law, ngu akyu hpyi let, Wa Sarabyin Francis, shi mungga hpe ginchyum dat da ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-07/pope-avoid-idolatry-of-wealth-and-seek-life-s-true-goods.html

 

Add new comment

7 + 12 =