Wa Sarabyin: Manu Dan Arung Arai Sut Gan Gaw Karai Kasang A Tsaw Ra Kumla Re

Wa Sarabyin: Manu Dan Arung Arai Sut Gan Gaw Karai Kasang A Tsaw Ra Kumla Re

 January 16, laban shani, “Madu A Lamu Kasa Akyu Hpyi Ga” tsun ten, nihtep ai hku rau nga ai, matsan dum lama ai Karai Kasang a tsaw ra myit gaw anhte a matu rai nga ai, ngu Wa Sarabyin mungga hkaw tsun da ai.

 Dai shani hti ang ai Kabu Gara Shiga gaw Hkanan mara na Hkungran poi hta Yesu Madu sa du lawm ai shaloi, Kanu Nu Maria hpyi shawn ai a majaw, hka hpe shabyi shatai ya let poi madu ni hpe karum ya ai lam rai nga ai. Karai Kasang a tsaw ra matsan dum lama ai myit gaw ra kadawn ai ni a matu rai nga ai hpe madun dan ai rai nga ai.

 Karai Kasang a tsaw ra myit gaw shi hpe saw shaga ai ni htep ai ni a matu rai nga ai. Karai kasang gaw anhte hte galoi mung nihtep ai hku nga nga ai, matsan dum lama myit kaba hte nga nga ai.

 Tsaw ra myit nga ai ni gaw htauli htaula myit kaba hte karum shingtau ma ai. Madu Yesu gaw myit n pyaw hpa, agam hpa tai na masa kaw nna mau hpa kabu pyaw lam hpe shabyin ya ai. Dai zawn byin tai wa hkra Yesu hpe hpyi htinglu htinglai ya ai wa gaw Nu Maria rai nga ai.

 Madu Yesu a shawng lang na ndai lamik kumla madun hpang ai gaw shinggyim masha ni a ra ahkyak ai hpe jahtuk shatsawm ya ai lam rai nga ai. Ndai gaw Karai Karang a tsaw ra magam rai nga ai.

 Anhte mung, Hkanan mare na hkungran poi hta Nu Maria hpyi shawn ai zawn, Yesu Madu hpe hpyi shawn ga ai rai yang, anhte hpe karum ya na matu Yesu hte Nu Maria gaw jing jing rai nga ai hpe yin la ra ga ai. Dai hpe sadi let hkan shatup ga ai rai yang, Madu Yesu a tsaw ra hte anhte myit mada ai lam yawng awng dang lu na rai ga ai. Shi a sape ni mung tai lu na ga ai.

 Hkanan mare na hkungran poi mabyin gaw Karai Kasang anhte a matu kabu pyaw lam hpe shabyin ya ai, jahkum shatsup ya ai lam ni hpe shadum ya ai. Karai Kasang a tsaw ra kumla hpe anhte a prat hta tam sumru la ra ga ai.

 Hpang jahtum mungga ginchyum dat hta mung, Karai Kasang anhte hpe tsaw ra ai kumla ni hpe anhte a yak hkak jam jau ten ni hta tam sumru mu la chye ga ngu tsun let Kanu Nu Maria mung akyu hpyi htinglu htinglai ya na hpe kam hpa myit kaba hte akyu hpyi htinglu htinglai nga ga, ngu Wa Sarabyin Francis shadum jahprang da ai hpe Vatican Shiga Dap kaw nna ndau da ma ai.

Source; Vatican News

By Fr. Patrick Gawmaw Hkawng Yae

#vaticannews 

#rvakachinservice