Wa Sarabyin: Makam Masham Wan Shingnan Bai Shatu Shachyi Ga!

image from Vatican website

August 14, laban shani, San Peter Shawa Pa hta, Madu A Lamu Kasa Akyu Hpyi Ga tsun ten, Wa Sarabyin Francis, dai shani hti ang ai Kabu Gara Shiga Chyum Laika hta na, "Ga ntsa de wan jahkru dat na, ngai du sa ring ngai; dai wan ja jang chyi kap sai rai taw gaw, ngai hpa n dawt shara nga na a ta? (Lk 12: 49) ngu ai chyum daw hpe sumru woi da ai.

Kabu Gara Shiga gaw wan shinglet zawn rai nga ai

Anhte langai hpra a matu Karai Kasang a tsawra myit hte seng ai kabu gara shiga gaw wan shinglet zawn anhte hta chyi kap nga ra ai. Tingkyen myit jasat hpe tawt lai kau lu na matu garum ya ai. Hkrung rawt sai Madu hta sak prat ningnan hte sak hkrung nga lu na matu shi hta kam hpa kam shamyat nga shangun ai.

Madu a Kabu Gara Shiga anhte a masin salum hta ja chyi kap nga ai rai yang, anhte hta byin nga ai lam ni shawoi na hte n bung mat sai, galai shai wa ai; Karai Kasang hte hpu nau, nau na ni a matu myit masin salum chyinghka hpaw malang da ya lu wa ai. Nsin prat hpe nhtoi jahtoi ya ai; N teng n man hpara sumla ni kaw na koi yan lu wa ai; shanhte a mayam prat kaw na lawt lu wa ai.

Karai Kasang a tsawra myit bang gun da ai lam

Chyum laika hta na Myihtoi Elijah, Myihtoi Jeremaiah zawn re myihtoi ni a ga hte maren, Madu Yesu gaw Karai Kasang a tsawra myit hte hpring ai wa rai nna, jahtum hta, wudang ntsa si hkam ai du hkra shi a prat hpe ap nawng kau ya ai rai nga ai.

Dai Madu gaw wan shinglet kumla hte re ai atsam kaba ai Chyoi Pra ai Wenyi hte hpring  ai wa rai nga ai.

Shi gaw Karai Kasang a hkrang nsam hpe makoi magap da nna, shinggyim masha langai hku nna mat mat ai ni, karan ginhka hkrum kabai da hkrum ai ni, hkum hkrang wenyi machyi ai ni yawng hpe shamai shatsai ya ai myit mada shara rai nga ai.

Yesu Madu a ga si ni gaw anhte hta makam masham wan hte shachyi shagrung ya ai. Ndai gaw anhte a matu ahkyak ai lam rai nga ai. Aten shagu, shana e pyi maja nga ra na ga ai.

Kabu Gara Shiga hpe sharawng shara ai lam

Tinghkrai raitim, nawku hpung hku raitim, Kabu Gara Shiga hpe sakse hkam na myit sharawng shara nga ra ai. Chyoi Pra ai Wenyi wan shinglet anhte hta hkru chyi nga ai rai yang akyu hpyi ai hta, tsawra garum shingtau ai hta sharawng shara galaw shakut lu na ga ai. Shaloi, makam masham lam hta kabu pyaw nga na rai ga ai, nga nna Wa Sarabyin Francis, lai wa sai laban shani, Madu a lamu kasa akyu hpyi ten hkaw tsun da nga ai.

 

Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-08/pope-francis-at-angelus-rekindle-the-flame-of-faith.html

 

Add new comment

15 + 3 =