Wa Sarabyin: Mai Kaja Ai Lam Hta, Akyu Hpyi Ai Hta, Dau Jau Ai Hta N Hkring N Sa Shakut Shaja Nga Mu

November 13, laban shani, Madu a Lamu Kasa Akyu Hpyi Ga tsun ten, Wa Sarabyin Francis, dai shani hti ang ai Chyum Laika hta, Madu Yesu a shadum jahprang ga, shani shagu na akyu hpyi ai hta, mai kaja ai magam bungli galaw ai hta, hpu nau, nau na ni hpe daw jau ai hta shakut shaja nga na lam n-gun jaw shadum da ai.

Madu Yesu gaw hkikhkam ai Htingnu a shingkan shingwan kaba lam hpe tsun shapraw dan ai raitim, mungkan ga na rai yang gaw lani mi hten run mat mat na lam, nlung langai a ntsa langai n mara ai daram du hkra nan hten run mat na, ayai aya byin mat na lam rai nga ai; labau nga wa na majan hte shingra maka hten za ai lam ni byin pru wa na lam, dai lam gaw n kaja ai baw yawng hpe la kau na re lam tau nau tsun shadum sadi jaw da ai hpe Wa Sarabyin Francis tsun sang lang da ai.

Atsam marai dat shakut shaja ai lam hpe myit dating let galaw sa wa ra ai lam mung Wa Sarabyin matut tsun shadum da ai. Anhte shinggyim prat a pahkam n lu ai lam ni hte n sim n sa ai lam ni kaw nna lawt ai lam ni nga nga ai hpe mung Madu Yesu shadum sadi jaw ai gaw manu dan sharin shaga lam rai nga ai hpe Wa Sarabyin sumru dum sai ai lam tsun dan wa ai.

"Gawgap da nna hten run mat chye ai baw, ga shadawn: nawku htingnu zawn re ai hpe nawku ai lam hpe koi mu; n hten n run, n mat mat ai Karai Kasang a tengman Mungga, Shi a tsaw ra hte mai kaja ai lam ni hpe hkam la hkan galaw shatup let Shi hpe mahtang nawku nga mu; kaja wa agrin nga ai Karai Kasang hpe nawku mu, nga nna Madu tsun ai rai nga ai" nga nna Wa Sarabyin Francis anhte hpe tsun shadum da ai.

Shinggyim lata hte galaw ai Nawku Htingnu zawn re mu mada ai hkrang hpe madung da ai rai yang, anhte a awng dang ai lam ni, ji woi ji wa ni kaw na yu hkrat wa ai htung lailen ni, htunghking kumla msat masa ni, makam htung lai ni hpe jai lang ga ai raitim, dai hta grau ahkyak ai hpe madung da ra ai hpe myit hprang ra ai. Karai Kasang hpe madung da ra ai. Hpa lam hpe galaw ai raitim, jai lang ai raitim, Madu Karai Kasang hta madung da ai lam ni hkrai rai ra ai.

Kaga lam ni hpe madung da ai rai yang gaw akri madung ahkyak ai hpe shamat kau na hpe tsang ra ai. Dai kaga lam ni mung hkoi mat mat na mara ai, nga nna Wa Sarabyin Francis madi madun da ai.

"Myit dating let atsam marai dat shakut ding yang" ngu ai gaw mai kaja ai lam hpe shani shagu gawgap sa wa ai hpe tsun ai; makau grup-yin hta byin nga ai lam ni anhte hpe lam shadam lam shut shangun chye nga ai hpan ni hte hkrum katut ga ai raitim, mai kaja ai lam hta matut manoi hkawm sa ai hpe tsun ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-11/pope-at-angelus-persevere-in-goodness-prayer-and-service.html