Wa Sarabyin: Madu Yesu Hpe Matut Manoi Azi Yu Nga Ga

January 23, Pranwan Ladaw hta mali ngu na laban shani, Missa Hkungga nawng jau ai shaloi, Wa Sarabyin Francis mungga hkaw tsun ai hta, Madu Yesu hpe matut manoi mada mara nga ga, ngu saw shaga da ai.

Mungga gaw Karai Kasang hpe shadan shadawng ai

Chyum mungga hpe dai shani hti ang ai Chyum Laika hta na ahkyak ai lam lahkawng hpe madi madun shadan dan ai. (1) Karai Kasang a mungga gaw Karai Kasang hpe shadan shadan ai. (2) Shi a mungga gaw anhte hpe shinggyim masha ni kaw woi sa ya ai.

Madu Yesu du sa ai gaw matsan mayan ni hte adip arip hkum masha ni hpe shalawt ya na matu du sa ai re lam Kabu Gara Shiga Chyum Laika hta adan alen mu lu ai. Anhte a hkrit tsang ai lam ni, yawn hkyen ai lam ni kaw nna kabu pyaw ai lam hpe bai mu tam la lu na matu garum ya ai.

Karai Mungga gaw makam masham hpe shangang shakang ya ai, shatsawm jahtap ya ai. Karai mungga hpe anhte a akyu hpyi ai lam hte wenyi sak prat a kri madung shara kaw tawn da ga, ngu Wa Sarabyin Francis n-gun jaw da ai.

Karai Kasang a shadan shadawng ai lam gaw shinggyim masha ni hpang de lam woi ya ai. Anhte ni Karai Kasang hpe tam mu la ai rai yang, agung alau hpe tawt lai lu ai.  Anhte a sak prat hta dingbai dingna jaw, hkra machyi shangun chye ai ntsa lam mu mada ai nawku daw jau ai lam ni hpe shayawm kau lu ai rai nna, tinang hkum hpe ngang kang ai hte hting hkang da lu ai makam hta sak hkrung lu ai sak prat de galai ya ai.

Karai mungga gaw shi a shang lawt ai tsaw ra myit hte nau na myit majing hte shada hkrum zup rau hkawm rau sa rau magam gun hpai na matu shadut ya ai.

Madu Yesu gaw matsan mayan re ai ni hpang de shangun dat hkrum ai re lam, shanhte hpe shalawt ya na matu re lam, Kabu Gara Shiga chyum laika na Nazareth mare Tara Jawng hta Madu Yesu hkum nan tsun da ai gaw Karai Kasang hpe nawku daw jau ai gaw kaba dik myit pyaw lam jaw ai rai nna, nihtep hpu nau ni hpe lakawn lanawn ai mung rai nga ai.

Karai Kasang a sak hkrung mungga hpe madat na la nna akyu hpyi let dai mungga hta tatut hkrang shapraw, sak hkrung nga ga ngu hpang jahtum mungga hta Wa Sarabyin Francis n-gun jaw saw shaga da ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-01/pope-let-us-keep-our-gaze-fixed-on-jesus.html