Wa Sarabyin: Lazare Association mying ai Sasana Hpung a shaning (10) ning hpring gahkyin gumdin lam a matu n gun jaw dat ai shiga!

Covid – 19 hpe hkrit tsang ra ai majaw Lazare sasana hpung a (10) hpring, May 29 ya shani, Wa Sarabyin Casa Santa Marta kata kaw dai sasana hpung malawm marai (8) hpe sha hkap la hkrum shaga ai lam chye lu ai. Shanhte a hkrum shaga ai lam hpe online Video conference mahkrun lam hte hkying hkum mi jan hkra galaw lai wa ma ai. Ndai zawn galaw ai lam hpe June 5, bat Manga ya shani ndau ai hta tsun da nga ai.

Dat kasa ni yawng shachyan ai lam maren sha rai nga ai. “Lam ntsa kaw bungli galaw sha ai ni hte ramma prat hta bungli galaw ai ni hte arau nga na hta lai nna kaga myit yaw shada lam nnga ga ai” ngu ai rai nga ai.Lazare Association hpung hpe 2011 shaning hta Paris na Etienne Villemain hte Martin Choutet yan kaw nna gaw de hpang ai rai nna, lam ntsa kaw sha kan bau magam galaw sha ai ni hte rau nga na matu yaw shada ai lam chye lu ai. Lazare hpung hta lawm ai ni gaw dum nta kata lam ntsa kaw bungli galaw sha ra ai ni hpe shanhte a dum nta ni kaw woi nga ma ai. Ra mara lam ni hpe mung shanhte hkum nan woi awn galaw nga ma ai.

Lazare hpung hta lawm ai ni hta na marai Kru(6)  hte Shi(10) lapran na masha ni gaw Lazare kaw ap nawng ai ni hte rau nga ma ai. Daini na aten, Paris kaw nta (12) nga nga sai rai nna dai shara hta ap nawng (200) daram nga taw sai lam chye lu ai. Shinggyim ahkaw ahkang hte seng nna garan ginhka ai lam ni hpe ninghkap shading sharai nga ma ai. Dum nta nnga ai ni a matu dum nta law law naw ra ai lam hte shanhte hte ni htep ai hku nga ya na ra ai ngu myit la hkam la nna nga shara ni lajang ya let shanhte hte rau hkan nga shakut nga ma ai.

Shinggyim masha shagu gaw sari sadang nga na matu ginsup lam hta shakut ra ai rai nna, dai zawn shakut ai a marang e, hkam ja lam mung grau nga wa na re. Raitim dai zawn n galaw nna, sari nnga ai rai yang manu nnga wa na re” ngu Wa Sarabyin tsun da nga ai.

Matut nna mung “Lu su, matsan, hkam ja lam nga ai ni hte nnga ai ni, yawng a matu Karai man hta, masha man hta, tsawm htap ai hku  nga pra ai gaw sari sadang manu rawng ai rai nga ai,” ngu Wa sarabyin Francis tsun da nga ai.Mara dat ya ai atsam hte seng nna Ramma num sha langai mi san ai shaloi, Wa Sarabyin gaw “Dai zawn mara dat ya ai shing nrai, mara dat hkam la ai gaw buga de bai nhtang wa na, letmat hpe lu la ai hte bung nga ai” ngu mung shingdaw sang lang dan ai.Mara dat hkyam sa ai lam gaw masha langai mi a prat ting hpe shabai la lu ai. Dai zawn, shi a masin salum hpe mai tsai hkra tsi lajang lu na matu gaw matsan dum myit kaba  rawng nna, shagrip shanem ai myit hte mara dat ya ai lam nga ra ga ai.

Raitim, manawn masham ai hte myit krem myit dik lam nnga ai gaw nhkru ai sut gan she rai nna, galoi mung sut su nga mai na nre ngu mung matut tsun da nga ai.Shanhte hte matut mahkai tsun shaga ai hta Hkristan ni a sakse hkam ai lam ahkyak ai ngu tsun da nga ai. Kabu gara shiga hpe anhte a lata hte masin salum hta jum tek bang da let sak hkrung nga ra ai. Nawku hpung gaw hpung gale wa nna galu kaba wa ai nre; Sakse hkam ai a majaw she rawt jat galu kaba wa ai re.

1916 hta Algeria kaw makam masham a majaw sat hkrum ai Charles de Foucauld a katsi kamang hpe la na matu ga shadawn hte mung tsun da nga ai.Mungkan ntsa hta matsan ai ni dai daram law taw nga ten Nawku hpung gaw hpa rai lu su taw ai rai? ngu san ai shaloi, shi gaw Nawku hpung ngu ai gaw grai dam lada ai re ngu tsun sanglang hpang da nga ai. Ginchyum dat yu ga nga yang, masha langai mi lu su na matu ja gumhpraw tam shakut ai a majaw Karai Kasang hte tsan gang ai de hkawm sa wa ai. Shi a salum gaw dai ja gum hpraw nga ai de manoi wa ai.Karai kasang hte ni htep ai hku nga shakut magang matsan magang rai nga ai ngu sang lang da nga ai.

Dai majaw Kabu gara shiga hta manoi nna lu su ai wa gaw matsan salum hte sak hkrung nga chye ai. Sarabyin, Saradaw, Jau ni hte sak jaw ap nawng sasana hpung ni lu su ai gaw masha ni hpe myit kataw shangun ai lam tai nga ai.Yesu kaw hkan na matu shaga la hkrum ai wa gaw mungkan sut gan kaw na tsan gang ai matsan salum nga ra ai. Sut gan hte seng nna hparan na lit ang ai wa mung tinggyeng sut su lam a matu nmai myit nmai galaw ai; kaga masha ni hpe daw jau na matu sha galaw ra ai. Loyola kaw na San Ignatius a ga “matsan ngu ai gaw prat a kanu” re, hpa majaw nga yang dai zawn re masin rawng ai gaw shawang tsawra myit kaba ai rai nna, masha ni hpe daw jau lu ai Karai kumhpa re” ngu hkam la ai ga hpe bai shadum da nga ai.

Vatican hta Lazare Centre daju hpaw na lam hte seng nna Wa Sarabyin hpe san ai shaloi, Ra ahkyak taw ai gaw shara nrai nga ai, Wa Sarabyin hkum nan a hpaw hpang gwi n gwi ai hta she ahkyak madung rai nga ai ngu nna bai htai da nga ai. Zup hpawng ginchyum dat n shangut shi yang shanhte hpe myit sawn hpa jaw dat ai. Dai gaw “Anhte ni Lu la ai shawang tsawra myit hpe gara hku jai lang nga ai kun? ngu ai rai nga ai ngu ai lam hpe Vatican shiga hku nna chye lu ai.

05 June 2020, 17:33

https://www.vaticannews.va/en/pope/news/2020-06/pope-francis-audience-lazare-flat-sharing-solidarity.html