Wa Sarabyin: Laknak Yawng Hpe Shazim Kau Mu! Majan Shabyin Ai Ni Gaw Shinggyim Myit Jasat Hpe Shamat Kau Ai Ni Rai Nga Ai

February 27, laban shani, Wa Sarabyin Francis, laknak hpe shazim kau na matu tsun sadi jaw let majan hpaw, majan shabyin ai ni yawng gaw shinggyim myit masa hpe shamat kau ai, shinggyim myit n myit ai ni rai ma ai ngu shadum jahprang da nga ai hpe Vatican Shiga Dap kaw nna ndau da ma ai.

“Ndai nhtoi ni hta majan a majaw tsin-yam kaba hkrum sha nga ra ga ai” ngu Wa Sarabyin myit n pyaw myit yawn let ga hpaw hta tsun hpang da ai.

Russian gaw Ukraine hpe majan hpaw sa gasat nga ai hpe na lu ai Wa Sarabyin Francis gaw ya na zawn simsa lam lu na matu akyu ja ja hpyi na, hpyen yen tsin-yam hkrum ni hpe ni htep ai hku garum ya na, majan hpe hkum hpaw hkum shabyin na matu hpyi shawn da ai lam ni hpe shani shagu ngu na daram galaw nga ai rai nga ai.

Ndai majan hkrunlam n nga u ga matu shani shagu anhte ni akyu hpyi lai wa ga ai, akyu hpyi nga ga ai, ngu Madu a lamu kasa akyu hpyi ga tsun ten hta Wa Sarabyin tsun da nga ai.

March 2, wanwu chya bat masum ya shani gaw simsa lam a matu lusha gam akyu hpyi nhtoi rai nga ai hte maren, grau nna Ukraine mung shawa masha ni a simsa lam lu na matu ap nawng akyu hpyi ga ngu Wa Sarabyin Francis saw shaga da nga ai.

Anhte gaw hpu nau ni hkrai rai ga ai hpe myit dum nga ga, Karai Kasang gaw majan yawng hpe shazim kau ya u ga matu akyu hpyi nga ga, majan tsin-yam hkrum Ukraine mung shawa masha ni a matu ja ja akyu hpyi garum ya nga ga, ngu Wa Sarabyin Francis saw shaga da ai.

Majan hpaw ai, majan shabyin ai masha shagu gaw shinggyim masha rai nga ai hpe malap mali ai ni rai nga ai; ndai majan  hpaw ai ni gaw shinggyim masha prat hpe hkrak n yu ai, sung sung n sumru ai ni rai ma ai; tinghkrai myit myit ai ni, arawng aya nang mak law hpa ai ni kaw nna hpang wa ai majan a majaw shinggyim masha ni hta machyi hkra shangun ai gaw myit n pyaw hpa, hkap la n mai ai lam ni rai nga ai, ngu Wa Sarabyin Francis shadum shadi jaw da nga ai.

Shimlam tam ai ni, grau nna asak kung sai dinggai dingla ni hte ma kaji, manga ni hte rau hprawng hkawm ra nga ai ma kanu ni a matu myit tsang kaba tsang lawm nga ai lam Wa Sarabyin tsun dan da nga ai.

“Shanhte gaw hpu nau ni hkrai rai ma ai, hkyak hkyak shinggyim makawp maga lam hpe galaw ra nga ai, dai gaw ya ya hkyak hkyak Ukraine kaw byin nga ai masa rai nga ai,” ngu Wa Sarabyin tsun ai.

Majan ngu ai gaw ndai mungkan hta na n re ai, ndai mungkan hta n mai shabyin ai, mungkan masha ni hta n mai shabyin ai hpe myit dum nga ra ai; ya kalang bai tsun ga, laknak ni yawng hpe shazim da mu, Karai Kasang gaw simsa lam gaw de ai ni hte rau rai nga ai, gumshen ai ni hte rau n re ai, ngu Wa Sarabyin tsun shadum da nga ai.

By Fr. Patrick Gawmaw Hkawng Yae

https://www.vaticannews.va/en/pope/news/2022-02/pope-francis-appeal-angelus-peace-ukraine-wars-yemen-syria-ethio.html