Wa Sarabyin: Laknak Ni Hte Galaw La N Lu Ai Simsa Lam A Matu Akyu Hpyi Ga Nga Nna Saw Shaga Ai

Wa Sarabyin: Laknak Ni Hte Galaw La N Lu Ai Simsa Lam A Matu Akyu Hpyi Ga

  May 8, laban shani, Wa Sarabyin Francis, San Peter Shawa Pa hta, Regina Coeli Akyu Hpyi Ga tsun ten, majan hpaw laknak ni hte galaw la n lu ai, shabyin la n lu ai simsa lam lu la na matu akyu hpyi nga ga ngu mungkan masha ni hpe saw shaga da nga ai.

  Daini na nhtoi ni hta mungkan jut shara shagu ni hta ngu na daram majan tsin yam hkrum sha nga ai; dai majaw kanu Nu Maria a shawng kaw lahput hput di let simsa lam a matu akyu hpyi htinglu htinglai nga ga, ngu Wa Sarabyin Nu Maria kaw kam hpa na matu shadum saw shaga da nga ai. Ndai aten nhtoi ni hta kam sham ai hpung masha law law wa Kanu Nu Maria hpe hkrang shapraw ai sumla shawng kaw du hpawng akyu hpyi htinglu htinglai nga ai aten rai nga ai. Kanu Nu Maria gaw simsa lam kumhpa hpe jaw ya u ga matu ja ja akyu hpyi nga ga, ngu mung saw shaga da ai.

 “Majan a majaw tsin yam kaba hkrum sha nga ai Ukraine masha ni a hkrap myipwi hte madai hkam sha ru nga ai lam ni yawng Kanu Nu Maria kaw ap da ya nngai,” ngu mung akyu hpyi da ya nga ai. Mana mungli rai nga ai zai ai ladat hte majan hpaw nga ai lapran hta jam jau hkrum sha nga ai ni yawng, simsa lam a matu shani shagu Rosary hti akyu hpyi htinglu htinglai nga ga, ngu mung matut saw shaga da ai.

 Matut nna mung, mungdan daru magam ahkang aya lu ai ningbaw ningla ni a matu mung akyu hpyi ya nga na matu saw shaga da ai.

 “Shanhte gaw simsa lam hpe ra sharawng ai mung shawa masha ni a ra sharawng, myit mada lam hpe hkam sha lawm ai hta n hkrat sum mat mu ga; laknak gaw dai simsa lam hpe galoi tim shabyin lu na n re ai hpe mung dum shai chye na wa mu ga, ngu Wa Sarabyin tsun da ai.

 Laknak marai, laknak shagrung ai lam gaw n ru n ra byin ai lam hpe mahtai tam na matu n rai nga ai. Karai Kasang gaw shi a Wenyi hpe shangun dat nna majan gaw shinggyim masha ni hpe jahten sharun ai re hpe chye na shangun ya rit ga law, ngu nna akyu hpyi let Wa Sarabyin, shi a mungga hpe jahtum da ai.

Source: Vatican News

By Fr. Patrick Gawmaw Hkawng Yae

#vaticannews

#rvakachinservice