Wa Sarabyin: Kungla Shaman Poi Laban, “Mau Hpa Akyu Chyeju A Matu Hpyi Ga”

Madu Yesu a nni nkri hkam si hkam nna bai hkrung rawt ai laban bat magam hpang ai kungla shaman poi laban shani, San Peter Nawku Htingnu hta, chyam bra ana Coronavirus tsin-yam makawp matsun hte maren, nawku daw jau lamang hpe Wa Sarabyin Francis woi awn let television hte radio shapoi ai lam hku mungkan ting na hpung masha wan lam shang lawm ma ai.

Shi a mungga hpe “mau hpa akyu chyeju a matu akyu hpyi ga” ngu ai gabaw  hteVatican Shiga Dap kaw nna ndau da ya ma ai.

Tsaw ra hkung ga ai lam kaw na mauhpa lam de

Yesu Madu Yerusalem de lawze kasha jawn nna shang wa ai lam a mauhpa Chyoi Pra laban bat magam hta na nawku daw jau lamang hpe Wa Sarabyin Francis madung sumru woi da ai. Wa Sarabyin a mungga kaw Yesu Madu hpe kabu gara hkap tau la ai aten kaw nna, Shi hpe tara jeyang, wudang hta jan noi sat kau ai yawn hkyen lam ni lawm nga ai.

Ndai laban hta masha wunawg hpawng kaba “Hosanna” ngu jahtau marawn ai hpe na lu ga ai; Gade nna yang, “Wudang hta jan sat kau mu, jan sat kau mu” ngu marawn ai nsen hpe bai na lu ga ai. Ndai hti htang re ai marawn jahtau ai ga si gaw masha ni Yesu hpe shawng daw hta tsaw ra hkung ga ma ai raitim, dai jeyang daw dan ai aten hta Yesu a marang e mauhpa lam hpe n hkam la ma ai.

Tsaw ra hkung ga ai lam gaw masha a ra sharawng ai, myit mada lam nga ai a majaw pru wa ai ga si rai nna, mauhpa lam gaw masha kaga wa a mauhpa lam hte ningnan re ai lam ni gun sa ya ai anhte a myit masa hte prat hpe galai shai ya ai akyu chyeju langai hku hkap la ai lam rai nga ai. Tsaw ra hkung ga ai lam hta lai nna sung grau ai de hkawm sa ra ga ai; Madu Yesu a lagaw hkang hkan nang na matu anhte hpe saw shaga nga ai; dai gaw tsaw ra hkung ga ai kaw nna mauhpa chyeju hkam la lam de du hkra hkawm sa ai lam rai nga ai, ngu Wa Sarabyin Francis n-gun jaw da nga ai.

Shagrit shanem ai a marang e, hpung shingkang hpe hkam la ga!

Madu Karai Kasang hte Shi a shalai wa ai “Paska poi gaw anhte hpe mauhpa lam jaw ya ai; dai gaw Shi a shagrit shanem ai a marang e, hpung shingkang hpe hkam la ai rai nga ai; Shi a awng dang lam gaw shi a nni nkri hkam, si hkam ai a marang e lu la ai rai nga ai. Ndai awng dang ai lam gaw anhte a matu Madu Yesu hkam la ai awng dang lam rai nga ai; shinggyim mahkrum madup rai nga ai gawng kya ai lam hpe hkam la ai mung sung lam rai nga ai; Shi anhte hte ni htep na matu shinggyim hkum sa la ai; anhte a yak hkak jam jau hte si hkrung si htan hpe kau da na matu n rai nga ai; anhte hpe hkye la na matu rai nga ai. Anhte hpe hkye hkrang la nna galai shai shangun ai rai nga ai. Karai Kasang ndai kungla shaman poi hta wudang a marang e awng dang lam hpe jaw ai gaw anhte shakut shaja let yak hkak jam jau lam ni hpe awng dang lu na matu rai nga ai hpe shadum ya ai ngu Wa Sarabyin Francis sang lang da nga ai.

Mauhpa chyeju hpyi la ga!

Mauhpa kaba lam hpe myit dum ai gaw Madu Yesu a tsaw ra myit a majaw rai nna, dai gaw myit yawn myit malai lam hpe jaw ya let sak ningnan hta hkawm sa lu na matu rai nga ai. Marai hkum shagu Yesu a wudang hpe mada yu na matu saw shaga hkrum ai gaw mauhpa chyeju hpe hkam la na matu rai nga ai; Madu Karai a masat jarit n nga ai tsaw ra myit hpe hkam la nna myit yawn myit n pyaw hpa lam ni hpe kau da na matu rai nga ai.

“Madu e, Nang ngai hpe kade tsaw ra a hka!”

“ Madu Yesu a marang e, mauhpa masha ni tai nga ga; shaloi anhte a sak ningnan hta hkawm lu na rai ga ai; Wudang hpe azi yu ai anhte ni gaw Yesu hpe azi yu ai rai ga ai majaw, Shi a marang e anhte ni tsaw ra hkrum ga ai; Mauhpa chyeju gaw anhte a makau grupyin kaw nga ai kau da hkrum ai ni hkap la ai lam rai nga ai; Dai gaw Yesu Madu hpe tsaw ra ai lam madung ai rai nga ai,” ngu Wa Sarabyin Francis tsun sang lang da ai.

Kaja wa sha, ndai masha kasha gaw Karai Kasang a Kasha rai nga ai!

Yesu madu gaw kaja wa sha Karai Kasang a Kasha rai nga ai, ngu Roma hpyen agyi wa sakse hkam da ai gaw Yesu madu a tsaw ra myit mu lu nna chyeju dum ai lam sakse kaba rai nga ai. Kabu Gara Shiga Chyum laika ni madun da ai hta masha law law Yesu Madu a mauhpa lamyik kumla ni hpe tsaw ra hkung ga shagrau ma ai; raitim, dai lam ni hpe Hkristu hkum nan shazim da lai wa ai; hpa majaw nga yang, shanhte gaw Karai Kasang hpe shingran madang hte sha jum tek da nna nawku ma ai; dai mung Shi a mahkra dang chye ai hpung dagu hpe hkrit ai majaw sha rai nga ai.

Ndai chye na ai lam gaw wudang hta nga nga ai; Karai Kasang gaw Shi hkum hpe madun ai shaloi, up hkang ai shaloi, jahten sharun ai laknak hpe n lang ai; tsaw ra ngu ai laknak hte sha madun ai, up hkang ai ngu nna Wa Sarabyin tsun shadum da nga ai.

Hpang jahtum mungga hta, “wudang hta jan noi si hkam ai Madu hpe azi yu let mauhpa akyu chyeju hpe jahpring jahkum shatsup la ga; Ndai hku tsun ga, “ Nang gaw kaja wa sha nan Karai a Kasha rai nga ndai; Nang gaw nye a Madu nye a Karai rai nga ndai,ngu tsun ga” nga nna Wa Sarabyin Francis, Kumla shaman poi laban n’htoi shani hkaw tsun lai wa ai lam Vatican Shiga Dap kaw nna ndau da ma ai.

By Fr. Patrick Gawmaw Hkawng yae

#vaticannews #rvakachinservice

Source : Vatican News