Wa Sarabyin: Kawa Gaw Shi A Kasha Hpe Pawn Da Ai Zawn Karai Kasang Anhte Hpe Pawn Da Ai

October 3, laban shani, San Peter shawa pa hta, Madu A Lamu Kasa Akyu Hpyi Ten, Wa Sarabyin Francis, kaji htum wa hpe lakawn la ai gaw kaba ai magam hpe galaw ai rai nga ai ngu sharin shaga da ai.

Dai shani hti ang ai Kabu Gara Shiga Chyum laika hpe lakap nna, Kawa gaw shi a kasha hpe lakawn ai zawn Karai Kasang gaw anhte hpe lakawn ya nga ai ngu Wa Sarabyin Francis sharin shaga da ai.

Madu Yesu hpe myit dingbai dingna jaw ai gaw Parisee ni Yesu hpe n kaja ai myit hte chyam ai ga san a majaw n rai nga ai; Yesu kaw ma ni hpe woi sa ai kanu kawa ni hpe kasa ni daru kau ma ai majaw she rai nga ai, ngu Wa Sarabyin sumru sang lang da ai.

Kaji htum ai ni gaw garum shingtau la na hpe ra kadawn ma ai. Shanhte gaw kaga masha ni kaw shingbyi nga ra ma ai; Shanhte hpe garum jaw ai ni hpe manu bai htang jaw n lu ai ni rai ma ai; Shanhte gaw shawng daw jau hkam la ging ai ni rai ma ai; Karai Kasang hpe tam ai ni gaw dai ma kaji ni hte kaji htum ni hta tam mu lu ai ngu Wa Sarabyin Francis sharin shaga da ai.

“Karai Kasang a mung dan gaw, dai zawn re ai ni mungdan rai nga ai. Kadai rai ti mung, Karai Kasang a mungdan hpe ma kaji langai mi zawn n hkap la ai wa gaw, dai hta e kaja wa n shang lu na ra ai” (MK 10:15).

Kasa ni gaw kaji htum re ai ni hpe daw jau na matu sha n rai nga ai. Shanhte hkum nan hpe mung kaji htum re ai ma ni zawn hkap la ra ai rai nga ai. Dai kaji htum re ai wa, ngu yin la hkap la ai rai yang she Karai kasang hpe kam hpa kam sham lu ai rai nna Shi hpe hkap tau la chye ai, ngu Wa Sarabyin sharin shaga da ai.

Anhte a n hkum n tsup ai lam hpe tam mu magang, Karai Kasang a bau sin makawp maga, yu lanu lahku ya nga ai hpe hkam sha lu magang rai nga ai. Anhte a n hkum n tsup ai gaw Karai Kasang a tsaw ra ai hpe hkam sha lu na matu rai nga ai.

Akyu hpyi shakut shaja ai ni gaw ndai lam hpe atsawm sha chye na hkawn hkrang, hkam sha ma ai. Nsing hta nga ai ten, shingtai hkam sha ten, Karai Kasang a si mani ai hte matsan dum lama ai gaw anhte kaw du wa ai. Dai gaw aten shagu anhte kaw du wa ai chyeju nan rai nga ai. Dai gaw anhte hpe simsa lam jaw ya ai, Karai Kasang a dam lada tsawra myit hpe jaw ya ai, anhte hpe kung hpan wa shangun ai rai nga ai ngu Wa Sarabyin n-gun jaw da ai.

Kawa gaw shi a kasha hpe zawn Karai Kasang gaw anhte hpe Shi hte ni ni htep htep woi nga u ga, dai gaw anhte a matu grai nan hkikhkam lam rai nga ai, ngu akyu let Wa Sarabyin mungga hpe ginchyum dat da ai.

By Fr. Patrick Gawmaw Hkawng Yae

https://www.vaticannews.va/en/pope/news/2021-10/pope-francis-angelus-lord-father-child-growth-fragility.html