Wa Sarabyin: Kashin Kamun Hkam La Sai Masha Shagu Gaw Nawku Hpung A Sasana Adaw Achyen Ni Re

March 1, bat masum ya shani, Wa Sarabyin Francis, hpung shawa masha ni hte hkrum shaga ten, kashin kamun hkam la sai masha shagu gaw, kaga hte n bung, laklai laksan re ai role hte nawku hpung sasana hta shang lawm nga ai re, nga nna shadum jahprang da nga ai.

Kabu Gara Shiga hkaw tsun shachyam shabra ai gaw laksan san da ai masha ni a matu sha n re ai; Madu Yesu a hpang hkan kasa ni, shanhte a kamsham myit hte daw jau ai zawn prat ban shagu na kashin kamun hkam la sai ni mung, makam langai hta langai hte langai n bung pre ai, laksan re chyeju atsam ni hte Nawku Hpung hpe daw jau ra ga ai.

Kabu Gara Shiga shachyam shabra na sharawng ai myit gaw mungkan myit marin ai hpe kau da, mungkan lam hpe myit ai shinggyim myit masat hpe la kau nna, Madu Yesu a Nawku Hpung Sasana hte rau rai ai makam rawng, ningja hpring, laklai laksan chyeju kaba rai nga ai.

Lahkawng lang ngu na Vatican Zuhpawng a "Nawku Hpung Sasana magam" hte seng nna sharin shaga ai lam ni gaw Yesu hpe n chye n hkap la shi ai ni a ntsa, Karai Kasang a hpungtang tsawra myit hpe Kasha Yesu Madu hte Chyoi Pra ai Wenyi yan e Nawku Hpung hku nna Sasana galaw nga ai hta shang lawm ai lam rai nga ai. Dai gaw mungkan htum ten du hkra Karai Kasang a tsawra myit hpe shachyam shabra na lam rai nga ai.

Sasana sape kaja ni tai nga na matu kashin kamun hkam la sai ni yawng hpe shaga shatsam hkrum ai rai nna, yawng gaw Hkristu zawn tinang hkum hpe, asak hpe ap nawng lu ai tsawra myit sasana magam hta shang lawm ra ai.

Kamsham ai hpung masha ni gaw, Hkristu a tengman mungga hte de a jahtuk shatsawm ya ai hpung dagu atsam hte masha shagu a akyu ara matu mung, shinggyim kun dinghku ting a akyu ara matu mung yaw shada let kaja ai, ningnan re ai lam ni hpe gyin shalat akyu jashawn na matu saw shaga hkrum ai ni rai nga ai.

Sasana galaw ai sasana sape shagu a sharawng awng ai sasana myit gaw grai hkyak ai; hpa majaw nga yang, sasana galaw na, hkam la na gaw anhte yawng rai nga ai, laksan masha san san ngu ai n nga ai, sasana galaw na wa mung, hkam la na wa mung ngai, nang yawng lawm lawm nga ga ai.

Kashin kamun chyeju a manu dan la ai chyeju atsam hte Nawku Hpung hta dawhpum dawnu dawsha tai yawng ra ga ai lam, "Apostolic Exhortation Evangelii Gaudium on proclaiming the Gospel in today's world" hta sharin shaga da ai hpe mung Wa Sarabyin madi madun da ai.

Dai gaw Nawku Hpung a sasana magam hta tinang ang ai magam lit ni hta dawhpum, dawnu, dawsha tai let, shada shingdep shingtau tai, lakung lakap tai shang lawm daw jau na lam rai nga ai.Kashin Kamun Chyeju Kumla hpe hkam la da sai kam sham ai hpung masha shagu gaw, Hkristu a Sasana hkunlam hta, hkawhkam amyu, hkingjawng amyu, myihtoi amyu masha langai mi hku nna sak jaw ap nawng dau jau nga ra ai.

Ad Gentes hta sharin shaga da ai hte maren, tinang ang ai kaning re ai tsang madang hta raitim, kaning re ai shara, kaning re ai masa lam hta raitim, Hkristu a sasana magam hta ap anwng sa wa ra ga ai rai nga ai.

Karai Kasang jaw ya sai chyeju kumhpa a matu Shi hpe shakawn shagrau chyeju dum let Hkristu gaw de da ai Nawku Hpung a sasana hkrunlam hta langai hte langai n bung ai laksan re ai chyeju atsam ni hte shawng lawm ap nawng daw jau nga ga, nga nna Wa Sarabyin Francis, Kashin Kamun Sakramentu hkam la da sai kamsham ai masha yawng hpe sang lang, n-gun jaw, saw shaga da nga ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2023-03/pope-francis-general-audience-catechesis-8-march1.html

Add new comment

7 + 3 =