Wa Sarabyin: Karai Kasang a Tsaw Ra Hpe Hkrum La Ai Mahkrum Madup Hte Shinggyim Masha Ni Hte Hkrum Let Yup Mang Shingran Kaba Tawn Da Ga

Wa Sarabyin Francis a (35) Lang ngu na “Apostolic Journey” Mungdan kaga na Sagu Hpung Masha ni kaw sa kawan katsan ai hkrunlam hpang jahtum nhtoi, December 6, bat langai ya shani, Greece mungdan na Ramma ni hpe n-gun jaw da ai.

Karai Kasang a tsaw ra myit hte mara dat hkyamsa lam a mau hpa

Philippine mungdan na Katerina Binibini gaw makam masham hta myit ung-ang lai wa yu ai hpe bai shanang shakang la lu ai. “Myit ung - ang ai lam ni (doupts) gaw makam masham n rawng ai, n nga ai kumla n rai nga ai, ngu Wa Sarabyin, Philippine shayi langai a mabyin masa mahkrum madup hte rau sang lang da ya ai. Myit ung-ang ai lam ni gaw makam masham lam hta Vitamins zawn tsi tai ya ai, shangang shakang ya ai, ngu mung tsun da ai. Makam masham ngu ai gaw tinang a prat hkrunlam hta Yesu Madu hte rau sak hkrung sa ai rai nga ai ngu mung nawku hpung a makam masham hpe shadan shadawng da ai.

Raitim, “myit ung-ang ai” lam ni byin jang, nat satan a dingbai dingna, agung alau ni ka-up wa lu ai rai nna, dai ni hpe awng dang lu na matu n loi la ai, nsin map byin shangun wa chye ai, ngu mung shadum sadi jaw da ai.

Ahkyak ai hte madu madung re ai lam de bai htang wa ra ai. Anhte gaw Karai Kasang a tsaw ra dik kashu kasha ni hkrai rai nga ai ngu ai myit hte anhte hkum hpe anhte hkap la ra ai, ngu mung shadum da ai.

“Anhte a shani shagu hpe chyam na yu nna hpang ga ai n rai ni? Yup gawk kaw na hkuwawt chyinghka hpe hpaw nna tsawm htap makau grupyin ni hpe yu nna hpang ga ai n rai ni?,” ngu ai ga san hte Wa Sarabyin anhte a prat hpe hpan da ai Karai Kasang hpe mu chye lu na matu n-gun jaw da ai.

Shingra maka gaw anhte a myi hta tsawm htap ai rai yang, Karai Kasang a myi hta mung anhte marai hkum shagu gaw tsawm htap nga ai, grau pyi tsawm htap nga na re. Karai kasang a mara dat hkyamsa ai hte ahpum apup sharawt ya ai hpe mau hpa hkam sha na ga ai, ngu mung n-gun jaw da ai.

Na Hkum Hpe Nang Chye Da U

Wa Sarabyin Francis gaw, Ramma ni hpe tinang hkum hpe tinang chye da ra ai ngu hpaji jaw da ai. “Na a gingdan ai lam gaw nang kadai re, nang hpa re ngu ai hta n madung ai; tsun mayu ai gaw nang hpa bu hpun mawn  sumli da ai ngu ai hte n seng ai,” ngu ga shadawn hte sang lang da ai.

“Anhte gaw Hkristan ni rai ga ai; lit magam galaw ai majaw Hkristan tai ai n re, tsawm htam lam ni nga ai majaw she Hkristan ni tai ga ai,” ngu tsun dan let hpan da magam lam ni, hku hkau lam ni, Karai Kasang a mara dat hkyamsa lam ni hte shinggyim masha shagu a tsawm tsap myiman ni hpe hkam sha let Karai Kasang hpe chyeju dum shakawn nga ga ngu Ramma ni hpe saw shaga da ai.

By Fr. Patrick Gawmaw Hkawng Yae

https://www.vaticannews.va/en/pope/news/2021-12/pope-francis-apostolic-visit-greece-meeeting-young-people.html