Wa Sarabyin: Karai Kasang Shinggyim Hkum Sa La Ai Gaw Hpu Nau Ni Hta Yesu Hpe Mu Chye Na Matu Rai Nga Ai

Wa Sarabyin: Karai Kasang Shinggyim Hkum Sa La Ai Gaw Hpu Nau Ni Hta Yesu Hpe Mu Chye Na Matu Re

  August (22), Laban shani, “Madu A Lamu Kasa Akyu Hpyi” ten, Wa Sarabyin Francis, Karai a Kasha Shingtai Yesu Hkristu shinggyim hkum sa la ai hpe chye na shut, hkam la shut ai lam byin shangun ai hte seng nna sumru woi da let, Hkristan masha ni, Misa Hkungga (Chyoi Pra Hkum Sakramentu) hku nna Hkristu hte nihtep nga lu hkra shakut na matu n-gun jaw da nga ai.

Chyum laika hpe gaw dai shani na Kabu Gara Shiga (Yh 6:60-69) hpe la da ai. Madu Yesu masha hkying manga (5000) hpe muk tawng hte nga hpe shalaw nna jaw sha ai hpang, Shi a sape ni hte san htai, shang lang hkat ai lam hte seng ai rai nga ai.

  Yesu gaw, shi a hkum hte sai hpe lu sha ai ni htani htana asak hpe lu la na mara ai, dai wa hpe hpang jahtum shani shi sharawt la na re, ngu mahtai jaw sang lang da ai.  Hpa majaw nga yang, Shi a shan gaw sha hpa majing, shi a sai gaw lu hpa majing rai nga ai majaw rai nga ai.

Sumsing Lusha

  Yesu Madu gaw sumsing lamu na yu wa ai sha hpa majing, asak lusha rai nga ai; Shi jaw na lusha gaw Shi a hkum hte sai rai nga ai.

  Shi a sape ni gaw, Yesu dai lam tsun wa ai shaloi, shi hpe kam ai myit yawm mat ma ai rai nna, shi a hpang n hkan nang mat ma ai, shanhte a shawoi na prat de bai nhtang nga mat ma ai. Yesu Madu Kasa ni hpe mung, Shi kaw na pru mat mayu yang mai ai ngu asan sha tsun lai wa ai. San Petru gaw Chyoi Pra ai Wenyi a chyeju hte,“Nang gaw htani htana asak lu ndai” ngu bai htan ai.

  Wa Sarabyin Francis gaw, Yesu Madu kaw na pru mat wa ai ni Shi hpe kam sham na matu hpa rai n hkap la ma ai rai, ngu ai hpe sumru woi da nga ai.

  Yesu Madu a ga si ni gaw grai nan chye na yak, hkap la yak ai majaw mung rai nga ai. Shinggyim hkum shan a n hkum n tsup ai lam hte hkye hkrang la na matu shi hpe Karai Kasang shangun dat ai, Karai Kasang daw dan ai ngu ai gaw Yuda masha ni a matu hkap la na yak nga ma ai. Grau nna shinggyim masha shan, shinggyim masha sai hkum tsun u, du sat sai hpe pyi shanhte koi yen ma ai rai nga ai. Dai majaw Karai a Kasha shingtai shinggyim hkum sa la ai ngu ai gaw labau hta Yesu Madu hpe hkap la na yak ai lam shinggyim masha ni a salum hta pat shingdang ai lam langai zawn tai lai wa ai rai nga ai, ngu Wa Sarabyin Francis sang lang da nga ai.

  Yesu Madu gaw Shi a hkum gaw hkye hkrang la ai muk, htani htana asak jaw ai lusha, Karai Kasang hte jawm pawng lu ai lusha rai nga ai lam asan sha shagrin da nga ai. Tara lam ni hte makam masham hte seng ai yin la ai lam ni gaw Madu Yesu hta daju ai, shi hte matut mahkai rau rai nga na matu she rai nga ai.

  Karai Kasang gaw anhte shi hpe hkit hkam ai hku hkap na matu myit e hkalem ai, myit ningshut yupmang, shingran ni hte mawng la ai n rai nga ai; Madu Yesu Hkristu a marang e sha, shi hte matut mahkai rau nga lu na matu anhte hpe lam jaw da ai rai nga ai.

  Misa Hkungga gaw dai hpe madun ai sak rawng kumla rai nga ai.

Source: Vatican News

By Fr. Patrick Gawmaw Hkawng Yae

#vaticannews

#rvakachinservice