Wa Sarabyin: Karai Kasang Hte Hpu Nau Ni Hpe Daw Jau Nna, Gyip Ai Chyinghka Hku Shang Ga

image from Vatican website

Agust 21, laban shani, San Peter Shawa Pa hta, Madu A Lamu Kasa Akyu Hpyi Ga tsun ten, Wa Sarabyin Francis, "Karai Kasang hte hpu nau ni hpe daw jau ai ladat hte gyip ai chyinghka hku shang ga", nga nna hpung shawa masha ni hpe hkaw tsun da ai.
Dai shani hti ang ai Kabu Gara Shiga hpe lakap nna hkaw tsun da ai rai nga ai. Gyip ai chyinghka hku shang lu na matu shakut shaja na matu Wa Sarabyin Francis hpung masha ni hpe saw shaga da ai rai nga ai. Dai gaw Karai Kasang a htani htana asak hpe hkam la lu na hte hkye hkrang la hkrum lu na matu Shi hte Shi a mungga hpe hkap la na matu rai nga ai.
"Gyip ai chinghka hku shang lu na nanhte shakut shaja mu" (Lk 13:24a).
Ndai 'gyip ai chyinghka hku' ngu ai ga si gaw anhte hpe myit tsang shangun ai zawn rai nga ai. "Masha law law wa shang lu na matu na matu kaja wa shakut na mara ai, rai ti mung, n shang lu na mara ai" (Lk 13:24b).
"Sinpraw sinna, dungdung, dingda de na masha ni sa nna, Karai Kasang a Mungdan lusha poi hta dung nga lu na mara ai" (Lk 13:29)
Madu Yesu hkang da ai ndai ga gaw gyip ai chyinghka rai ti mung, shinggyim masha yawng a matu dai chyinghka hpaw da ai re lam ga sadi jaw da ga rai nga ai.
Karai Kasang a asak hta pawng wa ai lam
Madu Yesu a prat, shi nga lai wa ai buga ginra ni hta galaw lai wa ai mare shang chyinghka hku kaba hpe shingdaw ga la nna sharin shaga ai hpe mu lu ga ai. Mara kaba ni hta shawa chyinghka hku kaba langai, shing n rai, lahkawng sha tawn da ai rai nga ai. Shana aten masat da ai aten du jang dai chyinghka kaba hpe la kau ai rai nga ai. Mare masha ni hte ahkyak ai manam, shiga jaw da ai ni shang mai ai chyinghka hku kasha mung ga ai.
Masat da ai aten lai jang gaw dai chyinghka hku kasha kaw na sha lai shang nna nta de wa lu ai rai nga ai.
"Ngai gaw chyinghka hku rai nga nngai; ngai hta shang ai wa gaw, hkye hkrang la ai hkrum na wu ai rai nna, shang wa pru wa rai lu ai hte, wudat shara mu na wu ai" (Yh 10:9).
Karai Kasang a asak hta pawng nga lu ai sumsing mungdan shang lu na matu anhte ni Madu Yesu hku nna sa ra ai, Shi hpe hkalum la ra ai, Shi a mungga hpe hkap la hkan shatup ra ai.
Asak madu lu, asak hkrung lu na matu tsawra myit hte daw jau nga ra ai. Dai gaw Madu Yesu zawn tinang hkum hpe ap jaw kau ai du hkra daw jau ai lam rai nga ai, gyip ai chyinghka hku shang ai rai nga ai, Karai Kasang sharawng awng ai sak prat hta hkawm sa ai rai nga ai.
Karai Kasang shaga la, lata la ai sak hkrung lam hta hkawm sa ai ni gaw tingkyen myit jasat hpe la kau ra ai, gawngba raidum ai myit hpe tawn kau ra ai, tinang hkum ahtang kaba ai myit hpe tawn kau ra ai, lagawn lamawn myit n mai nga ai. Ndai lam hpe tawt lai lu hkra shakut ai mung tinang a wudang hpai ai rai nga ai.
Shani shagu na sak hkrung prat hta kanu kawa tai nga ai ni gaw ningrum ningtau wa hte kashu kasha ni hpe daw jau, kashu kasha ni gaw kaji kawoi, kanu kawa ni hte hpu nau shada daw jau, lu su nga mai ai ni gaw matsan mayan yak hkak jam jau nga ai ni hpe garum daw jau, matsan ai ni mung tinang hta ra kadawn grau ai ni hpe daw jau let chyeju dum ging ai ni hpe chyeju dum rai nna nga ra ai.

By Fr. Patrick Gawmaw Hkawng Yae
#vaticannews
#rvakachinservice
https://www.vaticannews.va/en/pope/news/2022-08/pope-angelus-enter-the-n...

Add new comment

2 + 1 =