Wa Sarabyin: Karai Kasang Gaw Yawng Hpe Jahkrum Shatsup Lu Ai

image from Vatican website

August 28, laban shani, Wa Sarabyin Francis, (Celestinian Pardom) nhtoi a matu Italy Mungdan, L'Aquila mare kaba kaw sa du kawan ai shaloi,  Collemaggio hta nga ai San Mary Basilica Nawku Htingnu Kaba hta Missa Hkungga nawng jau woi lai wa ai lam chye lu ai.

Missa Hkungga na mungga hta Karai kasang gaw yawng hpe jahkrum shatsup lu ai, ngu Wa Sarabyin Francis hkaw tsun da ai.

Ndai mungga hpe 1294 hta Nawku Hpung hpe woi awn lai wa ai Wa Sarabyin Celestine V ngu na wa, Karai Kasang a ntsa chye na shut lai wa sai ni hpe hkaw tsun lai wa yu sai re lam chye lu ai.

Mungga hta,

San Pra ai ni nga lai wa ai prat gaw Madu Yesu du sa ai hte shi hkaw tsun lai wa ai Kabu Gara shiga ni hpe chye na hkan sa shangun ai. Anhte marai hkum shagu gaw a Kawa Karai Kasang a tsaw ra ai hpe hkam la lu ga ai. Ndai gaw Kabu Gara Shiga hte Madu Yesu a salu rai nga ai. Shi a tsaw ra myit rai nga ai. Shi shinggyim hkum sa la ai shi a myiman nan rai nga ai.

Shi a mungga hta, Sarabyin Celestine V gaw shi hkum shi shagrit shanem ai let Karai Kasang a man e myiman pa ai wa rai gna ai, nga nna Wa Sarabyin Francis madi madun da nga ai.

Sarabyin Celestine V gaw shi a prat hta shi hkaw tsun lai wa ai "Karai Kasang gaw yawng hpe jahkum shatsup lu ai wa" ngu ai hte seng nna masha ni e ninghkap lai wa ai hpe hkrum lai wa ai rai tim, ndai makam masham lam hte seng nna teng ai, jaw ai, re ai, nga nna hkaw tsun lai wa ai wa rai nga ai, shi a shagrit shanem ai a majaw Karai Kasang shi hpe hpung shingkang arawng sadang hte shagrau sharawt ya sai, nga nna Wa Sarabyin Francis sakse hkam tsun da ai.

Shagrit shanem ai lam gaw anhte hpe myit kaji shangun ai n re, kaji kadun shangun ai n re; hkam ja ai hte teng man jaw ang ai lam hpe mahtang shabyin ya ai; karai kasang a man e matsan mayan re ai ni hpe myit dum shangun ai she rai nga ai.

Shagrit shanem ai a hpung dagu atsam gaw Karai Kasang hta nga ai. Karai Kasang gaw shagrit shanem ai ni a n-gun atsam rai nga ai. Wa Sarabyin Celestine V gaw Kabu Gara Shiga hpe sakse hkam ai wa rai nga ai; shi a sakse hpe gara sumru hpa lam mung n dang lu lu ai, hpa atsam hte mung n dang lu ai. Shi sakse hkam ai lam gaw teng man ai Kabu Gara Shiga re ai majaw rai nga ai.

Tsawra matsan dum lama myit kaba ai Karai a Kasha, Madu Yesu hte nihtep nga lu hkra aten shagu shakut shaja let nga na matu hpung shawa masha ni hpe Wa Sarabyin saw shaga da ai.

Matsan dum lama ai lam gaw hkap hkalum hkap pang la ai, hkap tau la ai lam rai gna ai; n-gun lagaw ban ya ai, shamai shatsai ya ai, n-gun jaw madi shadaw ya ai lam rai nga ai.

Marawng raw mara dat ya ai lam mung bai hkrung rawt sai wa hte nihtep ai hku nga lu na lam rai nga ai; si ai kaw na htani htana asak hta bai shangai wa ai lam rai nga ai; shut hpyi ai lam ni hta na shalawt ya nna kabu pyaw lam hte shang lawt ai lam hpe hkam la ai rai nga ai.

Nawku Hpung a mara dat hkyamsa gaw laning mi kalang sha galaw ai n rai nga ai; aten shagu mara dat hkyamsa ai lam rai nga ai.

2009 shaning hta nnang nawn nawn ai a majaw shi mat sai hpu nau ni a wenyi ni a matu mung, dai tsin-yam jam jau nga ai ni a matu mung Wa Sarabyin Francis akyu hpyi ya lai wa ai lam mung chye lu ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-08/pope-francis-homily-mass-in-laquila-abruzzo.html

 

Add new comment

1 + 1 =