Wa Sarabyin : Karai Kasang Gaw Anhte Hpe Myit Malang Dingman Ai Ni Tai Hkra Shakut Na  Matu Saw Shaga Nga Ai

Wa Sarabyin Francis gaw lai wa sai laban shani ka-ang na Angelus akyu hpyi hpawng hta “ Makam masham hta hkalem hkalau re ai lam ni hpe sadi maja let nga ra ai lam, Kabu gara ai shiga hta madi madun da ai hte maren Karai Kasang a man hta shagrit shanem let tsawra myit madun ai gaida jan a myit malang dingman ai lam hpe kasi la ra nga ga ai lam hkaw tsun lai wa ai.

Angelus akyu hpyi ga n tsun shi yang Wa Sarabyin gaw dai shani hti ang ai Chyum laika hta mu lu ai lam lahkawng shawa masha ni hpe tsun dan lai wa ai. Gaida gaina ni lu da ai hpe sha shama let, masha a man e arawng tam ai hku galu galang akyu hpyi nga ai Tara Sara ni a lam hte Matsan mayan re ai gaida jan gaw dai Nawku Jawng na alu sumpu hta shi lu malu asak bau na mahkra hpe bang kau ai maubyin rai nga ai.

Wa Sarabyin gaw “Ndai n bung ai lam lahkawng hpe dai ni anhte sadi nna ginhka la chye ra nga ai, tara Sara ni zawn, hpyi hpun ai masa hte masha a man e myi man lu hkra re ai, gumrawng gumtawng myit marin ai hku nbyin hkra anhte sadi ra nga ga ai hte Gai da jan a shagrit shanyem ai myit hte shawang tsawra myit hte alu jaw bang ai lam hpe kasi la ra nga ai” nga nna tsun lai wa ai.

Hpyi Hpun Ai Lam Hpe Sadi Ga, Dingman Myit Malang Hkra Shakut Ga

“Madu a kabu gara shiga hta tsun da ai lam ni hpe anhte ta tut hkan sa let sak hkrung nga ra ai lam, hpyi hpun  ai lam hpe sadi nna tinang hkum hpe madung da let arawng mala gumrawng gumtawng re ai lam koi gam ra nga ga ai. Hpyi hpun ai lam gaw Wenyi hpe  machyi shangun ai hkrit tsang hpa langai re, grau sawng ai gaw makam masham lam hpe shalau let tinang akyu ara tam ai lam hpe sadi ra nga ai, lahta na mabyin hta na Tara Sara ni gaw  shanhte a makam masham hpe lang nna ahkaw ahkang hpe n tara ai hku tinggyeng jai lang let  matsan masha ni hpe amyat htuk dip ka-up sha lai wa ma ai” lam Wa Sarabyin tsun shadum lai wa ai.

Ndai gaw anhte yawng hpe Madu Yesu ja ja sadi jaw ai lam rai nna, Nawku Hpung ni hte wuhpung wuhpawng shara shagu tinang a hkaw ahkang hpe  tinggyen jai lang ai lam galoi n mai galaw ai lam, matsan mayan ni a ntsa hta amyat htuk gumhpraw tam ai lam n galaw na matu tsun sadi jaw da nga ai.

Wa Sarabyin matut tsun ai hta, “tinang madu hkum dinghkrai a matu sha madung tawn nga ga ai kun,  Karai Kasang hte htingbu htingpyen ni a matu kade daram daw jau lu nga ga ai kun, grau nna kaja nan ra kadawn taw nga ai ni hpe yu lakawn ai lam hta shang lawm shakut nga ga ai kun tinang hkum tinang san dinglik  la ra nga ga ai” nga nna matut tsun da da ai.

“Kabu gara ai shiga hta na Gaida jan hpe kasi yu la na matu Madu Yesu anhte hpe saw shaga nga ai. Gai da jan gaw shi lu ai mahkra kaw na  Nawku Jawng de gara hku jaw bang ai ngu hpe yu ga, dai gai da jan a alu bang ai lam gaw lusu ai ni masha mu hkra dan leng ai hku alu jaw ai hta grau hkikhkam tsawm dik ai lam re nga ai, shi gaw anhte yawng hpe kasi madun da nga ai, hpa majaw nga yang shi lu ai mahkra hpe myit masi kawn kabu gara let jaw ya ai hte maren Karai Kasang kaw na n hpaw n’ya re ai shaman chyeju lu la na hpe shi kaja nan kam sham wu ai” nga nna Madu Yesu tsun ai lam Wa Sarabyin madi madun dan nga ai.

Hpang jahtum hta Wa Sarabyin gaw, “anhte a makam masham hpe grau rawt jat wa hkra shinggan arawng aya ra marin ai myit nlawm ai sha gai da jan a makam kaw na sharin la let  Karai Kasang a man hta shagrit shanem ai myit hte shada da tsawra hkat nga na matu ahkyak ai lam tsun da ai” nga nna Vatican Shiga dap kawn shana dat ma ai.

By Mung Hpan