Wa Sarabyin: Karai Kasang gaw, Anhte Hpe Galai Shai Na Matu Hkyak Hkyak Shaga Nga Ai Hpe Hkap La Ga

photo from Vatican Website

March 20, laban shani, Madu A Lamu Kasa Akyu Hpyi Ga tsun ten, Wa Sarabyin Francis, Karai Kasang e anhte hpe galai shai sa wa na matu hkyak hkyak shaga nga ai hpe hkap la hkan sa ga, ngu hkaw matsun da nga ai.

Chyum mungga hpe dai shani hti ang ai chyum daw hpe madung sumru woi da ai. Langji gawgap ai shaloi si mat ai ni hte Pilot e Galile masha ni hpe sat kau ai mabyin hte seng nna rai nga ai.

Dai zawn si mat ai ni gaw hkrit hpa shut hpyit ai a majaw si hkrum ai lam rai nga ai. Majan hte kap bra ana zingli tsin-yam lapran Karai Kasang hpa majaw n dan pru ai kun, ga san san na ma ai.

N hkru n kaja ai lam ni byin pru nga ai shaloi, shabyin ai shaloi, mabyin masa, mahtai ni hpe atsawm sha tam sawk sagawn la chye ra ai. Anhte a shut shai ai lam ni a majaw Karai Kasang hpe mara shagun chye ga ai hpe sadi ra ga ai.

Karai Kasang gaw shinggyim masha ni a lam hta Shi sharawng awng ai hpe atik anang rai shadut nna n jaw bang ya ai. Mahtai hpe madi madun let sha tang madun ai re, ngu Wa Sarabyin matut tsun shadum da ai.

Karai Kasang gaw gumshen ai lam hpe gumshen masa hte galoi mung nhtang ai n re. Anhte hte rau nni nkri hkam let sha n htang ai wa re. Yesu Madu gaw anhte shinggyim masha ni a n hkru n kaja ai lam ni hpe atsam kaba hte hkap shingding ya ai.

Karai Kasang gaw anhte hkam la ging ai mara hte maren, anhte hpe ari jaw mi ai n rai, Anhte a shut hpyit ai mara ni hte maren shi bai tai mi ai n rai (Sh.K.Kd 103:10). Raitim, Shi a matsan dum lama ai myit hte anhte hpe hkye la ai rai nga ai.

“Nanhte mung shut hpyit mara kaw na myit malai n lu myit yang gaw, shanthe zawn, yawng si wa na marin dai, ngu Madu Yesu shadum da nga ai (Lk 13:5).

Myit malai lu galai shai na matu Yesu Madu anhte hpe saw shaga ai gaw ya hkyak hkyak, ndai lusha gam ladaw hta, myit masin hpe hpaw malang da let, n kaja ai lam hta na Karai Kasang hpang de, kabu gara shiga hte maren, gayin wa na matu rai nga ai. Tsawra myit hte nau na majing myit jasat nga ai shara gaw atsam grau kaba ai. Satan a atsam gaw grit yawm mat na ra ai, ngu Wa Sarabyin shadum da ai.

Karai Kasang a tsawra myit hte hkam sharang ya ai gaw anhte ni myit malai lu galai shai na hpe loi shangun ai, hkap la ya na matu rai nga ai.

Karai Kasang gaw anhte hpe aten law law jaw da ai. Anhte a masin salum hpe n mai shamat kau ga ai. Shi a matsan dum lama ai hte kam myit gaw anhte a matu rai nna, dai hpe galoi n shamat kau ai.

“Tsawra ai hpu nau ni e, Karai Kasang gaw anhte hpe kam myit kaba tawn da ai. Kam myit kaba rawng ai Karai Kasang gaw myit galu kaba ai hte anhte hpe manang tai ya nga ai. Shi gaw galoi mung myit htum ai n rai. Anhte a ntsa myit mada lam hpe galoi mung tawn da ai. Karai Kasang gaw anhte a kawa rai nga ai. Kawa langai zawn anhte hpe yu lakawn ya nga ai. Kaja dik ai Kawa zawn apu asi pu si shangun na matu lajang ya nga ai. Anhte a labau hka hta n manoi nga ai. Anhte a shawng lam myit mada shara hta kaba dik myit mada lam tawn da let kam myit mung tawn da ai wa rai nga ai” ngu Wa Sarabyin sharin shaga da ai.

Hpang jahtum anhte yawng hpe Hkawnset Maria kaw akyu hpyi htinglu htinglai ya let myit malai lu galai shai shatsawm lam hpe jahtuk sa wa ga, ngu Wa Sarabyin Francis shadum da nga ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-03/pope-at-angelus-may-we-welcome-the-urgent-call-to-conversion.html

 

Add new comment

9 + 2 =