Wa Sarabyin: Karai Kasang Anhte A Gawng Kya Ai Lam Mahkra Hta Anhte Hpe Tsaw Ra Ai

Wa Sarabyin Francis gaw January 3, Hkawhkam Masum (3) Poi laban shani na “Madu A Lamu Kasa Akyu Hpyi” ten San Peter pa hta anhte a gawng kya ai lam mahkra hta Karai Kasang anhte hpe tsaw ra ai ngu n gun jaw sharin shaga da ai.

Shinggyim hkum sa la ai a marang e, Karai Kasang anhte hpe shi hta kahkyin gumding shangun let anhte a gawng kya ai lam mahkra hpe hkap la let anhte hpe tsaw ra myit kaba hte shi mahkra hpe shi hte rau hkam sha na matu shaw saga nga ai.

Kam sham ai ni yawng shanhte a dum masha ni dum nta hta gawng kya ai lam mahkra hte hkrit tsang lam mahkra a lapran Karai Kasang hpe saw shaga let Shi a galai shai shatsawm ya ai hpe hkam la ra ai.

Hkristmas poi ngut ai hpang laban lahkawng (2) hta Yawhan 1:1 hte maren Hkyela Madu n-shangai shi yang shi a lam hpe tsun dan da ai.

“Shi hta asak nga ai,” (Yh 1:4).

Karai Kasang anhte hte hkrum matut nga ai. San Yawshan Yesu Madu hpe “Logos” mungga ngu tsun da ai. Dai mungga anhte hte Karai Kasang matut mahkai na matu rai nga ai. “Marai langai shingtai hkrai n shaga ai. Masha langai ngai hte rai yang she shaga ai.”

“Yesu Madu gaw npawt kaw na hpang wa ai Mungga rai nga ai,” ngu ai lachyum gaw Karai Kasang anhte hte npawt kaw na nan matut mahkai hkrum shaga na matu rai nga ai.

Karai Kasang a kashu kasha ni tai ai gaw grai nan tsawm htap ai re ai lam Karai a Kasha anhte hpe tsun dan nga ai.

Yesu Madu gaw Karai Kasang a htani htana Mungga rai nga ai. Dai Mungga gaw anhte a matu sha myit ya ai hte anhte hte matut mahkai ya ai.

“Mungga gaw Masha tai wa sai,” “Anhte hte rau nga nga ai,” ngu ai lachyum gaw Madu Yesu kaja wa sha nan mungga hta grau ai wa re hpe tsun nga ai.

Mungga masha tai wa ai ngu ai gaw Karai kasang shinggyim hkum sa la ai rai nga ai. Dai zawn shinggyim hkum shan sa la ai a marang e, anhte shinggyim gawng kya ai lam hpe hkra ya lu na rai nna anhte hte ni htep ai hku arau sa nga lu ai hpe shadum ya nga ai.

Yesu Madu a hkum shan sai machyi hkrum ai ningma ni a marang e anhte a matu Kawa Karai Kasang kaw htinglu htinglai ya ai.

Karai Kasang shinggyim hkum sa la ai gaw anhte a prat hte shi a Karai prat hte shingdaw nna anhte hpe shagrit kau na matu n rai nga ai.

“Tsaw ra ai kanau kasha ni e, Karai Kasang shinggyim hkum sa la ai gaw anhte kaya kahpa ngu myit la ai anhte a gawng kya ai hta shi anhte hpe tsaw ra ai lam madun na matu rai nga ai,” ngu Wa Sarabyin shang lang da ai.

Karai Kasang gaw hpun dat raw dat galaw mai ai hpun nba zawn let shinggyim hkum sa la ai n re ai. Shinggyim hkum shan sa la ai lam hpe bai raw tawn kau na n re ai. Galoi mung hpun da ai. Anhte kaw na galoi mung garan hka mat na n re ai. Anhte kaw chyahkring chyahkra sa dam na matu sha shinggyim hkum shan sa dagraw ai n re ai.

Anhte a masin salum ni hpe Karai Kasang a matu hpaw da ga.

Karai Kasang anhte hta hpa myit mada shara tawn da a ta? “Nihtep ai hkuhkau lam kaba rai nga ai.” Anhte a kabu pyaw lam ni, myit hkri ba lit li ai lam ni, yak hkak jam jau lam ni, hkrit tsang lam ni, garen gari lam ni, ruyak jam jau lam ni, myit mada lam ni, myit yawn lam ni zawn re ai shinggyim masha ni hta byin chye ai lam mahkra hpe hkam sha lawm ya nna shinggyim masha ni a masin salum hpe hpaw ya na matu rai nga ai.

Ma Yesu shangai wa ai hkrang madun ai “Christmas Crib” a shawng hta azim sha, simsa ai hku nga let Karai Kasang a tsaw ra lanu lahku ai lam hpe nihtep dik ai hku hkam la ga. Karai Kasang anhte a lapran a nga nga u ga matu n-hkrit n-kaya ai sha shi hpe shaw shaga nga ga.

Ngwi pyaw ai shaning ningnan rai u ga matu Wa Sarabyin Francis laksan shakram ai lam hpe mung galaw da ai.

Madu a Lamu Kasa Akyu hpyi ngut ai hpang Wa Sarabyin shaning ningnan a matu yawng hpe shakram ai lam mung galaw ai. Shawa akyu a matu Karai Kasang a garum ya ai hte anhte ni rau zawm galaw ai rai yang, yawng mayawng rawt jat bawng ring ganga wa na re ngu mung Wa Sarabyin shingran mu ai lam tsun hpaw da ai.

2021 shaning hta hpa ni byin wa na re gaw anhte hkrak n chye shi ga ai. Raitimung, anhte langai hpra yawng rau jawm galaw lu ai gaw anhte a dum nta “mungkan ga hta hpan da hkrum nga yawng nga pra hpe makawp maga, lanu lahku, bau sin ai lam rai nga ai ngu mung matut shadum da ai.

Shangai shaprat wa ai lam gaw myit mada lam jaw ai ga sadi langai rai nga ai ngu Wa Sarabyin Shi a Mungga jahtum hta anhte hpe shadum da ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-01/pope-francis-angelus-2nd-sunday-christmas-catechesis.html