Wa Sarabyin: Kamsham, Myit Mada, Hpunau Myit Rawng Sakse Ni Tai Ga

August 6, bat kru ya shani, Wa Sarabyin Francis, "teams of Our Lady" "Nu Maria a kasi tai sakse hkam hpung ni" a mungkan madang hkrum zup hpawng hta shawng lawm ai dinghku shang sai sak naw ram ai ni hpe hkalum ga hte rau n-gun jaw mungga shaga da ai.

Wuhpung wuhpawng hte nga ai sak prat hta makam masham sakse ni tai let, ramma ni hpe garum ya nna, hkungran dinghku de sai ni shada mung garum ya hkat mu, ngu n-gun jaw da ai. shani shagu Nu Maria hpe kam hpa kam shamyat let ndai mai kaja ai magam hpe gun hpai nga mu, ngu matut saw shaga da ai.

"Teams of Our Lady" a shamu shamawt ai lam hpe 1938 kaw nna Paris kaw dinghku de sak naw ram ai ginrum dinghku mali kaw nna hpang wa ai re lam chye lu ai; wenyi lam hte seng ai sak hkrung nga pra ai shamu shamawt ai lam rai nga ai. Shanhte gaw ndai shamu shamawt sak hkrung ladat hpe gaw de hpang ya ai Wa Jau Henri Caffarel a lam matsun madun ai hta sak hkrung hkawm sa ali wa ai re lam chye lu ai.

Wuhpung malawm ni rau magam gun ai lam (Working as ateam)

Kun dinghku ni hta na kun dinghku langai hpe wuhpung wuhpung wuhpawng kaba langai a hpung kaji langai hku sawn la mai ai. Kun dinghku shagu gaw Karai Kasang kaw na lailai ai kum hpa langai rai nga ai. Kun dinghku shagu gaw makam masham rawng ai kun dinghku rai nga ra ai; makam masham lam hta hkawm sa ra ai. Anhte yawng gaw shada matut mahkai nga ai ni rai ga ai, rau magam gun hpai ai magam run ni rai ga ai, ngu Wa Sarabyin Francis ningmu jahpaw jahprang da ya ai.

Tsawra myit hte shada manang tai rau hkawm rau nga ai wuhpung wuhpawng gaw rau sha shingran yupmang tawn, rau jam jau hkam shakut sa wa ra ai; rau nawku daw jau, rau kabu pyaw chyeju shakawn nga ra ai, ngu Wa Sarabyin shadum da ai.

Share shagan myit hte shakut shaja ra ai (Be courageous)

Dang sha hkrum ai, n tara n jaw n ang ai hku roi rip hkrum ai, myit n ding man ai ni hte hkrum ai, sadi n dung ai ni hte hkrum ai shaloi ten ni hta shanhte hpe ninghkap makawp maga la lu na matu share shagan myit hte atsam marai bang shakut shaja ra ai, ngu Wa Sarabyin n-gun jaw da ai.

Anhte a Kawa Karai Kasang gaw anhte hpe galoi mung n kau da ai. Wuhpung kasha langai hpra a matu shawng lam de rawt sa lu na matu mahkrai hkrai ya nga ai, ngu Karai Kasang hta kam hpa kam shamyit nga na matu mung shadum jahprang da ya ai.

Nu Maria hpang de, kamhpa myit hte sit shang akyu hpyi htinglu htinglai ai lam(Devotion to Our Lady)

Nu Maria hpe kam hpa kam shamyat Ai Lam

Ma chyangai gaw kanu hpe kam hpa myit kaba ai zawn Nu Maria hpe kam hpa kam shamyat ga; Matsan ai wa gaw shi hpe garum shingtau ya na wa zawn, shagrit shanem ai wa zawn rai nna Nawku Hpung a kanu Nu Maria hpe kam hpa ga; Si mani ai kanu gaw tsaw ra myit kaba hte kasha ni hte nihtep ai hku rau nga ya nna makawp maga bau sin nga ai zawn Kanu Nu Maria gaw anhte hpe makawp maga bau sin ya nga ai, ngu Wa Sarabyin tsun da ai.

Elizabeth hta na-um na-sin ai lam, lamu kasa shiga shana ai hte rau, "Nu Maria gaw lawan ladan rawt sa ai" (Lk 1:39).

Du na prat maka gaw ramma ni a lata hta rai nga ai

Ramma ni gaw shanhte a singkaw hpe jai lang nna, "awng dang lam" ngu ai ru pawt hta ru jung nga ra ai; Wa Sarabyin Francis tsun ai, "singkaw" ngu ai gaw pyen na matu, yupmang shingran mu na matu, ningnan ging shalat na matu rai nga ai. "Ru pawt" ngu ai gaw sak kaba sai salang ni kaw na hpaji byeng-ya ni hpe hkam la na hpe tsun ai rai nga ai.

Hpang jahtum mungga hta, Wa Sarabyin Francis, hkungran ta matut da sai sak naw ram shi ai ni hte shanhte a wenyi hpa-awn ni hpe chyeju dum ai lam tsun let, Karai Kasang a shaman chyeju, Nu Maria a makawp maga bau sin ya ai chyeju shanhte a prat hkrun lam hta galoi mung anga nga u ga matu akyu hpyi da ya nga ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-08/pope-to-teams-of-our-lady-be-courageous-witnesses-to-faith.html