Wa Sarabyin: Kaja Ai Sape Ngu Ai Gaw Galoi Mung A-Maja Nga Ai

image from Vatican website

December 14, bat masum ya shani, Wa Sarabyin Francis, Hpung Shawa Masha Ni hte hkrum shaga ai lamang hta, 'kaja ai sape gaw galoi mung a-maja let nga ai, nga nna tsun da ai.

Prat a laika buk ngu ai hta lawm ai: akyu hpyi ai, tinang hkum dum chye ai, myit marin ai lam ni zawn re ai ni hpe dan dawng ai hku mu la ai lam ni hte seng nna, Wa Sarabyin Francis madung da shadum jahprang da nga ai.

"A-maja nga let nga ai" gaw sumru, mu la, hkam la ai hta kaman n tai ai, akyu hkam sha lu ai lam Wa Sarabyin Francis tsun da ai.

Satan gaw yawng mayawng hpe jahten ya na myit ai, anhte a yawng mayawng hpe mung jahten kau lu ai; ningnan hpang ai hpe tawn kau da na matu mung Satan gaw anhte hpe gunglau taw ai.

Dai re majaw galoi mung a-maja nga ra ai. A-maja nga ai ni gaw awng dang lam a matu lahkam shagu hta maja let hkawm sa ai, nga nna Wa Sarabyin Francis tsun da ai.

Karai Kasang hkum nan, Kabu Gara Shiga ni hku nna, kaja ai sape gaw galoi mung sadi let maja nga ai; n yup taw ai, de a malai, shanhte a bungli magam hta zet zet ja ja rai nga ai, jin jin rai nga ai.

"Nanhte jin jin rai nga na matu nshang e shingkyit kyit nna pyengdin ni hpe shachyi da mu........ Dai Madu du wa yang maja nga mala ai hpe, Madu hpe wa mu lu shangun ai shangun ma ni gaw a lu ma ai," (Lk 12:35-37). Ndai gaw Hkristmas hpe ala nga ai ni a lit magam rai nga ai; Prat hta galoi mung galaw shatup nga ra ai lit magam mung rai nga ai, nga nna Wa Sarabyin matut tsun da ai.

Sadi maja let ala nga ai lam n nga jang, yawng gaw kaman lila rai mat na, grau nna wenyi lam hta kaman lila rai ma na; Satan gaw anhte hpe jahten kau na galoi mung gyam nga ai.

Anhte a hkum anhte kam myit nau kaba nna, Karai Kasang a chyeju hpe n dum shai ai rai jang, Satan gaw chyinhka sa akawk hpaw nna anhte dum nta ting hpe madu la kau na ra ai. Shaloi anhte ni hkrat sum mat na ra ai.

Masha hkum shagu gaw tinang a prat labau hpe bai sumru dinglik, kaja grau ai hpe lata hkawm sa, dai hta sadi maja let rai nga ra ai. 'Sadi maja ai' gaw hpaji byeng-ya re; shinggyim shagrit shanem ai a kumla mung re; Hkristan prat hta hkawm sa ai mung rai nga ai, nga nna Wa Sarabyin Francis, hpang jahtum sharin shaga da ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-12/a-good-disciple-is-vigilant-says-pope-francis-at-audience.html

 

Add new comment

1 + 0 =