Wa Sarabyin: Kahtawlik Nawku Hpung Mying Hte Magam Bungli Shaja Nga Ai Ni Gaw Madu Hkristu Hta Kam Sham Ai Makam Hpe Ndau Let Shinggyim Masha Ni Hpe Daw Jau Ra Ai

November 26, bat manga ya shani, Wa Sarabyin Francis, (30) lang na Kahtawlik Nawku Hpung mying hte magam bungli galaw shaja nga ai ni a hkrum zup hpawng (Forum) hta lawm ai ni hpang de Video message hte n-gun jaw mungga shagun dat ai lam chye lu ai.

Dai hkrum zup hpawng hpe lahkawng ya galaw ai rai nga ai.

Marai Langai Hpra, shing n rai, wuhpung langai a ningnan re ai mahkrum madup ni hpe lam hpaw ya let, Nawku Hpung masha (laity) ni a sasana magam hta shang lawm lu ai lam lajang jathuk sa nga ai Kahtawlik magam (Catholic Action) kawn galaw woi awn nga ai hpe Wa Sarabyin shakawn shagrau da nga ai.

“Kahtawlik Hpung Masha ni hta na San Pra ai ni hte A Lu ai ni law law tai nga ai gaw Nawku Hpung hta sutgan kaba langai rai nga ai,” ngu Wa Sarabyin tsun da ai.

Labau hpe yu dat yang dai zawn rai hkawm sa wa ai hkrum lam gaw grai masan sa ai hkrun lam gaw n rai nga ai. Prat hta hkan nna ningnan re ai hkan shatup ra ai lam ni mung law law hkrum katut lai wa ma ai hte dai zawn re ai lapran nhtoi tai lai wa ma ai.

Kahtawlik Nawku Hpung a ahkyak dik salum daju gaw Kahtawlik Nawku Hpung mying hte magam bungli galaw nga ai ni a matu grai nan ahkyak la nga ai. Prat hta hkan nna anhte hpe dingbai dingna jaw nga ai lam ni hpe awng dang kau lu hkra shakut sa wa nga ga ngu mung n-gun jaw da nga ai.

Anhte a makau grupyin, ndai shara, ndai aten hta, Chyoi Pra Ai Wenyi a tsam hte, mungkan a hkrap nsen hpe madat la hkam sha lawm let makawp maga gaw de gaw sharawt sa wa ra ga ai.

N-gun atsam hpring tup n nga ai ni jawm pawng nga ra ai. Ndai zawn rau pawng hpawn nna galaw ai magam gaw anhte hpe karan ginhka ai lam hte madang n bung ai hku hkam la ai lam ni hpe n byin shangun lu ai.

Madu Yesu hta kam sham ai myit hte hkum tsup ai prat hpe shabyin ga. Karai Kasang n lawm ai rai yang anhte a prat gaw matsan dik htum rai sana ga ai. Dai gaw prat hta lachyum n pru ai tai mat sai. Makam masham n nga ai majaw rai nga ai. Bungli galaw ai hta n-gun tai ya ai myit mada lam n tawn da ai majaw mung, tsaw ra myit hte n nga pra ai majaw mung rai nga ai.

Ndai hkrum zup hpawng “Forum” gaw, makam masham hpe tam jahpring jat la nna, anhte a mungkan hta n bung pre ai lam ni a majaw karan ginhka lam byin nga ai masa ni hpe mahtai tam nhtawm, dai n bung pre ai lam ni hpe jahtuk shatsawm kahkyin ginlum da let rau sak hkrung, magam bungli shachyan shaja sa na mahtai hpe shapraw sa wa lu na matu rai nga ai.

Hpang jahtum mungga hta, shaning sum shi (30) ning tup lapran Catholic Action magam hpe gun hpai wa sai ni yawng hpe chyeju dum ai lam tsun let Wa Sarabyin, shi a mungga hpe ginchyum dat da ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-11/pope-francis-message-catholic-action-30th-anniversary.html