Wa Sarabyin John Paul I gaw Karai Kasang A Myusha Ni Hpe Daw Jau Ai Wa Kaja Re

September 3, bat kru ya shani, Wa Sarabyin John Paul I a labau kadun, Vatican Shiga Dap kaw nna ndau da ma ai.

"Anu gaw gaw ngai Jau tai wa na matu galoi n tsun lai wa yu ai. Raitim, shi gaw grai myit kaja ai wa re, Karai Kasang hpe grai tsaw ra ai wa re. Karai Kasang ngai hpe shaga la ai shaloi kaw nna ngai mung ndai lam hta dingyang hkawm sa wa ai.." nga nna Wa Sarabyin John Paul tsun dan lai wa ai.

Ndai shaga la ai nsen galoi mung n shut ai. Kam sham ai masha law law wa dai hpe dum chye nga dingyang rai nga ai.

Sarabyin prat nhtoi 34 ya sha nga lai wa ai Sarabyin John Paul I a prat hpe ya shi hpe "A Lu Ai Masha" tang na Wa Sarabyin Francis hkum nan mu chye lai wa yu ai rai nga ai.

Wa Sarabyin a mying majing gaw Albino Luciani rai nga ai. Italy mungdan, Vittorio Veneto Saradaw Ginwang kata na Santa Maria del Piave Jau Ginwang na Nawku Jawng kaw, 1968 June 29 ya shani, Don Giuseppe Nadal hpe Jau aya hkam ya lai wa yu ai wa rai nga ai.

Ya asak 79 rai sai Wa Jau Giuseppe Nadal gaw Italy, Pieve di Soligo Jau Ginwang hta ginwang up magam gun hpai nga ai.

"Nkau kanu ni hta Jau ni a myit masin rawng ma ai rai nna, shanhte a kasha ni hpe dai myit masin hpe jaw bang ya ma ai," nga nna Wa Sarabyin John Paul I, Saradaw prat naw rai nga ai aten hta French shi laika ka sara langai hpe tsun dan lai wa yu ai.

Shi a kanu, Bortola Tancon a makam masham hpe mung sakse hkam lai wa ai. Kanu gaw shi hpe Jau prat hta hkawm sa lu shangun ai makam jaw bang da ya ai nga nna sakse hkam da ai.

"Ngai a matu gaw kaga lam n nga ai; Karai Kasang gaw kun dinghku ngu ai nta masha ni hpe jai lang let ngai hpe Jau shatai ya ai re ngu hkam la myit la ai," nga nna matut sakse hkam da ai.

Kaga masha ni hpe dau jau ai Jau Ni

Jau ni gaw kaga masha (hpu nau) ni hpe daw jau ai Karai Kasang a shangun ma ni rai nga ai. Karai Kasang gaw Jau ningnan ni hpe garum ya na ra ai, lam woi ya na ra ai. Ndai gaw Saradaw Luciani Jau ni hte Karai Kasang a lapran na myit mada lam kaba langai rai nga ai. Nawku dau jau magam woi awn ai gaw daw jau ai lam rai nga ai, Karai Kasang a shangun ma tai ai rai nga ai; Karai Kasang hte shi a myusha ni hpe daw jau ai ni rai nga ai; hpu nau nau na (kaga masha) ni hpe daw jau ai Jau gaw Jau kaja re, kaja ai Jau re; lama na shi hkum shi daw jau ai rai yang gaw, dai gaw shi galaw ang ai bungli n re, shara shut taw sai rai nga ai, nga nna mung Saradaw Luciani sharin shaga lai wa yu ai.

Chyoi pra sanseng ai Jau ngu ai gaw muk (lusha) zawn rai nga ai; Jau gaw shi hkum hpe masha ni a lusha shatai ra ai; masha ni sha lu na matu hkyen da ra ai, nga nna Saradaw Luciani tsun lai wa ai hpe "A Lu Ai Masha" shatai hkrum na myit mada shara nga ai Don Francesco Mottola mung ka da nga ai.

Jau gaw masha ni a matu aten shagu jin jin rai nga ra ai; Jau, shi a kun dinghku masha ni hpe kau da ai a yaw shada ai gaw hpu nau kun dinghku masha law law a matu jin jin rai nga na matu re, nga nna mung tsun shang lang da ai.

Shi a mungga hta, Jau Ni hkungran dinghku de lam n nga ai hte seng nna sang lang da ai. "Nkau myit tsun chye ma ai: Jau ni dinghku n de ai, Nawku Hpung gaw hkungran dinghku de ai hpe manu n shadan ai majaw re, Nawku Hpung gaw hkungran dinghku de ai hpe chyoi pra ai san seng ai manu dan ai lam re ai hpe n hkap la ai majaw re nga ma ai. Dai shanhte tsun ai gaw n jaw n teng ai, shut ai."

"Anhte gaw ndai hku sumru ga ai: kun dinghku gaw san seng chyoi pra ai, manu dan ai, hkithkam ai lam re, Dai majaw kun dinghku langai a kawa gaw dai shi a lit magam hpe gun hpai ra ai, ma ni hpe hpaji shapan shalat na, bau kaba na; dai lam ni yawng a matu ga sadi hkam la nna, dam lada kaba ai kun dinghku langai a matu ga sadi jaw ga sadi dung let galaw gun hpai sa wa na matu Jau prat hku lit hkam la ai rai nga ai."

"Dai majaw, Jau gaw yawng hpe daw jau ai wa, yawng a shangun sape rai nga ai. Ndai gaw shi a laklai ahkyak ai lit magam bungli rai nga ai. Shi la da ai shara dai gaw dau jau na matu la da ai shara rai nga ai. Anhte hta kaja ai Jau nga jang, shanhte ni kabu pyaw ai, kaja wa teng sha kabu pyaw lu ma ai."

Sagurem magam gun prat hte Sakramentu chyeju kumla daw jau magam, grau nna mara raw sakramentu chyeju kumla dau jau ai hta, Jau gaw si mani ra ai, myit mai ra ai, masha ni hpe atsawm akaw alaw tsun shaga ra ai, kasi tai ra ai. Jau ni hpe galoi mung tsun ai; tsaw ra ai hpu nau ni e, masha ni hpe atsawm sha tsun shaga ra ai, kaja ai lailen madun ra ai. Dai hku rai jang, masha ni hpe kaja ai hku daw jau ai ni tai ai; masha ni a matu tinang hkum hpe ap da ai hte sha n ngut ai, si mani tsawm htap ai lailen hte tsun shaga ra ai, n hkru ai ni hpe pyi dai hku galaw ra ai," ngu Wa Saradaw Albino Luciani shadum jahprang lai wa ai.

Jau tai ai ni law wa na matu yaw shada myit kaba hte akyu hpyi ai gaw mungkan masha ni a teng man daw jau ai ni rai nga ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-09/pope-john-paul-i-servant-people.html