Wa Sarabyin: Jau Tai Jawng Ma, Brother Ni Gaw “Hpu Nau Ni A Matu Jin Jin Rai Nga Ra Ai” Ngu Shadum N-gun Jaw Da

Italy Mungdan kata na Jau Tai Jawng Ma, Brother ni hte shanhte a sharin sara (formators) ni hpe n-gun jaw mungga tsun ai hta Jau Tai Dakkasu Jawng gaw Nazareth na kun dinghku masha ni hte shabung shingdaw da ai.

“Brother Ni Gaw Hpu Nau Ni A Matu Jin Jin Rai Nga Ra Ai; Jau gaw Sara wa a lagaw hkang ni kaw htep lahti hkan nang ai wa rai ra ai; shi a shawng lam hkaja jahtuk shatsawm la lam hpe Jau Tai Dakkasu Jawng kaw hpang wa ai,” ngu mung Wa Sarabyin Francis ga hpaw mungga hta tsun da ai.

Sharin Sara Ni Hpang De

Wa Sarabyin Francis shawng ningnan sharin shara ni hpe shadum n-gun jaw mungga hpe tsun ai hta, Jau Tai Jawng Ma, Brother ni gaw shanhte a sharin sara ni sharin shaga ai lam ni hpe hkam la ai ngu ai hta sharin sara ni a lailen sat lawat nga sat nga sa ai prat kaw nna sharin hkam la lu mu ga; dai gaw Nazareth mare hta Ma Yesu Shi a kawa Yawsep a jawng kaw sharin hkam la ai zawn rai nga ai, ngu tsun shadum da ai.

Shanhte gaw sharin sara ni a madat mara (obedience) ai kaw nna si mani ai lam(docility)ni, rip kawp tara ni hte aten chyarang ni hpe hkan sa lu mu ga; ahkye aten ni hpe ap nawng da ai (dedication) kaw nna marai rawng ai lam (industriousness) hpe sharin la lu mu ga; shanhte a sari kaba ai (sobriety)  lu lai sha sha lai lam hpe koi yen ai hte masha ni a matu jin jin rai nga ai lam ni (availability) kaw nna matsan mayan ni hpe shawang tsawra myit hte garum shingtau chye ai myit hpe sharin hkam la lu mu ga; shanhte a nga sat nga sa lam hte shinggyim hkum shan sai ra marit ai lam hpe koi yen ai lam ni (chaste affection) kaw nna kawa prat hpe sharin hkam la lu mu ga, ngu shadum n-gun jaw da ai.

Jau Tai Jawng Ma, Brother Ni Hpang De

Wa Sarabyin Francis, Jau Tai Jawng Ma Brother ni hpe mung shadum ga ni tsun da nga ai. Yawsep gaw ma prat, ram prat hta raitim, myit su kung hpan wa na matu shi hkum hpe dingman dinghpring lam hta htep lahti hkawm sa ai wa rai nga ai. Jau tai jawng ma Brother ni mung Nazareth na nta kaw zawn Kawa Karai Kasang a kasha hte maren nu wa ni kaw nna shinggyim nga sat nga sa lam ni hpe atsawm sha sharin la nna nga pra chye ra ai; tinang a lit magam hpe tinang hkum daw dan chye ra ai, ngu tsun shadum da ai.

Jau Tai Jawng gaw Jau Tai Jawng Ma Brother ni hpe Karai Kasang hte grau ni htep shangun ai shara rai nga ai. Jawng wang kata hta rawng ai ngu ai gaw salum hpe Karai a masin salum hta sharawng da ai zawn rai nga ra ai; Mungkan hte seng ai n kaja ai lam ni kaw nna koi yen da lu na matu mung rai nga ai ngu Wa Sarabyin jau tai jawng ma Brother ni hpe n gun jaw da nga ai.

Formation hta ahkyak ai lam mali

1/ Shinggyim lam (human)

2/ Wenyi lam (spiritual)

3/ Hpaji Hparat lam (interllectual)

4/ Hpung Woi Sasana lam (pastoral)

Shinggyim lam hte seng nna tinang hkum hpe dai shinggyim lam yan kaw nna tsan tsan de n mai tawn da ai. Tinang a shinggyim myit masa ni hpe seng ang ai lam matsun sharin sara ni hpe hpaw tsun dan ra ai; myit kraw kata hta hkam sha lam hte ntsa lam kyang lailen sat lawat ni hpe mung makoi magap da n mai ai. Dai lam ni hta shut shai taw ai rai yang tinang a sara ni e shading sharai ya na hpe hkam la lu na matu shanhte hpe tsun hpaw dan ra ai.

Wenyi lam yan hte seng nna mung akyu hpyi ai hta nawku hpung kawn masat da ai kawku daw jau lamang ni hpe hkan shatup ai, tinang tinghkrai akyu hpyi myit sumru ai lam ni hpe mung galaw ra ai.

Hpaji hparat lam hta htung lailen hte myit mang ai lam ni hta Karai Kasang ra sharawng ai hta sharin hka ja la lu na matu Wa Sarabyin Akyu hpyi da ya nga ai.

Hpung woi sasana magam hta mung masha ni hte hkrum shaga na matu gara shara de raitim pru hkawm sa gwi ra ai; Brother ni gaw Karai a sagu hpung masha ni hpe daw jau na Jau ni tai wa na rai ma ai majaw masha yawng a ana ni hpe, grau nna matsan jam jau yak hkrak hkrum nga ai ni hpe yu lakawn ya ra ai; dai zawn galaw ai gaw Karai kasang hpe Yes “mai sa” ngu htan ai hte maren sha re ai, ngu tsun shadum da nga ai.

Hpang jahtum n-gun jaw ai hta Jau tai jawng ma ni gaw sharin sara lu ai, shading sharai ya ai sara lu ai, wenyi lam woi sara ni lu ai re majaw shanhte hpe hkrum saga hpaji la hkan sa na gaw grai nan ahkyak ai ngu n-gun jaw shadum mungga mung tsun da ai lam Vatican shiga dap kaw nna ndau da ma ai.

By Fr. Patrick Gawmaw Hkawng Yae

https://www.vaticannews.va/en/pope/news/2021-06/pope-audience-seminarians-italy-marche-region.html