Wa Sarabyin: Jau Ni Hpe Tsun Ai, “Sagu Sama Hte Re Ai Sagu Rem Ni Tai Nga Mu”

Wa Sarabyin: Jau Ni Hpe Tsun Ai, “Sagu Sama Hte Re Ai Sagu Rem Ni Tai Nga Mu”

  June 7, bat langai ya shani, Roma kaw Nawku Hpung hte seng ai madang tsaw makam masham hpaji sharin hka ja nga ai French Jau hpung ni hte hkrum shaga ai ten, “Sagu sama hte re ai sagu rem ni tai nga na matu n-gun jaw da nga ai.

  Dai France mungdan na Jau marai 19 gaw Roma kaw nga ai San Louis Nawku Jawng a manam jarawp hta shanu nga let Nawku Hpung makam masham hpe sharin hka ja nga ai ni rai ma ai lam chye lu ai.

Sagu Sama

  Wa Sarabyin Francis hpe Sarabyin ningnan lata ngut ai hpang kade nna yang, 2013 March 28, chyoi pra ai sau shaman ai Misa Hkungga nawng jau ai shaloi na mungga hta mung “sagu hpung a sama hte sagu rem ai ni” ngu ai ga baw hte Wa Sarabyin Francis mungga htawn lai wa sai lam chye lu ai.

  Sasana magam gun jau ni gaw sak hkrung nga sa ai hta, shanhte a sagu hpung masha ni hte rau kabu mani lu ai hte hkrap ngu hprap ngoi lu ai ni tai ra ai; sagu hpung masha ni hte n-gup aga hte mung sat lawat lailen hte mung, hkum hkrang myit masin mahkra hte matut mahkai nga lu ra ai, ngu mung shadum n-gun jaw da ai.

  Karai Kasang a myu sha ni hte hka nna nga ai Jau prat gaw Kahtawlik Jau n re ai zawn, Hkristan masha mung n tai lu nga ai ngu nna mung shadum sadi jaw da nga ai. Jau ni gaw shanhte a myit masin hta Karai Kasaang hpe kam sham ai ni hpe madung bang da ra ai.

  Mungkan myit nyan hpaji madang hpe sha ra sharawng ai ni gaw Karai a Mungga hkaw tsun ai Jau n mai tai ai, shanhte a matu kam sham ai hpung masha madang sha tai na gaw grau htap htuk nga ai. Jau langai gaw Karai Kasang a myu sha ni a ka-ang e nga na matu Karai Kasang e lata la hkrum ai wa rai nga ai, ngu Wa Sarabyin Francis matut sang lang da nga ai.

Wuhpung Wuhpawng Hte Rau Nga Ai Prat

  Wuhpung wuhpawng hte rau nga ai prat hta, tinang shingtai nga mayu ai myit, tinang hkum hpe shagrau shatsaw chye ai myit, kaga masha ni hpe n gawn n sawn ai myit, yu kaji ai myit, n mu jahpai hpai ai myit ni nga wa chye ai; dai zawn re ai n kaja ai myit ni hpe la kau ra ai. Bai, wuhpung kaji ji re ai hpung hpaw hpawng ai lam, langai hkrai shingtai garan nga ai lam, kaga masha ni hpe mara tam dinglun ai lam, jahpoi asawng ai lam, tinang grau ai ngu myit ai lam ni n mai nga ai ngu mung Wa Sarabyin Francis shadum sadi jaw da nga ai.

  Masha ni a lam shatan nhkan galaw ai gaw hku hkau manau manang ni lapran tsun jahta chye ai akyang lailen langai rai nga ai; dai zawn galaw ai gaw kaga masha ni hpe hkra machyi shangun ai. Anhte ni dai zawn re ai n kaja ai akyang lailen ni yawng hpe tawn kau da nna Karai Kasang a matsan dum lama ai hpe madung da myit sumru tsun jahta hkat ra ga ai. Shada da hpe Karai Kasang a chyeju kumhpa hku galoi mung hkap la chye na hkat ra ga ai.

  Nau na myit jasat hte teng man ai lam hta si mani simsa ai hte, hku hkau kanawn mazum let shada hpawng de akyu hpyi nna wuhpung wuhpawng kaba hpe jawm gaw de sa wa ra ai.

  Wuhpung wuhpawng prat hte shada garan gachyan nna kabu pyaw let rau akyu hpyi hpawng de nga ra ai. Jau ngu ai gaw Karai Kasang a Kabu Gara Shiga a nhtoi tai nga ai ni re ai majaw Karai Kasang a nam chyim shi hta nga nga ra ai rai nna, dai nam chyim hpe masin salum kaw nna garan gachyan ya ai wa rai nga ra ai.

  Shanhte a wuhpung wuhpawng kata sa du ai ni yawng hpe Madu a Kabu Gara Shiga hte matut mahkai ya nna hka bra nga ai ni hpe nau na myit a sari manu hpe jaw bang ya let Karai Kasang a tsawra ai hte Shi a ni htep ai hpe hkam sha shangun lu ra ai.

San Yawsep

  Wa Sarabyin Francis gaw San Yawsep a prat hpe mung tsun dan let shi a kam sham myit kaba ai lam, si mani ai kawa re ai lam, Karai Kasang hpe ga sadi dung ai hte kam hpa myit kaba tawn da ai lam ni hpe kasi la hkan sa wa na matu mung n-gun jaw da nga ai. San Yawsep gaw anhte a hkrit tsang ai lam ni, n hkrum n tsup ai lam ni, hte gawng kya ai lam ni hpe Karai Kasang hta kam hpa ai a marang e shamat jahkoi kau lu ai lam mung madun da ya nga ai.

  Anhte a n hkrum n tsup ai lam ni gaw Karai Kasang hte matut mahkai hkrum matut na matu rai nga ai; shut kataw loi ai Jau gaw shi gawng kya ai lam ni hpe dum chye nna, dai lam ni hpe Karai Kasang kaw tsun dan ai rai yang, dai Jau gaw kaja dik ai hpe galaw sai rai nga ai. Ningtawng dum ai “supperman” Jau ni gaw hpang jahtum n kaja ai lam ni hta jahtum chye ma ai. Yawsep zawn sha yu maya prat hta si mani ai, shagrit shanem ai prat hpe hkap la let anhte a prat hpe daw jau magam hta ap nawng nga sa na matu shaga la hkrum saga ai.

Shangwi shapyaw let pyaw pyaw nga chye ra ai

  French Jau ni hpe n-gun jaw ai hta, Nawku Hpung hpe gaw gap ai ni ngu ai gaw sai rum hpu nau myit jasat hte kahkyin gumdin myit hte mungkan ga hpe daw jau ai hpe tsun ai rai nga ai. Shanhte gaw gwi ai myit hte shakut shaja nna shawng de matut hkawm sa na matu n mai hkrit taw nga ai. Dai gaw Hkristu hte rau Shi a sape ni zawn myit dik myit pyaw ai hte nawku hpung hte hpu nau ni hpe daw jau ai myit kaba rai nga ai.

  Ndai kabu pyaw lam gaw shangwi shapyaw ai kaw nna pru wa ai rai nga ai. Shangwi shapyaw n chye ai Jau gaw lama ma ra kadawn taw sai; lama ma gaw shut taw sai. Masha kaga ni mani hpa jahta yang shanhte hpe yu nna mani ha ha ai, tinang hkum tinang hpe yu nna mani ha ha ai, shanhte a shingna hpe yu nna pyi mani ha ha ai Jau ni gaw shangwi shapyaw chye ai lai sat lawat ni nga nga ma ai, ngu “Gaudete et Exultate” laika hpe madi let mung Wa Sarabyin Francis tsun da nga ai.

  Jau shatai ai hta namman sau chya ya ai hpe bai myit dum let dai gaw kabu pyaw lam hpe shabyin shangun ai sau mung rai nga ai ngu mung tsun da nga ai. Hkristu hta myit machyu jung nga ai rai yang kabu pyaw ai lam hpe lu la nna, masin salum hpe mung hkye la lu na rai nga ai. Jau prat a kabu pyaw lam gaw dai Jau ni sasana magam hta shanhte a sasana galaw ai aten hta ta tut hkrang shapyaw ai hta hkan na re ngu nna mung tsun dan da nga ai.

Chyeju dum myit 

  Jau kaji hpe mung Jau ni shada da chyeju dum shagrau hkat ai gaw Karai Kasang hpe chyeju dum ai lam rai nga ai ngu mung tsun da nga ai. “Jau ni dep hkap ai masat shadang ni, hkrat sum ai lam ni, n hkum n tsup gawng kya ai lam ni hta Karai Kasang a tsawra matsan dum yu lanu lahku ai hpe hkam la nna hkam hpa myit kaba hte gwi gwi hkawm sa lu ra ga ai ngu mung n-gun jaw da ai.

  Chyeju dum ai lam gaw galoi mung n-gun kaba ai laknak kaba rai nga ai; dai gaw anhte ni myit daw myit hten ai ten, shingtai hkam sha ai ten hte yak hkak jam jau hkrum ai aten ni hta myit mada lam kaba jaw ya ai, ngu Wa Sarabyin Francis shadum n-gun jaw da nga ai.

Source; Vatican News

By Fr. Patrick Gawmaw Hkawng Yae

#vaticannews

#rvakachinservice