Wa Sarabyin: Jau Dingla ni hte machyi ai Jau ni a kam sham myit hte sadi dung ai sakse matu chyeju dum ga tsun dat ai shiga

Italy mungdan, Lombardy hta asak aprat kaba sai jau dingla ni hte machyi ai ni a matu akyu hpyi ya ai hte magam rum jau ni a kahpu kanau masat dingsat ninghtoi hta alu atan jaw bang ya ai hte yu lakawn gawn lajang ai lam galaw ai hpung masha ni hpe Wa Sarabyin Francis chyeju dum mungga shaga ya ai lam chye lu ai.

Shaning 6 ning na sai ndai magam rum jau ni hte machyi ai ni a matu akyu hpyi ya ai hte garum ya ai ninghtoi masat ya ai Lombardy na Nawku hpung woi hpawng daju hpe mung chyeju dum ai lam Wa Sarabyin Francis matut tsun da ai.

“Grai nan tsawm htap ai lam rai sai,” ngu Wa Sarabyin shakawn da ai. Hkum hkrang hte hkam ja lam seng nna hkra machyi loi ai jau ni a matu myit sumru hkam sha lawm ai lam nga ai ngu mung matut tsun da ai.

Coronavirus hpe hkrit tsang ra nga aten hta, Shanhte nga ai shara hte n tsan ai, Caravaggio na Kanu Nu Maria Chyoi Pra shara de Saradaw ni hte rau ya na zawn jau dingla ni hte machyi makaw ai jau ni sa du akyu hpyi chyeju hkam la ma ai hpe kabu n gun lu ai hte arawng la ai lam mung tsun da ai.

Asak kaba sai jau dingla ni gaw hpung masha ni htep lahti yu garum ai hpe law law n hkam la lu masai. Aten ladaw gaw, sak kaba sai jau dingla ni hpe garum ya na re ngu myit mada ai lam; Hpung masha ni a htep lahti yu lakawn ai hpe tsawm htap ai hku hkam la lu na lam shi a shagun laika hta tsun da ai.

Chyum laika hta na Malihki laika 3:2 hta na, “shi gaw ja ai sabya zawn nhprang arai hpe shatsawm ai wan zawn rai na ra ai,” ngu ai ga si hte jau ni a prat hpe shakawn da ai. Karai Kasang gaw anhte hpe shi hpang de sharawt la let jasan jasen ya na ra ai. Yak hkak jam jau ai lam ni hpe anhte n hkrit ga ai; Karai Kasang gaw anhte hte rau wudang hpai garum ya nga ai, ngu mung matut n gun jaw da ai.

Shi a mungga jahtum hta, Wa Sarabyin Francis gaw, asak kung sai jau dingla ni hte machyi ai jau ni hpe Kanu Nu Maria hta ap da ya ai lam, coronavirus a majaw nnga mat sai jau ni hte bai gaw sharawt ai hta shakut shaja nga ai ni yawng a matu akyu hpyi ya ai lam Vatican shiga dap kaw nna ndau da ma ai. 

17 September 2020, 12:02

https://www.vaticannews.va/en/pope/news/2020-09/pope-francis-thanks-elderly-and-sick-priests-for-their-faithful.html