Wa Sarabyin: Jau Aya Hkam La Lu Ai Gaw “Daw Jau Na Lam A Kumhpa Re

April 25, Sagu Rem Wa Kaja laban shani, Roma Saradaw Ginwang kata a deacon marai (9) hpe Wa Sarabyin Francis hkum nan, San Peter Nawku Htingnu hta Jau shatai Misa Hkungga nawng jau let Jau shatai ya sai.

Jau aya hkam la ai ni gaw Wa Jau Georg Marius Bogdan, Wa Jau Salvatore Marco Montone, Wa Jau Manuel Secci, Wa Jau Diego Armando Barrera Parra, Wa Jau Salvatore Lucchesi, Wa Jau Giorgio de Iuri, Wa Jau Riccardo Cendamo, Wa Jau Samuel Piermarini, hte Wa Jau Mateus Henrique Ataide da Cruz ni rai ma ai.

Misa Hkungga na mungga hta “Aten shagu Hkristu hpe azi yu let sagu hpung masha ni hpe daw jau na matu n-gun jaw da nga ai. Shanhte a sasana magam gaw Madu Hkristu a magam rai nga ai sharin shaga ai lam (sharing sara/ Myihtoi), hkungga nawng jaw ai lam (Hkingjawng) hte yu reng makawp maga ai lam (hkawhkam) ni rai nga ai.

Jau ni gaw Saradaw ni a lagaw lata tai let sasana magam rau gun hpai ai ni rai nga ai. Jau hte seng ai magam bungli ni rai nga ai Karai Kasang a sagu hpung ni hpe daw jau na matu shaga la nna lata la hkrum ai ni rai nga ai.

Kabu Gara Shiga hpe hkaw tsun ai magam, Karai Kasang a sagu hpung masha ni hpe ru reng up hkang ai magam, Nawku Daw Jau magam ni, grau nna Madu Karai a hkungga nawng jau ai magam ni hpe galaw ai ni rai nga ai.

Jau tai wa ai gaw Hkristu hte grau bung wa na matu rai nga ai. Sagu rem ai magam hpe hkam la ai rai nga ai. Dai magam gaw daw jau ai magam rai nga ai. Shabri shabrai hte galaw ai magam lit n rai nga ai. Karai Kasang hte ni htep ai hku nga ra ai. Saradaw hte ni htep ai hku nga ra ai. Shada da ni hte ai hku nga ra ai. Karai Kasang a myu sha ni hte ni htep ai hku nga ra ai, ndai zawn masa hta  matsan dum tsawra myit hte si mani ai lam ni nga ra ai ngu Wa Sarabyin Francis shanhte hpe n-gun jaw shadum da ai.

“Aten shagu Hkristu hpe azi yu let sagu hpung masha ni hpe daw jau na matu n-gun jaw da nga ai. Shanhte a sasana magam gaw Madu Hkristu a magam rai nga ai sharin shaga ai lam (sharing sara/ Myihtoi), hkungga nawng jaw ai lam (Hkingjawng) hte yu reng makawp maga ai lam (hkawhkam) ni rai nga ai.

Mayak mahkak lam ni hpe mung hpaw malang dan ra ai. Mayak mahkak lam ni a lapran tinang a masin salum hpe n mai pat da ai. Mayak mahkak lam ni tsun dan ai ni a nsen hpe madat ya ra ai, shalan shabran lam matsun madun ya ra ai. Ndai zawn galaw ai gaw matsan dum tsaw ra ai magam galaw ai rai nga ai. Matsan dum tsawra myit rawng ai wa gaw mara dat ya lu ai. Matsun dum chye ga, mara dat hkyamsa ya chye ga, hpa majaw nga yang Karai Kasang hkum nan yawng hpe mara dat ya ai wa rai nga ai. Karai Kasang gaw mara dat hkyamsa ai lam galaw ai hta pu ba ai lam galoi mung n nga ai.

Arawng mala, gawng ba ai lam hte gumhpraw hte seng nna arawng mala rai dum ai lam ni n nga na matu mung Wa Sarabyin Francis shanhte hpe matut shadum sadi jaw da nga ai. “Satan gaw nanhte a gumhpraw sumpu ni hta du shang nna gunglau taw nga na ra ai, matsan mayan ai lam hpe hkan shatup nga mu; matsan mayan re ai lam gaw Karai kasang hta kam hpa kam shamat ai ni hta nga ai.

Wa Sarabyin hpang jahtum shi a mungga ginchyum dat hta Madu Yesu gaw sagu rem wa kaja rai nga ai, sagu rem ni hpe n-gun atsam jaw bang ya ai wa mung rai nga ai majaw Madu Yesu a sagu rem hkrunlam hta htep lahti hkan sa nga mu, hkrit tsang ai lam hkum nga mi, yawng gaw kaja ai lam tai wa na ra ai, ngu n-gun jaw da ai lam Vatican Shiga Dap kaw nna ndau da ma ai.

#vaticannews

#rvakachinservice

Source : Vatican News