Wa Sarabyin: Hti Htang Re Ai Lam Hpe Jaw Ang Htuk Manu Ai Hku Daw Dan Jahtuk Ai Gaw Mai Kaja Lam Galaw Ai Re

Pope Francis

 June 26, laban shani, San Peter Shawa Pa hta, Madu A Lamu Kasa Akyu Hpyi Ga tsun ten, Wa Sarabyin Francis, hpung shawa masha ni hpe “tinang maroi nni, masin nsi ai lam byin shangun ai hti htang re ai lam ni hpe hkrum ang ai raitim, pawt sindawng ai lam n nga let sha, jaw ang htuk manu ai hku daw dan jahtuk shatsawm la chye ai Madu Yesu a kasi hpe hkam la ga,” ngu hpung masha ni hpe sharin shaga n-gun jaw da nga ai.

Pranwan Ladaw 13 ngu na laban na chyum daw hpe lakap nna hkaw tsun da ai rai nga ai. Yesu Madu hte kasa ni Yerusalem de hkawm sa ai hkrum lam hta Samaritan masha ni a mare hpe laidi ra ai rai nna, dai mare hta manam shara n jaw, lusha n daw ma ai, n hkalum ma ai majaw kasa ni gaw wan shaga nna shanhte a mare hpe jahten kau na matu Yesu hpe ahkang hpyi ma ai raitim, Yesu Madu dai zawn galaw na ahkang n jaw ai; kaga mare de htawt hkawm manam ma ai.

Yuda masha ni hte Samaritan masha ni lapran shada n ju n dawng ma ai majaw dai zawn re ai mabyin ni gaw lai wa sai BC 500 ning daram aten kaw na hpang wa ai re lam chye lu ai.

Mayam prat kaw na bai htang wa ten hta Yuda masha ni Yerusalem Htingnu hpe bai gaw gap ai hta Samaritan masha ni hpe n shalawm la ma ai. Shanhte hpe yu kaji ma ai.

Dai majaw Samaritan masha ni gaw shanhte nga ai mare hte ni ai bum kaw Nawku Htingnu gaw gap nna dai shara kaw sha nawku ma ai.

Dai aten kaw nna Yuda myusha ni hte Samaritan myusha ni a lapran, shada dingbai dingna jaw, jahte tam ai lam grau grau kaba wa ai rai nga ai.

Yesu Madu gaw Yuda myusha re majaw Samaritan ni shi hpe n hkalum n daw jau ai rai nga ai.

Kaga ahkyak ai lam langai gaw, Yesu Madu Yerusalem de sa ai gaw Shi jahkum shatsup ra ai ahkyak dik lam langai nga ai; Yesu Madu gaw Yerusalem hta mung shi hpe ninghkap na ma ai, dai kaw nni nkri hkam ra na, hpang jahtum si hkam ra na hpe chye da ai.

Anhte a prat hta mung Yesu Madu a teng man sape ni tai mayu ai rai yang, Shi Madu zawn hti htang re ai lam ni hte hkrum ang ai aten ni hta teng man jaw ang htuk manu tsawm htap ai hku daw dan chye ra ai ngu Wa Sarabyin Francis shadum da ai.

Ning hkap ai ni hte hkrum ten ni hta Karai Kasang hpang de gayin sa chye ra ai.

San Luka Chyum laika hta, Yaku hte Yawhan gaw lamu na wan shaga shayu nna Samaritan mare hpe jahten kau na ahkang hpyi ma ai; Yesu Madu dai hku galaw na ahkang n jaw ai. Shanhte ni hpaji jaw hpyi shawn ai hpe Yesu Madu ninghkap ai; shanhte hpe mung daru sharin ai. Hpa majaw nga yang mungkan ga de Yesu gun sa ai gaw Kawa Karai Kasang a matsan dum lama ai tsaw ra myit rai nga ai.

Yaku hte Yawhan zawn anhte mung sindawng myit kaba ai ten nga chye ga ai. Anhte myit da ai hku n byin ai masa lam ni a majaw pawt sindawng mayu myit grai kaba chye ga ai. Anhte myit da ai masin mahkyen ni hte n htan shai ai grau kaja ai magam bungli hpe gale galaw mat ai ni hpe pyi pawt sindawng chye ga ai. Shinggyim myit masa rai nga ai.

Madu Yesu gaw anhte myit ai hte shai ai hku myit ai. Karai myit masa hte myit ai rai nga ai. Manghkang tsaw ai, yak grau ai madang kaw du taw ai shaloi raitim, myit hpe shazim la chye ai, hkam sharang ai, myit galu kaba ai hte kaja ai hpe galaw shakut ai. Aten galu yak hkak jam jau hkrum, nni nkri hkam ra ai raitim, dai hpe hkam sharang nna, n law htum kachyi mi share ai raitim mai kaja ai magam hpe galaw shakut ai.

Hti Htang Re Ai Lam Hpe Mai Kaja Lam Galaw Nna Tai Htang Ai Lam

Shada n ru n ra, n hpru n mai ai lam anhte a lapran hta byin ten ni hta, shada mara shagun jahprak jeyang ai lam galaw na malai, kaja ai magam hpe gale galaw sa wa ra ai. Myit ai hku n re ai, hti htang re ai, chye na shut ai lam ni hte hkrum katut ai ten hta, anhte ni Karai Kasang hpang de sit sa ga ai kun? Shi kaw na garum shingtau lam woi ya na hpe hpyi shawn yu ga ai kun? Myit machyi hkam sha ru lam ni hpe shalan shabran shatsawm jahtuk shaprai kau na matu shakut nga ga ai kun?

Kalang marang anhte gaw myi man lu matu sha tara ai hku kaja ai magam hpe galaw chye ga ai. Dai gaw, kaja wa nga yang, gawng kya ai, shinggyim hkam sha lam rai nna myit n galu byin shangun chye ai lam rai nga ai. Dai zawn re ai masa lam law malawng gaw kaman sha tai nga ai. Gawng ba rai dum myit grau kaba shangun wa chye ai hpe dum hprang ra ai.

Dai majaw Madu Yesu zawn rai nga hkra gaw Shi Madu hta nan sit shang garum hpyi shawn la ra ai. Rai yang she, Shi a lam woi matsun galaw dan ai hpe chye na hkawn hkrang let mai kaja ai lam ni hpe galaw sa wa lu na ga ai, ngu hpang jahtum ga hpumdin hku Wa Sarabyin Francis hkaw matsun da nga ai.

 

By Fr. Patrick Gawmaw Hkawng Yae

#vaticannews

#rvakachinservice

#popefrancis

https://www.vaticannews.va/en/pope/news/2022-06/pope-respond-to-opposition-with-firm-decision-to-do-good.html

 

Add new comment

1 + 7 =