Wa Sarabyin: Hpyi Hpun Ai Sawt Ai Masa Lam Gaw Nawku Hpung Ginlung Kahkying Gumding Na Hpe Dingbai Dingna Jaw Ai

August 25, bat 3 ya shani, Wa Sarabyin Francis, Hpung shawa masha ni hte hkrum shaga ten, Hkrang chyasi ladat gaw hpyi hpun ai sawt ai masa lam de woi shayawn ai rai nna, Nawku Hpung ginlung kahkyin gumding lam hpe mung jahkrit shama, dingbai dingna jaw nga ai, ngu tsun shadum sharin shaga da nga ai.

San Pawlu Galati Hpung masha ni hpang de shagun dat ai laika hpe matut sumru sang lang dan ai hta, hkrang chyasi ladat san san sha rai yang gaw tara upadi, tara masa lam hta sadi dung kangka hkan lang hkan sa ai hta dingbai dingna jaw hkrit tsang shangun nga ai ngu tsun sang lang da nga ai.

N Tara Ai, N Jaw N Ang Ai Garan Ginhka Lam

Yuda myu sha ni n re ai Gentile Hkristan ni a matu Karai Kasang hpe kam sham ai hta Yuda htung tara hpe nan nan hkan lang hkan sa ra ai ngu ai gaw n jaw n ang ai, Karai Kasang hpe kam sham ai lam hta Yuda htung tara hpe n hkan lang n hkan shatup ra ai, ngu San Petru hkum nan tsun jahpra dan da ai hpe mung Wa Sarabyin Francis bai tsun dan da ai.

Ndai sharin shaga ai hpe sumru yang, Karai Kasang gaw Shi hpe kam sham ai ni yawng hkan lang hkan sa ra ai tara ni hpe jaw da ai zaw, Mawshe tara hku nna Yuda myu sha ni a matu san san jaw da ai htung tara ni mung nga nga ai hpe ginhka la chye ra ga ai.

Raitim, anhte matut sumru dum shai ra ai gaw, San Petru hkum nan, Mawshe tara hpe hkan lang hkan shatup ai Yuda Hkristan ni a mara shagun dinglun na hpe hkrit tsang ai majaw, sadi maja ai hku nna, Gentile masha ni hte lusha rau sha na hpe gaw nyet kau lai wa yu ai rai nga ai.

Dai majaw San Pawlu gaw San Petru a hpyi hpun ai hypocrisy ladat lang ai gaw shawng na Hkristan wuhpung wuhpawng ni a labau hta n jaw n ang ai, n tara ai garan ginhka ai lam tai nga ai hpe San Pawlu mu mada hparan lai wa ai rai nga ai, ngu Wa Sarabyin Francis sumru sang lang da nga ai.

Ndai mabyin lam hpe bai sumru yu yang, Kam sham ai ni yawng a matu jaw da ai Karai Kasang hpe gaw Karai Kasang kam sham ai ni yawng gaw, n hprai ai sha, hkan lang hkan shatup ra ai hte Yuda myusha ni a matu Mawshe tawn da ai htung tara ni hpe hkung ga lara di ra ai, bai, mai kaja ai, tinang hpe mung akyu jaw ai, makau grupyin hpe mung akyu jaw ai rai yang gaw, mung masa lam hta hkan nna, hkan galaw mai ai hpe shadum ya ai; raitim hkan nan hkan lang hkan shatup ra ai ngu gaw n rai nga ai hpe Wa Sarabyin Francis sang lang jahpra dan da nga ai.

Teng Man Ai Lam Hpe Hkrit Ai Lam

Sawt ai hpyi hpun ai lam gaw teng man jaw ang ai lam hpe hkrit ai masa rai nga ai; tinang hkum nan rai nga ai hpe madun dan na malai hpyi hpun ai, jahpai hpai ai mahtang she rai nga ai; dai zawn re ai rai yang gaw, ganing re ai masa lam hta rai tim, teng man lam hpe asan sha tsun shapraw na atsam n lu byin shangun ai, nsa chyat chyat ai zawn yak shangun ai, ngu mung sang lang da ai.

Chyum Laika hta dingman dinghpring, san seng san pra ai masha (Num, La) ni gaw hpyi hpun, jahpai hpai na lam hpe koi yen ma ai kasi kamang law law rawng nga ai. Ndai lam hte seng nna, Chyum laika hta na, Myihtoi Maccabees a prat hta Eleazar gaw hpara sumla ni hta nat jaw ai shan hpe sha na matu nyet kau ai; dai shan hpe sha na malai shi a asak hpe pyi jaw kau, galai kau gwi ai mabyin hpe Wa Sarabyin madi madun da nga ai.

Ga Shaka Ningnan Chyum Laika hta mung, Madu Yesu gaw teng man dinghpring jahpai hpai ai hypocrites ni hpe akyang laban, n hkru ai masha ni hku mara shagun da ai hpe chyahkring hkring mu lu ga ai, ngu mung Wa Sarabyin Francis tsun da ai.

Nang Tsun Ai “Mai Sa” Ngu Ai Ga Gaw Kaja Wa Sha “Mai Sa” ngu ai rai u ga Hpyi hpun ai hypocrites ni gaw jahpai hpai ai ni, gum-aw sha ai ni, myiman tam ai ni, masu hkalem ai ni sha rai ma ai; hpa majaw nga yang shanhte gaw man magap “mask” hte shan hte a shan hte a myiman hpe magap da ma ai hte teng man ai myiman hpe madun dan na, teng man lam hta hkawm na, teng man lam hpe mu hkrum na atsam n nga ma ai, hkrit ma ai majaw rai nga ai. Dai majaw gaw shanhte ni teng man tsaw ra lam hpe n lu jaw ma ai. Dai zawn re ai masha ni mung masa lam hta makam masham la hta, bai kaga wuhpung wuhpawng ni hta rai tim n mai nga ai, ngu mung tsun shadum da nga ai.

Karai Kasang a mungga hpe bai sumru let “Mai Sa” shing n rai, “n mai ai” ngu asan sha tsun gwi ai hte ta tut hta mung dai hte maren rai nga u ga; rai yang gaw, dai anhte tsun ai ga ni gaw satan kaw na n rai sai; hpyi hpun jahpai hpai ai (hypocrites) gaw Nawku Hpung ginlum kahkying gumding lam hta dingbai dingna rai nga ai ngu tsun shadum sadi jaw let ginlum kahkying gumding lam a matu akyu hpyi ginchyum dat da ai.

Vatican Shiga Dap na shapoi da ai hpe RVA Jinghpaw Nsen Shapoi Dap kaw nna bai shapoi ya da ga ai.  

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-08/pope-hypocrisy-jeopardis...