Wa Sarabyin, Hpung Masha Ni Hpe Tinang Dum Nta Kaw Rosary Hti Na Matu N Gun Jaw Dat

online photo

Wa Sarabyin, Hpung Masha Ni Hpe Tinang Dum Nta Kaw Rosary Hti Na Matu N Gun Jaw Dat Ai Lam Shiga

Hpung masha ni hpang de Wa Sarabyin ka ai laika hta tinang dum nta kaw, grau nna May shata hta Rosary hti ga n gun jaw dat nga ai. 

Hkawnset Kanu Nu Maria hpe tsawra myit kaba tawn da ai Karai Kasang a kashu kasha ni gaw Rosary hti ai lam hta shakut shaja ma ai. San Marku a poi nhtoi, April 25 ya shani ka shapraw ai laika gaw May shata hta Kahtawlik Nawku Hpung masha ni shaning shagu May shata hta makam masham lam shakut shaja ai magam langai rai nga ai, Nu Maria hpe hkungga lara di, akyu hpyi htinglu htinglai ai lam rai nga ai, hpung masha ni jawm hpawng de let Rosary hti sumru ai lam hte seng ai rai nga ai.

Grau nna daining na ladaw hta mungdan shagu chyam bra nga ai ana zingli a majaw rau hpawng de nlu ai a majaw Rosary hti ai lam hpe tinang dum nta hta kun dinghku masha ni rau hpawng de let Rosary manman hti na matu matsun ai lam rai nga ai.

Dai majaw Wa Sarabyin gaw “Ndai May shata hta tinang dum nta hta nga nna, Nu Maria kaw Rosary hti let tsawm htap ai akyu hpyi ga ni hpe bai tam la nga ga” ngu tsun da nga ai. Wa Sarabyin tsun ai hta “Ndai zawn galaw na mahkrun lam gaw galoi mung yak ai lam n nga ai; internet kaw mung katsi la jai lang hkan hpyi lawm mai ai akyu hpyi ga ni law nga ai re” da.

Wa Sarabyin hkum nan mung kanu Nu Maria kaw akyu hpyi ai, akyu hpyi ga nnan lahkawng hpe ka lajang da ya nga ai. Dai hpe Rosary hti ngut maga kaw hti mai ai lam re lam chye lu ai. Shi hkum nan dai akyu hpyi ga hpe du na May shata tup hta “hpung masha ni hte myit hpawng” let arau hti sumru nga na re lam tsun hpaw da ai.

“Kanu Nu Maria a salum hte Madu Yesu a myi man hpe sung sung myit sumru ai gaw wenyi lam hta ngang kang ai kun dinghku masha ni zawn myit hpawng ai hta grau ngang kang wa nna, dai ni anhte hkrum sha nga ai tsim yam kaw na lawt lu na re” ngu nna Wa Sarabyin tsun da nga ai. Shi a laika jahtum hta Wa Sarabyin a ga sadi “grau nna tsim yam kaba hkrum sha nga ai ni a matu hte rau anhte ni yawng a matu akyu hpyi ya nga na nga tsun let, anhte hpe mung akyu hpyi nga na matu saw shaga da nga ai shi ga hpe Vatican shiga dap kawn ndau shana da nga ai..

Source; Vatican News

Add new comment

4 + 12 =