Wa Sarabyin: Hpu Nau Wa Hpe Tsaw Ra Ai Lam Shachyam Shabra Ga

August 19, bat manga ya shani, Wa Sarabyin Francis, shinggyim hpu nau wa hpe tsaw ra ai lam mungkan ting shachyam shabra ga; dai gaw shinggyim masha ni a lapran hku hkau kanawn mazum lam hpe shatsaw sharawt ai, shangang shakang ailam re, nga nna, (43) lang ngu na shinggyim hpu nau, nau na hpawng (43^rd Meeting of Friendship Among Peoples) hta shang lawm ai ni hpe mungga hte rau saw shaga dat nga ai.

Ndai hpawng de ai lamang hpe Rimini hta galaw ai rai nna, August 20 – 25 laman galaw ai re lam chye lu ai.

Ndai hkrum zup hpawng de ai zuphpawng hpe 1980 shaning kaw nna, dingdung Italy na Rimini mare kaba hta shaning shagu August shata laman galaw ai re lam chye lu ai.

2022 shaning a matu ga manoi ga baw ginlam gaw "A passion for the person" "shinggyim hpu nau, nau na wa a matu tsawra myit" ngu ai rai nga ai.

Anhte nga pra ai ndai aten ladaw gaw ga loi ai, garan ginhka loi ai, n ru n ra byin loi ai, hkra machyi loi ai aten ladaw rai nga ai.

Shinggyim wuhpung wuhpawng hpe yu dat yang, Hkristu gaw dai shinggyim masha ni hpe hkye hkrang la na n mai byin na re, shi a lata ladawn ya na grai yak na re, mara dat hkyam sa ya na yak na re, nga nna amyu myu myit la chye ma ai lam Wa Sarabyin Francis tsun shadum da ai.

Kap bra ana zingli tsin-yam, majan tsin-yam zawn re ai tsin-yam kaba ni hkrum sha nga ai aten ladaw ni hta shingtai hkam sha ai lam, madu da sutgan, sun wang lamu ga, kanu kawa, kashu kasha, hpu nau ni hpe kau da ra mat ai lam ni gaw myit n pyaw hpa, yawn hpa kaba rai nga ai.

Kabu Gara Shiga Chyum Laika hta na "Kaja ai Samaritan masha ga shadawn" hpe madi madun let tsin-yam hkrum jam jau hkawm ai ni hpe hkye la na, makawp maga na, shingbyi shara jaw na, garum shingtau ya na matu Wa Sarabyin hpyi shawn da nga ai.

Madu Yesu a ga shadawn hta na "kaja ai Samaritan masha" gaw masat jarit n tawn da ai tsawra myit, shadawn sharam da ai lam n nga ai tsawra myit, garan ginhka da lam n nga ai tsawra myit ni hte lam ntsa kaw damya hkrum nna hkala si wa maw ai wa hpe yu lakawn la ai lam rai nga ai.

Daining na ga manoi ga baw hte maren anhte ni mung "kaja ai Samaritan masha" zawn tsin-yam hkrum ra kadawn nga ai ni hpe yu lakawn garum shingtau la ra ga ai.

Sai rum nau na myit majing tsawra myit hte hkawm sa ai lam gaw lamu na summwi ni a ntsa yup mang shingran ni hpe ka matsing da ai lam n re ai. Lamu na wummwi ni a lapran myit mada ai mung n re ai. summwi ni a lapran hkawm sa ai lam mung n re ai.

Sai rum nau na myit majing rawng ai tsawra myit hpe anhte a wuhpung wuhpawng kata hta gaw gap sa wa ra ai.

Shinggyim masha shagu gaw tinghkrai shingtai nga n mai ai; tinghkrai shingtai nga nna sak hkrung n lu ai. Shinggyim wuhpawng kata kaga masha ni hte matut mahkai, mahkri shawn, hpu nau zawn nga pra na gaw grai ahkyak ai.

Kaja ai Samaritan masha zawn tinang hkam la lu ai chyeju ni hte ra kadawn ai hpu nau ni hpe garum shingtau ya ra ga ai.

Karai Kasang gaw anhte hpe asak jaw ya ai gaw Shi a asak hpe nan jaw bang ya ai rai nga ai. Anhte mung hpu nau, nau na ni a matu anhte hkum hpe ap nawng daw jau ra ai; dai gaw Karai Kasang hpe chyeju htang ai lam rai nga ai.

Shinggyim wuhpung wuhpawng kata sasana magam galaw ai gaw, shani shagu sak hkrung nga pra ai lam ni hpe, a-ga hte mung a-mu hte mung sakse hkam ai lam rai nga ai; dai gaw tsan gang nga ai hpe mahkrai hkrai ya ai, ra ahkyak yang ra ahkyak ai hku sharawng shara rai ga law shatup ra ai; shinggyim sak prat hta galaw ra ai sasana magam lam rai nga ai; Hkristu a nni nkri lam ni hpu nau ni hte shachyan ya, akyu jaw ya ai lam rai nga ai" (Evangelii Gaudium, 24).

Shinggyim masha shagu gaw mungkan mare (madang) hpu nau myit tawn da let Kabu Gara Shiga hte Hkristan wuhpung prat hpe gaw de sa wa nna sakse hkam apu asi ni pu si shangun ra ai, nga nna Wa Sarabyin Francis, Italy mungdan Ramini hta galaw ai (43) lang ngu na shinggyim hpu nau, nau na hpawng hta shang lawm ai ni hpe n-gun jaw da nga ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-08/pope-rimini-meeting-friendship-peoples-message-pietro-parolin.html