Wa Sarabyin: Hpu Nau Tsaw Ra Myit Sakse Tai Let Madu Yesu Hpe Shachyan Ndau Ya Ga

July 3, laban shani, San Peter Shawa Pa hta, Madu A Lamu Kasa Akyu Hpyi Ga tsun ten, Wa Sarabyin Francis, hpu nau shada tsaw ra hkungga manu shadan kasi kamang tai let Yesu Madu hpe sakse hkam ga, ngu Hkristan ni hpe n-gun jaw saw shaga da nga ai.
Dai shani hti ang ai Kabu Gara Shiga gaw, Madu Yesu shi a sape 72 hpe lahkawng yep yep rai shangun dat ai lam rai nga ai.
Karai Kasang a mungdan dum magang ra ai lam, Yesu Madu, shanhte hpe marai langai hpra n shangun dat ai sha, lahkawng hpra rai hpa na shangun dat ai rai, ngu ai hpe Wa Sarabyin sumru woi da ai.
“Sasana hkrunlam hta marai lahkawng hpra rai hkawm sa ai gaw akyu ara kaba grau ai, ngu Wa Sarabyin tsun sang lang da ai.
Sape lahkawng gaw laksan masha kaga ga raitim, shan hkaw tsun ai, galaw ai lam Madu Yesu a hkang da, matsun da ai lam hpe galaw shatup ai lam chyu rai nga ai.
Hkristu a lam hkaw tsun ai hta, shada hkungga manu shadan na lam, Madu Yesu hpe hkap hkalum la lu na matu tau nau shajing shachyip da na lam, sumsing mungdan du magang ra ai lam, myit malai lu na lam, ni chyu rai nga ai.
Galaw ai magam mung, machyi makaw, manggang kap ai ni, gaw ningja ni hpe shamai shatsai ya ai, Nat kap ai ni kaw na nat hpe gawk shapraw kau ai lam ni hkrai rai nga ai.
Yawng a matu Karai Kasang a ngwi pyaw simsa lam hpe gun sa ya ai ni hkrai rai nga ai.

By Fr. Patrick Gawmaw Hkawng Yae
#vaticannews
#rvakachinservice
https://www.vaticannews.va/en/pope/news/2022-07/pope-francis-angelus-pro...