Wa Sarabyin: Hkye Hkrang La Lam Gaw Kumhpa Rai Nga Ai Nga Nna Tsun Dat Nga Ai Shiga

 

October 10, laban shani, San Peter shawa pa hta, “Madu A Lamu Kasa Akyu Hpyi” ten, Wa Sarabyin Francis Hkristan prat gaw kumhpa langai rai nga ai, anhte a shakut shaja ai hta madung lu la ai n rai nga ai, anhte jahkrat da ai masing mung n rai nga ai, Karai Kasang a tsaw ra myi hte yu lakawn ai lam rai nga ai, Karai kasang a masing kaba she rai nga ai, ngu hkaw tsun da ai.

Dai laban shani na Kabu Gara Shiga hta na sut su ai ramma langai, sumsing mungdan madu lu na lam hte seng nna Yesu hpe san ai shaloi Yesu lam matsun ai hpe hkap la na matu Hkristan ni yawng hpe Wa Sarabyin Francis saw shaga da nga ai. Yesu a lam matsun gaw anhte a matu kumhpa kaba rai nga ai.

Chyum laika hta Yesu hpe san ai sut su ai ramma (Mk 10:22) gaw Yesu lam matsun ai hpe shi a sut gan hpe n kau da kam ai, n kam garan jaw ai a majaw hkap la hkan sa na n mai byin rai mat ai. Makam htung lai ni gaw Karai Kasang a sumsing mungdan madu lu na matu gade daram madang ahkrak ai, grau nna ahkyak ai gaw hpa rai nga ai hpe Yesu Madu tsun da ai. Dai gaw tinang madu lu gaw Karai Kasang kaw na rai nga ai. Dai chyeju kumhpa ni gaw ra kadawn ai ni hpe garum shingtau na matu rai nna, Yesu a hpang hkan nang na mung ra ahkyak ai lam rai nga ai.

Anhte gaw makam masham lam hta chyam dinglik yu ai hkrum na ga ai.

(1) Ngai a matu makam gaw hpa rai ta? Makam masham hpe lit magam langai hku n mai myit la ai. Hpa majaw nga yang hkye hkrang la lam gaw chyeju kumhpa she rai nga ai, lit magam n rai nga ai. Makam masham hte hkye hkrang la lam gaw shang lawt ai hte she lu la ai, ja sut gan hte mari la n mai ai, ngu Wa Sarabyin Francis sang lang da nga ai.

(2) Yesu Madu gaw dai sut su ai ramma wa, teng man Karai a myi man nsam hpe mu lu na matu garum ya ai. Chyum Laika hta, “Yesu Madu gaw shi hpe azi yu let tsaw ra matsan dum myit hte,” ngu ai ga si hpe sumru yu yang, makam masham gaw lit magam galaw shatup ai kaw nna n rai nga ai, tsaw ra myit hte yu let hkap la ai kaw nna she rai nga ai.  Dai zawn galaw ai a marang e she, Hkristan prat gaw tsawm htap wa ai. Ndai gaw anhte a atsam hta madung daju ai n rai nga ai, anhte a masin hta mung ru pawt madung daju ai n rai nga ai. Raitim, Karai Kasang anhte hpe tsaw ra myit hte yu lakawn ai kaw nna lu la ai she rai nga ai, ngu Wa Sarabyin Francis sang lang da ai.

(3) Anthe a Hkristan prat gaw tsaw ra myit hte “mai sa” ngu Karai Kasang hkang da ai hpe hkap la ai kaw nna lu la ai makam masham rai nga ai. Makam masham gaw anhte ni hpu nau ni hpe shawang tsaw ra myit hte daw jau ai, garum ya ai kaw nna she rai nga ai.

Daw jau ai lam n nga ai, jaw ai lam n nga ai makam gaw hpang jahtum hta anhte sha myit n pyaw lam hpe lu la shangun chye ga ai.

Ngai a makam gaw hpa rai ta? Makam masham htung lai hpe sha hkan shatup ai makam kun?  Yesu tsaw ra ai makam masham rai nga ai kun? Shang lawt ai myit hte Karai Kasang hpe tsaw ra daw jau ai makam rai nga ai kun? Anhte hkum hpe anhte bai san jep la ga, ngu Wa Sarabyin Francis saw shaga da nga ai.

Nu Maria zawn, “mai sa” ngu Karai Kasang hkang da ai hpe hkap la nga ga. “Mai sa” ngu tsun nna “rai ti mung” ngu ai hpe bai n bang jat la ga. Karai Kasang a hkye hkrang la lam gaw anhte a prat hta kumhpa kaba rai nga u ga, ngu hpang jahtum mungga ginchyum dat ga hpe Wa Sarabyin Francis tsun da nga ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-10/pope-angelus-catechesis-christian-faith-gift.html

 

Add new comment

6 + 8 =