Wa Sarabyin: Hkrit Tsang N Ra Ai, Sadi Maja Na Gaw Nga Mu!

image from Vatican website

August 7, laban shani, Madu A Lamu Kasa Akyu Hpyi Ga tsun ten, Wa Sarabyin Francis, "hkum hkrit tsang nga mu; rai ti mung, aten shagu sadi maja nna jin jing rai nga mu, nga nna hpung shawa masha ni hpe shadum da nga ai.

Karai Kasang hpe, hpu nau ni hpe, nau na ni hpe daw jau let nga mu; Madu Yesu gaw shi a kasa ni hpe hkum hkrit tsang nga na matu shadum ai hte aten shagu jin jin rai nga na matu sadi jaw da ai hpe Wa Sarabyin Francis bai tsun shadum ya ai rai nga ai.

Hkum Hkrit Tsang Nga Mu

Yesu Madu gaw, Karai Kasang a tsawra myit kaba ai lam hpe tsun ngu shana ngut ai hpang, kasa ni a prat hpe Karai Kasang a lata hta ap na na matu tsun ai.

Anhte gaw, hkrat sum na, kadai n tsaw ra mat na hpe myit tsang, myit kahpra, hkrit kajawng nna tinang hkum hpe pyi n kam rai wa chye ga ai. Shaloi, tinang hkum shimlam a matu madung myit wa nna sut rai ni hpe madung da sumru chye wa ai; dai gaw tinang shimlam a matu shut shai ai sumru lam rai wa ai.

Yesu Madu gaw, anhte hpe, Kawa Karai Kasang hpe kam hpa kam sham nga na matu shadum ya nga ai. Shi gaw anhte kaja wa ra kadawn ai lam ni hpe teng sha jaw ya na ra ai. Kawa Karai Kasang gaw, anhte a matu, Shi a Kasha shingtai hte sumsing mungdan hpe jaw da ya sai re. Shi gaw anhte hpe manang tai ya let rau nga nga na ra ai. Anhte hpe shani shagu makawp maga ya na ra ai.

Zet, Ja, Zeng rai nna sadi maja nga mu!

Karai Kasang gaw anhte hpe aten shagu yu nga ai. Anhte n yup shamwi mat mu; lagawn lamawn nna asum hkum jaw mu; galoi mung, zet, ja, zeng rai sadi maja nga mu.

Tsawra myit lu la na dai hku rai nga ra ai; ra kadawn ai ni hte hpu nau ni hpe madat hkam sha lawm ya ra ai, shanhte hpe hkap la ra ai.

Jin Jin Rai Nga Mu!

Aten htuk ai shaloi raitim, n htuk ai shaloi raitim, Hkristan hpaji byeng-ya rawng ai wa langai zawn, ja ja rai nga nna jin jing rai nga mu. Yesu Madu gaw ndai zawn rai nga na matu, Shi a ga shadawn ni hte, anhte hpe shadum ya nga ai.

Anhte gaw galoi mung myit hprang nga ra ai. Myit bra ai lam hkum shabyin; myit bra mat yang mung dum hprang nna myit n bra hkra bai galaw la ra ai. Myit yup jang bai jahprang la ra ai. Lagawn myit mung hkum nga mu. Hpa majaw nga yang Karai Kasang gaw anhte n shadu da ai ten kaw du sa na ra ai.

Anhte hkam la lu ai makam masham, kun dinghku, hku hkau lam, wuhpung wuhpawng ni hte seng nna sumru dinglik jahtuk sa wa ra ai.

Karai Kasang kaw na hkam la lu ai chyeju sutgan ni a matu myit dik ai lam nga ai kun, shing n rai, hpu nau ni a matu n myit ai kun, anhte hkum hpe anhte bai nhtang sumru dinglik jahtuk la ra ai.

"Hkrit tsang ai lam n nga ai sha hkawm sa wa ga; Karai Kasang gaw anhte hte rau nga nna manang tai ya nga ai; Karai Kasang lai sa wa ai shaloi, anhte yup shamwi nga ai n tai u ga, galoi mung hprang maja nga ga, ngu Wa Sarabyin Francis, Madu a Lamu Kasa Akyu Hpyi Ga tsun ten mungga hkaw tsun da nga ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-08/pope-at-angelus-fear-not-but-be-vigilant.html

 

Add new comment

2 + 8 =