Wa Sarabyin: Hkristu Madu Daini Na Nhtoi Ni Hta Mung Sak Hkrung Nga Let Ningnan Tai Nga Na Matu Anhte Hpe Garum Ya Nga Ai

Chyoi Pra ai Kru ya shana na “Madu Yesu bai hkrung rawt ai” Paska Misa hkungga (Easter Vigil Mass) hpe San Peter Nawku Htingnu hta sha, Wa Sarabyin Francis hkum nan woi awn nawng jau lai wa ai.

2021 shaning na Chyoi Pra ai Kru ya gaw Wa Sarabyin Francis a matu Sarabyin tai ai hpang Chyoi Pra ai Kru ya shana na Easter Vigil Misa Hkungga nawng jau ai lam jahku (9) lang ngu na nawng jau ai shana rai nga ai.

Dai shana na mungga hta, Wa Sarabyin gaw Madu Yesu Shawng de ga sadi tawn tsun da sai hte maren bai hkrung rawt ai hpang mung Shi a Kasa ni hpe Galilee kaw hkrum na lam bai kahtap tsun wa ai hpe madung da sumru woi da nga ai.

Ya na zawn chyam bra ana zingli hte kaga ana zingli hkrum sha nga ai shinggyim masha ni a matu nsin kata hkawm nga ai ahkying aten zawn rai nga ai. Hkristan masha ni gaw Madu Yesu bai hkrung rawt ai Paska mungsung a kabu gara shiga hpe salum hta bang gun da ra ga ai. Lamu Kasa gaw hkum hkrit mu, Galile hta Madu hte mu hkrum na matu dai de sa la taw na matu num htep ga tsun da ai. Dai shara hta shanhte a myit mada shara hpe jahpring ya ai hkrum na rai ma ai.

“Hkum hkrit mu” ngu ai ga hpe na lu ai gaw mau kaba hpa rai nga ai. Wudang hta jan sat hkrum sai Nazareth na Yesu hpe nanhte tam nga mi dai! Shi hkrung rawt sai; Shi ya Galile de sa wa sai; Nanhte shi hpe dai shara hta hkrum na rai mi dai, ngu chyum laika hta rawng ai hpe Wa Sarabyin bai tsun dan da ai.

Ningnan Bai Hpang Na Matu Galoi Mung Galaw Mai Nga Ai

Galile gaw Yesu Madu bai hkrung rawt ai hpang Kasa ni hte shawng ningnan hkrum ai labau shang shara tai wa sai. Dai shara gaw Yesu Madu sak naw hkrung ten Kasa ni hte Shawa masha ni mau hpa lamik kumla mu la lu ai hte Kabu Gara Shiga hkaw tsun ai hpe na la lu ai shara mung rai nga ai. Dai shara gaw Yesu Madu wudang hta jan noi si hkrum na lam tsun dan ai hpe n chye na ai majaw Shi hpe kau da nna hprawng mat ai shara mung rai nga ai.

Labau hta shanhte hpang lai wa sai dai Galile hta sha ningnan bai hpang na matu Yesu Madu shanhte hpe saw shaga ai. Lachyum gaw anhte hkrat sum mat sai shara hta sha, Madu Karai a htum ngu n nga ai tsaw ra myit hte ningnan bai hpang na matu shaga ai rai nga ai.

Galilee de bai htang sa ai ngu ai gaw anhte a hkrat sum ai lam mahkra hpe ningnan bai hpang shangun na matu tsun da ai rai nga ai. Ya na chyam bra ana tsin-yam ni a lapran shinggyim masha ni yawng gaw Karai Kasang lajang da ya ai myit mada shara ningnan hta hkawm sa ra ga ai. Dai gaw Hkrung rawt sai Madu a saw shaga ai nsen hpe madat hkam la nna mat mat sai myit mada shara hpe ningnan bai hpang na matu rai nga ai.

Yesu Madu Gaw Anhte A Makam Masham Hpe Sak Jaw Bang Ya Nna Mau Hpa Lam Jaw Ya Nga Ai

 Galilee de sa ai ngu ai gaw lup sung kata kaw na pru let lam ningnan ni hta hkawm sa ai ngu lachyum rawng nga ai.

Masha law malawng a makam masham hpe akyang lailen ni hte shachyaw la ai ngu hkam la chye ma ai: lai sai prat na mabyin ni, ma prat na myit dum hpa lam ni hte shangang shakang da ai ngu hkam la chye ma ai. raitim, dai ram madang hte sha lu da ai makam gaw anhte hpe makam hta matut hkawm sa na lam n byin shangun ai; ndai lam ni gaw prat hta hkan nna shadut shangang shakang ya ai makam ni hpe n jaw ya ai.

Maga mi hku bai sumru ga nga yang Galilee de bai sa shangun ai gaw shawng de hkawm lai wa sai lam hta bai hkawm let makam masham hpe sak bai jahkrung na matu rai nga ai. Tsun mayu ai gaw anhte a lai sai prat hpe bai nhtang sumru let mung dingman dinghpring ai hku bai hkawm sa na matu rai nga ai. Karai Kasang a lam hta hkawm sa na matu saw shaga ai rai nga ai. Karai Kasang gaw anhte a ma prat na myit dum lam ni hpe la kau ya na gaw n rai nga ai. Raitim, dai hpe sak jahkrung ya let mauhpa ni hte jahpring shatsup ya na matu rai nga ai. Si ai kaw na bai hkrung rawt sai Yesu Madu gaw anhte hpe mauhpa lam madun ai hpe galoi mung jahkring kau na n re ai.

Makam masham ngu ai gaw lai sai ten na lam ni hpe bai myit dum shangun ai sumla sumpu “album” n re ai. Yesu Madu anhte a makau e shani shagu rau hkawm rau nga nga ai. Anhte hkrum ang ai ru yak jam jau lam ni hpe hkam sharang lu na matu, sung dik htum myit mada shara rai nga ai anhte a yup mang shingran ni hpe jahkum shatsup ya na matu anhte hte rau nga nga ai. Anhte yawng hkrat sum mat sai ngu myit la ai aten hta pyi Yesu Madu anhte hta ningnan re ai mauhpa chyeju ni hpe jaw ya let kabu pyaw shangun na ra ai.

Galilee Gaw Mungkan Hta N Ahkyak Ai Shara Ni Hta Na Langai Rai Nga Ai

Galilee de sa ai ngu ai gaw mungkan hta mying n dan hkrung ai, n ahkyak ai shara de sa ai ngu ai lachyum mung rai nga ai. Yerusalem gaw Yuda masha ni e san seng chyoi pra ai shara ngu masat da ai shara, nawku daw jau lamang ni galaw ai shara rai nga ai. Galilee gaw Yerusalem hte grai tsan dik ai shara kaw nga ai rai nga ai. Dai Galilee hta Madu Yesu a Sasana magam hpang ai shara rai nga ai.  Dai shara gaw shani shanang sak hkrung lam a matu yak yak hkak hkak shakut taw nga ai matsan mayan ni, kabai da hkrum ai ni hpe Shi a Kabu Gara Shiga gun sa ya ai shara rai nga ai.

Karai Kasang gaw dai zawn re ai jut shara ni hta mat mat ai masha ni hte myit ru myit tsang hkrum nga ai masha ni hpe pu ba ai lam n nga ai sha hkan tam nga ai.

Dai majaw bai hkrung rawt sai Yesu Madu, Shi a Sape ni hpe dai shara de sa na matu hkang dat ai rai nga ai. Shi mung dai shara de bai sa ai ra nga ai. Kau da hkrum ai masha ni hte matsan mayan ni hpe daw jau na matu dai shara de Shi hte rau sa hkrum na matu saw shaga ai lam, Karai Kasang a mai kaja ai nhtoi shingkang gaw dai zawn re shara hta htoi tu nga shangun ai lam Wa Sarabyin Francis Chyoi Pra ai Kru ya shana na Paska Misa hta mungga htawn da ai hpe Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

Source : Vatican News