Wa Sarabyin Hkristu Hkawhkam Gaw Karai Kasang Anhte Hte Rau Rai Nga Ai Hpe Madun Dan Let Anhte Tatut Hkrang Shapraw Sa Wa Lu Na Matu Shadum Ya Nga Ai

image from Vatican website

November 20, Hkristu Hkawhkam Poi laban shani, Wa Sarabyin Francis, laban Missa Hkungga hpe Dingdung Italy, Asti Cahtedral Nawku Htingnu hta nawng jau let Hkristu Hkawhkam gaw Karai Kasang hte rau rai nga ai hpe madun dan ai, anhte mung dai hpe tatut hkrang shapyaw sa wa ra ai, nga nna mungga hkaw tsun da nga ai.

Hkristu Hkawhkam gaw, yawng mayawng a hkawhkam, masat shadang nga ai shinggyim masha ni a mahkrum madup hte sha sumru dep n lu ai hkrunlam galu hkawm ai wa, n ju n dawng ai hte kau da hkrum ai ngu ai prat hta shang nna mungkan ting hpe hkye la ai wa, tengman mabyin lam yan yawng hpe dagraw let nhtoi shingkang jaw ya ai wa rai nga ai.

Karai Kasang gaw shi a prat ting hpe anhte a matu ap nawng da ya ai; shi a hkum hpe ap nawng let Karai Kasang a nihtep tsawra myit hpe madun dan ai.

Anhte ndau ai Hkawhkam gaw Shi nan rai sai; Shi hpe anhte a prat matu hkawhkam hku hkap la ga ai rai yang kaja dik rai na ga ai, nga nna Wa Sarabyin shadum da ai.

Matsan jam jau hku, n hkum n tsup prat, gawng kya ai prat, machyi hkam sha yak ai prat, si hkrung si htan prat hpe shi dagraw la ai. Dai gaw wudang kumla sakse nan rai nga ai; anhte hpe tsaw ra ai kumla nan rai nga ai.

Karai Kasang a "tsawra" hpe hkam la ga

Madu Yesu a wudang hpe mada yu let Shi a lata ladawn hpaw malang da ai hpe mu la chye ra ga ai. Dai gaw anhte a matu rai nga ai. Anhte a masa lam gara hku mi rai rai, hkrat sum nga ga ai mi rai rai, shut kataw ga ai rai tim, Shi a tsaw ra myit hpe hkap la na matu anhte hpe saw shaga nga ai.

Myit malai lu ai damya wa zawn, tinang a shut hpyi mara hpe yin la, Karai Kasang hpe mung hpyi nem chye ga ai rai yang, Shi a tsaw ra myit hpe hkam la lu ai. "Dai ni jang nang ngai hte hparadisu kaw rau rai nga sai" ngu Madu anhte hpe mung tsun nga na re.

Makau kaw tsap let jawm yu nga ai ni hte mu la nna hkam sha lawm ai ni ngu ai wuhpung lahkawng hte seng nna Wa Sarabyin sang lang da ai.

Makau kaw tsap let jawm yu nga ai ni hta na masha law malawng gaw Wudang hta jan noi da hkrum ai Yesu hpe asawng asang tsun ma ai. "Na hkum hpe nang hkye la u". Hpyen la ni, ninghpaw ningla ni, myit malai n lu ai damya wa, ndai ni gaw Yesu hpe asawng asang di ma ai.

Makau kaw tsap yu let hkam sha lawm ai lam gaw kaja ai myit jasat rai ng ai. Shanhte gaw makau kaw tsap nna yu nga ai kaw sha n jahkring da ai. Tinang a myit masin hta na nan hkam sha lawm wa ai. Kaja ai damya wa a galai shai wa ai myit jasat nan anhte hpe sharin shaga nga ai. "Madu e, Na a mungdan hta ngai hpe mung myit dum la rit."

Kaja ai lam hta hkawm sa lu na matu Karai Kasang a mying hpe shaga let hpang mai ga ai. Myit malai ai damya zawn, shawng daw anhte ni shut hpyi mara galaw na ga ai, raitim, tinang shut hpyit mara hpe yin la nna Karai Kasang hpe kam hpa myit kam sham myit kaba tawn da ai myit hte galai shai wa ai.

Anhte hta dai zawn re ai kam hpa kam sham myit rawng ga ai kun? Sung la ai anhte a masin salum kaw nna hkam sha nna nan Madu hpang de sa ga ai kun? Karai kasang hta kam hpa kam sham myit hpring tup tawn da ra ga ai.

Hpu nau, nau na ni hpe mung, Karai Kasang hpe kam hpa kam sham lu mu ga, garum ya ra na ga ai. Hkristu hkawhkam hpe madu da ai n rai ga yang gaw, anhte ni mungkan ga nga pra ga ai raitim anhte hkum hpe anhte hkye l lu na n rai ga ai.

Karai Kasang a masat jarit n tawn da ai, htum ngu n nga ai tsaw ra myit hpe dai wudang hta jan noi si hkam ai Madu Hkristu a lata ladawn let hpaw malang da ai hpe azi yu let shi a chyeju hpe hkam la ga.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-11/pope-christ-the-king-embraces-us-calls-us-to-action.html

 

Add new comment

10 + 8 =