Wa Sarabyin: Hkristsan Sasana Gaw Prinem Lam Hpe Mungkan Ga de Gun Sa Ya Na Matu Rai Nga Ai

image from Vatican website

September 2, bat manga ya shani, (11) lang na Mungkan Hkristan Nawku Hpung Council Hpawng kaba (WCC) hta shang lawm ai ni hpe, Wa Sarabyin Francis, Hkristan Sasana gaw ndai mungkan ga de, prinem lam, marawng raw madat hkyamsa lam gun sa ya na matu rai nga ai, ngu tsun shana da nga ai.

Ndai hte seng nna Wa Sarabyin a mungga hpe, Message to the 11th Assembly of the World Christian of Churches  hta shang yu mai ai.

Wa Sarabyin shagun dat ai mungga hpe Kahtawlik Nawku Hpung a dakkasa/malai hku hpawng hta sa du lawm ai, Cardinal Kurt Koch, the Prefect for the Dicastery for Promoting Christian Unity, kawn hti shana ya lai wa ai rai nga ai.

Hkristan Nawku Hpung Council Hpawng Kaba (WCC) hpe 1901 shaning hta galaw hpang wa ai hpe myit dum ai lam, Wa Sarabyin shi a laika hta shalawm da ai rai nga ai.

Hkristan NawkuHpung Council Hpawng Kaba (WCC) ndai lang na hpawng de ai a ga baw ga manoi gaw "Christ's love moves the world to reconciliation and unity", Hkristu a tsawra myit gwa mungkan ga de mara dat ya nna prinem lam hte ginlun kahkyin gumdin lam shabyin ya ai, ngu ai rai nga ai.

Wa Sarabyin Francis, ndai ga manoi ga baw hpe madung da nna WCC hpe tsun shaga lai wa ai. Ndai ga baw ga manoi hte maren Hkristu gaw shinggyim masha ni hpe Karai Kasang hpang de woi ningshawng ya ai, shinggyim masha shada prinem htingram lam jaw ya ai, Madu Hkristu a marang e rai ga ai, nga nna sumru woi da ai.

Hkristan masha lapran hta prinem htingram lam, mara dat hkyamsa lam na gaw Nawku Hpung shagu a Sasana magam nan rai nga ai. "Ecumenism" Hkristan Nawku Hpungshada rau hpawng de akyu hpyi ai hte Sasana magam rau galaw gun hpai ai gaw galoi mung Hkristan ni a lapran matut mahkai ya nga ai, shada matut manoi nga ai lam hpe shadan shadawng ai rai nga ai.

"Reconciled diversity", n bung ai lam ni yawng hpe shada myit galu kaba, hkam sharang, chye na, hkap la let prinem ai lam lu la shangun ai hpawng kaba rai na hpe myit mada ai lam tsun shana let Wa Sarabyin Francis, shi a shagun mungga hpe ginchyum dat da ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-09/pope-mission-of-christians-is-to-bring-reconciliation-to-world.html

 

Add new comment

1 + 1 =