Wa Sarabyin: Hkristan Ni Gaw Karai Tsawra Myit Nhtoi Hpe Karan Kachyan Ra Ai 08 March 2023

Wa Sarabyin: Hkristan Ni Gaw Karai Tsawra Myit Nhtoi Hpe Karan Kachyan Ra Ai

March 5, (2) ngu Lusha Gam Ladaw laban shani, San Peter Shawa Pa hta,  "Madu A Lamu Kasa Akyu Hpyi Ga" tsun ten, Wa Sarabyin Francis, dai shani na Ja Chyum Mungga, "Madu Yesu Ahpraw Nsam Galai Ai Lam" hpe lakap nna tsawra myit a tsawm htap ai lam, dai gaw wudang masat kumla rai nga ai lam mungga hkaw tsun da ai.

Sanseng chyoi pra ai gaw Yesu a myiman nsam hta na nhtoi shingkang hte bu hpun da ai zawn anhte hpe mung bu hpun dagraw da ya lu ai.

Kasa Pettru, Yaku, hte Yawhan ni gaw Madu Yesu a ahpraw nsam galai ai lam hpe sakse hkam ma ai. Karai tsawra myit gaw Yesu Hkristu hta anga nga ai. Dai gaw Kawa hkrang bung sumla hpring tup rai nga ai, sumsing namchyim nan rai nga ai.

Yesu Madu a Tsawra Myiman gaw kabu pyaw lam hpe jaw ya ai. Kasa ni gaw Yesu e galai shai ya ai lam hpe hkam la ma ai hte dai tsawra myinam hpe hkam la lu ma ai, hpu nau ni hpe madun dan let karan kachyan ya lu ma ai.

Petru gaw Madu a ahpraw nsam galai ai mahkrum madup hpe aten na hkra hkam sha mayu ai majaw ginsum masum: Mawshe a matu langai, Eliah a matu langai, Madu Yesu a matu langai gap na matu hpyi sawn ai. Rai ti mung, Madu Yesu dai hpe ahkang n jaw ai, Kawa Karai Kasang Shi hpe ap jaw da ai magam bungli shatup ai hkrunlam galu naw nga ai majaw rai nga ai; dai magam bungli n shatup lu na hpe Madu Yesu n ra sharawng ai.

“Madu Hkristu gaw nhtoi shingkang rai nga ai; dai gaw anhte a prat hta teng man sak prat hpe jaw ya na matu rai nga ai; Hkristu gaw shi hte rau Jerusalem de rau hkawm sa ai hkrunlam hta hkan hkan ai ni hpe n-gun atsam jaw bang ya ai; wudang hpai na matu hkawm sa ai hkrunlam rai nga ai."

Hkrunlam hta atsam marai dat hkawm sa ra ai lam, Kabu Gara Shiga Chyum Laika gaw anhte a hkrunlam hta lam matsun ya ai lam, anhte a hkrunlam hta Madu Yesu hpe mada yu let hkawm sa ra ai lam, Yesu Madu tsun ai lam yawng hpe chye na hkawn hkrang na n loi la ai lam, Wa Sarabyin Francis tsun sang lang da ai.

Tsawra myit madun let, dau jau let, mara dat ya let, sak prat hkrunlam hta sak hkung sa wa ra ai lam mung matsun da ai.

Karai Kasang a tsawra myit gaw anhte a sak hkrung prat hta atsam dat lu ai nhtoi tai ya nga ai. Anhte a salum myi hpe hpaw da nna kabu gara chyeju dum let lahkam nnan shagu hpe hpang sa wa ga, nga nna mung shadum da ai.

Kasha a nsin chyip re ai Karawari kawng hkrunlam hta kanu Nu Mria gaw shi a kasha hte rau rai nga ai zawn anhte hte mung tsawra myit kaba tawn da let rau rai nga ai.  Nu Maria gaw anhte a hkrumlam shagu hta tsawra myit kaba hte rau rai nga u ga, nga nna akyu hpyi let mungga hpe ginchyum dat da ai.

Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2023-03/pope-at-angelus-welcome-and-share-glorious-light-of-god-s-love.html