Wa Sarabyin: Hkristan Nawku Htung Hkrang Hte Akyu Hpyi Ga Ni Gaw Anhte Hpe Hkristu Hte Matut Ya Ai

Laban bat masum (3) ya shani, shawa masha ni hte hkrum shaga ten hta, Hkristan nawku htung hkrang hte akyu hpyi ai gaw Hkristu hte matut ya ai, jawm pawng shangun ya ai ngu Wa Sarabyin Francis sharin shaga da ai.

Apostolic Palace na library kaw nna shawa hpung masha ni hpe online live-streaming shapoi ai hta mungkan ting na kam sham ai hpung masha ni hpe ndau ya ai rai nga ai.

Nawku Hpung a nawku daw jau htung lailen hte maren nawku daw jau hkrang hte akyu hpyi ai hta Hkristu Madu anhte hte rau nga nga ai re.

Nawku daw jau hkrang hte akyu hpyi ai lam gaw labau hta yu dat yang prat shagu hta mungkan masha ni hpang de chyam bra wa ai hpe mu lu ai. Dai nawku daw jau hkrang hte akyu hpyi ai a marang e hpu nau ni Yesu hpe grau chye wa ai hte Nawku Hpung a lam hpe mung grau chye na wa shangun nga ai.

Nawku Hpung a nawku daw jau hkrang hte maren akyu hpyi nawku daw jau ai gaw, kaga poi shingra lamang ni hta shingbyi shanat ai lam n re ai sha makam masha hte maren nawku daw jau ai lam hpe grau jasan jaseng ya ai. Kaga poi shingra lamang n kau ni ngu tsun ai gaw akyu ara n nga ai hte dingbai dingna jaw lit kaba shangun ai lam ni hpe tsun ai rai nga ai.

Kahtawlik Nawku Hpung masha ni gaw prat hta hkan nna, Laban Misa Hkungga nawng jau ai hta lawm ma ai raitim, shanhte a wenyi lam hte seng ai hpe tinghkrai nawku akyu hpyi ai lam yan ni hku wenyi n gun hkam la nga ma ai.

Chyum Laika, Sakramentu ni, hte Nawku daw jau htung ni zawn re ai Hkristan akyu hpyi ga ni gaw makam masham hpe shapraw ai lam ni hkrai rai nga ai.

Hkristan prat hta ntsa lam mu mada ai shara ni hte arung arai ni hte sha gaw n hkrum tsup ai. Hpa majaw nga yang Hkristu gaw hkye hkrang lam lam madu re ai majaw rai nga ai.

Nawku Hpung kawn masat shagrin da ai nawku daw jau htung (liturgy) gaw anhte hpyi hpyi re hkum zup akyu hpyi ga hta grau akyu kaba ai. Ndai nawku daw jau htung gaw prat shagu na Hkristan ni a mahkrum madup hte akyu ara matu hkrang mashapraw da ai re. Akyu Hpyi ga ni mung dai hte maren rai nga ai. Dai nawku daw jau htung hte akyu hpyi ga tsun ai aten dai shara hta Hkristu hte nan hkrum shaga nga ai rai ga ai. Hkristu madu mung dai aten, dai shara hta anhte a nawku htung hte akyu hpyi ai hta anhte hte sa nga nna anhte hte shaga nga ai re.

Nawku Hpung e masat da ai “Sacramental signs” ngu ai Sakramental chyeju kumla ni hta Hkristu gaw Chyoi pra ai Wenyi a marang e shanu nga ai.

Nawku htung hte akyu hpyi lam ni n nga ai Hkristan gaw Hkristu n lawm ai Hkristan mying hte sha rai nga ai.

Dai majaw anhte ni Hkristu lawm ai Hkristan masha ni tai hkra gaw nawku htung hte akyu hpyi ai lam hta hkawm sa ra ga ai. Rai jang she Karai Kasang dai lam hku jaw da ai shi a akyu chyeju ni hpe anhte hkam la lu na ga ai.

Hkristan ni akyu hpyi nga ai akyu hpyi ga law law gaw Nawku Hpung kawn masat da ya ai nawku daw jau htung kaw nna n rai ma ai. Raitim, shanhte hpyi ai akyu hpyi ga ni gaw Hkristu Madu a lam sumru ai chyeju lu ai akyu hpyi ga ni gaw rai na ma ai. Hkristu gaw Sakramentu hkam la ai nawku daw jau shagu hta anga nga ai.

Misa Hkungga nawng jau ai ngu ai gaw Misa Hkungga woi ai Jau langai hte sha seng ai n re ai. Hkristan masha ni yawng hte seng ai rai nga ai.

Hkristu gaw Hkristan nawku daw jau htung hte akyu hpyi ai a daju gaw Hkristu rai nga ai. Dai majaw Hkristan ni yawng gaw myit masin mahkra hte shang lawm ra ai lam, Sakramentu chyeju kumla ni hkam la ai shaloi nawku hpung masha ni yawng gaw shang lawm ra ai lam Wa Sarabyin Francis shi a mungga jahtum hta shadum da nga ai.

Translated by Fr. Patrick Hkawng Yae

#vaticannews

#rvakachinservice

https://www.vaticannews.va/en/pope/news/2021-02/pope-francis-catechesis-general-audience-liturgy-prayer.html