Wa Sarabyin: Hkam La Lu Da Ai Sagu Rem Magam A Atsam Hte Ahkaw Ahkang Hpe Dum Chye Let Jai Lang Chye Ga

Wa Sarabyin:  Hkam La Lu Da Ai Sagu Rem Magam A Atsam Hte Ahkaw Ahkang Hpe Dum Chye Let Jai Lang Chye Ga Ngu Nawku Hpung Masha Wuhpung Wuhpawng Ni Hpe N-gun Jaw

Wa Sarabyin Francis gaw September 16 ya shani, Nawku Hpung kata, hpung masha wuhpung wuhpawng ningnan ni hte shanhte a shamu shamawt ai lam ni hte seng nna hkrum shaga ai hta hkam la da lu ai Sagu Rem Magam a atsam hpe dum chye let jai lang chye ga ngu n-gun jaw da nga ai. Ndai hpawng de ai lam hpe “the Dicastery for the Laity, the Family and Life” kaw nna ginlum kahkying woi galaw ai re lam chye lu ai.

“Hkrum zup hpawng hta du lawm ai ni yawng hpe chyeju dum ai lam, shanhte gaw Kabu Gara Shiga hpe yu maya prat hte sakse hkam nga ma ai lam, hpung masha wuhpung ni gaw shinggyim la sha, shinggyim num sha, asak kung sai ni hte ramma ni yawng yawng lawm ma ai rai nna hpaji lam, shinggyim matut mahkai lam, shinggyim bawngring lam hte kaga lam ni hta ap nawng nga ma ai lam, ndai gaw grai nan dam lada ai sasana shara ni hta ap nawng nga ai re lam Wa Sarabyin sang lang n-gun jaw da nga ai.

Chyam bra ana tsin-yam hkrum sha nga ma ai hpe shanhte ni myi chyaw mu lu ma ai, hkam sha lawm nga ma ai, grau nna matsan ai mungdan shara ni hta shanhte ni ap nawng daw jau nga ma ai, ngu Wa Sarabyin chyeju dum masat masa galaw tsun da nga ai.

“The Decree on Inhternational Associations of the Faithful, Kam sham ai wuhpung wuhpawng ni hte seng nna mungkan madang hku lai wa sai June 11 ya shani hkrang masa hpe jahkrat da ai hpe mung Wa Sarabyin bai myit dum shangun da nga ai.

Dai hkrang masa gaw de ai a yaw shada lam madung gaw ndai shaning shi ning ladaw laman galai shai ra ai hpe myit shadum ya ai teng man masa lam ni rai nga ai, ngu mung sang lang da nga ai.

Ndai Hpung masha wuhpung wuhpawng ni hkrum shaga ai lamang a ga baw “theme” gaw “The Responsibility of governance in lay associations. An ecclesial service”, Nawku Hpung masha wuhpung wuhpawng ni hpe yu ren lam woi ai lit magam, Nawku Hpung kawn lam woi ya na,” ngu ai rai nga ai. Dai gaw tinghkrai masha a matu sha n rai, Nawku Hpung ting hte seng ai ahkyak ai lam rai nga ai, ngu Wa Sarabyin Francis sang lang da nga ai.

Nawku Hpung masha wuhpung wuhpawng ni gaw daw jau magam hta shang lawm ap nawng na matu shaga la hkrum ai hta htep lahti hkan sa lu na matu ahkyak ai re lam mung Wa Sarabyin tsun shadum da nga ai.

Ahkyak dik gaw Karai Kasang jaw da ai atsam marai, ahkaw ahkang hpe jai lang chye ra ai, anhte lu da ai ahkaw ahkang hpe jai lang shut ai a marang e hpu nau ni hpe myit daw myit hten shangun ai lam n mai byin shangun ai, ngu mung shadum da ai.

Karai Kasang hpe, Nawku Hpung hpe, n madat n mara ai gaw teng man ai Hkristan ni matu n mai rai ai. Nawku Hpung mying hte ap nawng daw jau nga ai ni yawng gaw Karai Kasang hte Nawku Hpung a sharin shaga lam matsun ai hta htep lahti hkan sa ra ai, ngu mung shadum sharin shaga da nga ai.

Hkam La Lu Da Ai Sagu Rem Magam A Atsam hte ahkaw ahkang Hpe Dum Chye Let Jai Lang Chye Ga Ngu Nawku Hpung Masha Wuhpung Wuhpawng Ni Hpe shadum let Wa Sarabyin Francis mungga hpe jahtum da ai lam Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews #rvakachinservice

Source : Vatican News