Wa Sarabyin: Ginhka, Chye Na, Hkap La Na Lu Hkra, Karai Kasang Hte Tsaw Ra Hku Hkau Da Ra Ai

image from Vatican website

August 31, bat masum ya shani, hpung shawa masha ni hte hkrum shaga ten, Wa Sarabyin Francis, kaja ai hte n kaja ai hpe ginhka chye na lu na matu gaw Karai Kasang hpe tsaw ra hku hkau da ra ai, nga nna tsun sang lang da ai.

Ginhka chye na hkap la ai ngu ai gaw hpa rai ta?

Manu sari nga ai hku sak hkrung nga lu na matu gaw kaja ai, n kaja ai hpe ginhka chye na garan ginhka, kaja ai hpe lata la chye ra ai, nga nna Wa Sarabyin Francis shadum da ai.

Masha shagu gaw lusha hpe lata ai, bu hpun palawng hpe lata ai, hpaji sharin na ga baw lata ai, bungli lata ai, shing n rai, hku hkau kanawn mazum na masha lata chye ai.

Dai zawn lata ai hta kaja grau ai hpe lata lu na matu gaw Karai Kasang hte hku hkau tsaw ra kanawn mazum ai lam nga ra ai.

Madu Yesu hkum nan mung kaja ai hte n kaja ai hpe garan ginhka nna kaja ai hpe lata la chye na matu tsun shadum da ai: lapu hpe n lata ai sha nga hpe lata ai, tinang madu da ai sutgan ni yawng hte ja hkachyi hpe galai la ai lam chyum laika hta Madu Yesu tsun ai ga shadawn nga rawng nga ai. Manu dan sut rai hpe mu ai shaloi dai hpe gara hku madu la lu ra ai hpe chye da ra ai.

Bawnu hte sumru ra ai, masin salum kaw nna hkam sha ra ai, tatut shakut ra ai. Sumru dinglik ai hta hpaji lawm ai, kung kyang ai lam mung lawm ai, myit shang sha ai lam mung lawm ai. Shaloi she kaja ai hpe lata madu la lu na rai nga ai.

Sumru dinglik nna kaja ai hpe lata hkam la lu ai rai yang anhte kabu pyaw lam hpe mung hkam la na ga ai. Dai majaw garan ginhka chye nna kaja ai hpe lata la ai hta myit a hkam sha lam mung lawm ai ngu tsun mai ga ai.

Kaja ai hku lata la chye na gaw grai nan ahkyak ai.

Kaja ai hpe lata madu la lu na matu sumru dinglik ai hta, machye machyang, mahkrum madup, hkam sha lam hte myit masin mung n lawm n mai ahkyak ai lam ni rai nga ai.

Jaw ang ai hku sumru dinglik la lu na matu shakut shaja ra ai.

Anhte ni hta na law malawng gaw kaja ai lam hpe chye na na ga ai raitim, dai hpe n lata ma ai.

Chyum laika a shawng na laika man hta nan Adam yan Eve hpe myit pyaw pyaw let nga pra na lam Karai Kasang matsun da sai hpe mu lu ga ai.

Sak hkrung nga mayu ai rai yang, kabu pyaw ai sak prat hpe madu mayu ai rai yang, anhte gaw hpan da hkrum masha ni rai nga ga ai hpe myit dum ra ga ai. Anhte gaw kaja ai hte n kaja ai a kasi tai akyu hkam sha na ni madung n rai ga ai. Anhte lata la ai a hkam sha lu na kaja ai akyu kaja ai, n kaja ai akyu gaw hpu nau ni hte mungkan ting a matu ang wa na ra ai.

Mungkan ga hpe hkikhkam tsawm htap ai edin sun wang shatai na kun, shing n rai, satan wa a n rai mung shatai na kun.

Nye a matu ndai aten, ndai shara kaw mai kaja ai lam gaw hpa rai ta? Asak hkung nga lu na matu n nga n mai ai dai sumru dinglik garan ginhka chye nna kaja ai hpe lata la chye ai myit anhte hta nga ra ga ai.

Karai Kasang gaw shi hpe anhte tsaw ra na hpe ra sharawng nga ai. Shi hpe hkrit tsang nga na hpe gaw n ra sharawng ai.

"Tsaw ra" hta chyu sha shanglawt lu ai sak hkrung lam nga ai. Sak hkrung nga lu na hpe sharin hkaja la na matu gaw anhte ni tsaw ra chye hkra sharin la ra ga ai. Dai zawn galaw lu na matu gaw sumru dinglik la chye myit ra ahkyak kaba rai nga ai, nga nna Wa Sarabyin Francis sharin shaga da nga ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-08/pope-francis-general-audience-discernment-first-catechesis.html

 

Add new comment

10 + 2 =