Wa Sarabyin gaw Hkristan masha ni arau sha akyu hpyi ai magam hpe galaw shakut na matu n gun jaw dat ai shiga

“Na Mungdan du wa ru ga” ngu ai akyu hpe ga hpe Canterbury na Saradaw kaba Reverend Justin Welby kawn hpaw hpang saw shaga da ai hpe Wa Sarabyin Francis gaw Chyoi Pra ai Wenyi yu hkrat wa ai Pentecost poi shani na shi a mungga hta garan gachyan ya ai. Dai zawn garan gachyan ai hpe Video hkrang sumla hte shapoi da nga ai.

Petecost poi nhtoi hta hta kasa ni a ntsa Chyoi Pra ai Wenyi yu hkrat wa ai hpe myit dum ai Misa hkungga hpe nawng jau ai rai nga ai. Dai shani shanhte lu la ai laklai chyeju kumhpa langai gaw dai ten na myusha ga hpan law law hte chye na lu ai ga hte hkaw tsun lu ai lam rai nga ai. De a majaw, Yesu lamu de lung wa ai poi hte Chyoi Pra ai Wenyi yu hkat wa ai poi nhtoi lapran gaw Hkristan masha ni gaw yawng rau hpawng de lu na matu akyu hpyi ladaw kaba nan re ngu myit la hkam la masat la ma ai da. Saradaw kaba Welby woi awn lata masat da ai “Thy Kingdom Come” “Na Mungdan du wa ru ga” ngu ai akyu hpyi ga hpe dai aten hta tsun ai gaw yawng rau hpawng de wa na matu laksan sumru masat da ai rai le chye lu ai.

“Na Mungdan du wa ru ga!” ngu ai akyu hpyi ga hpe Hkristan masha ni rau hpawng de wa na matu 2016 shaning hta lata san da ai nna jai lang hpang ai akyu hpyi ga re lam chye lu ai. Kaja wa mung dai ten kaw na nan Mungkan Hkristan ni arau sha akyu hpyi ai lam shara shagu hta chyam bra wa let law jat wa sai. Mungkan masha law law wa Madu Yesu hta kam sham wa na matu, 2019 shaning hta mungdan 172 na Hkristan ni “Come Holy Spirit” “Chyoi Wenyi yu hkrat wa rit” ngu ai akyu hte rau sha akyu hpyi lai wa masai. 

Ya kalang mi bai “Thy Kingdom Come” “Na mungdan du wa ru ga” ngu ai akyu hpyi ga hte shamu shamawt lam galaw na matu Wa Sarabyin kawn Video sumla hkrung hte garan gachyan da sai re. 

Chyoi Pra ai Wenyi yu hkrat wa ai Pentecost shani Madu Karai Kasang mungkan ga hpe asak jaw bang ya ai. Ya dai ni chyam bra ana coronavirus gaw mungkan ga hpe si hkrung si htan kaba byin shangun nga ai. Pentecost shani ga n bung ai myu sha langai hte langai rau hpawng de hkrum shaga wa ma ai. Daini gaw, anhte ni langai hte langai tsan gang na nga rai nga ai. Dai zawn tsan gang nga rai ai raitim, Chyoi Pra ai Wenyi gaw anhte ni Karai Kasang a ni htep ai hpe hkam sha lu nna, shi a shalan shabran ya ai ai a marang e yak hkak jam jau hkrum ten n gun ban ya nga ai.  

Myit mada shara mat taw ai mungkan masha ni a matu matsan dum lama lam hpe ta tut galaw sakse hkam let mungkan shinggyim kun dinghku nta masha yawng rau hpawng de lu mu ga Hkristan masha ni myit sharawng nga ra ga ai hpe mung tsun shapraw da nga ai. Sak hkrung lam hta sari sadang rawng magam bungli galaw lu na matu makawp maga ya na lit nga ai ni hpe nyan hpaji hte kaja lam matsun madun ai Chyoi Pra ai Wenyi a chyeju gawut bang ya u ga ngu nna mung akyu hpyi ya ai.

“Matsan mayan ni a hkrap ngu hkrap ngoi nsen hte anhte hpe ndai mungkan nta kata hta nan dinghkrai garen gari hkam sha shangun nga ai,” ngu Wa Sarabyin tsun da ai. Pentecost shani hta chyoi Pra ai Wenyi a tsam hte San Petru hkaw tsun ngut ai hpang masha law law myit malai lu wa ma ai zawn anhte ni mung Karai Kasang hte htingbu ni kaw du pru let rau sha hpawng de nga na lu na matu mung matut akyu hpyi ai. Chyam bra ana tsin-yam hkrum hkra machyi nga ai majaw dai ana zingli hpe arau jawm gasat ai hta sha n ga, kaw si ai ni a matu, majan tsin-yam a matu, roi rip hkrum ai ni a matu, hte garan ginghka hkrum ai ni a matu mung anhte ni arau sha myit mang hkrum hpawng de nga ra ga ai lam ni hpe shadum let Wa Sarabyin akyu hpyi mung hpyi ya nga ai hpe Vatican kawn ndau shana da nga ai.

https://www.vaticannews.va/en/pope/news/2020-05/pope-thy-kingdom-come-pentecost-archbishop-canterbury-welby.html

#pope #message

#rvakachinservice