Wa Sarabyin Gaw Anhte A Htingnu Ngu Na Nta Hpe Karai Kasang Hte Rau Gaw Gap Na Matu N’gun Jaw Nga Ai

Wa Sarabyin Francis kawn anhte hpe ndai lusha gam ai ladaw (Lent journey) hta anhte a htingnu ngu nta hpe Karai Kasang hte rau gaw gap na matu bai anhte ni a kahpu kanau makyin jinghku ni hte rau hku hku hkau hkau, shada da kam ai myit hte rau kanawn mazum nga na matu hte akyu hpyi ai lam hpe grau nna n gun dat let hkawm sa nga na matu tsun shadum da nga ai. San Peter shawa pa kaba hta galaw ai lai wa sai laban shani na Missa hkungga hta Madu Yesu kawn Nawku jawng hta hpaga ga ai hte gat dut sha nga ai ni hpe gau kau ai lam hta e “nye wa a nta hpe gat dut ai shara hkum shatai ya mu” ngu nna dai shani na hti ang ai kabu gara shiga hte tsun shadum lai wa ai.

Wa Sarabyin kawn kaning re ai anhte a myit masa hte Karai Kasang hpang de sit Shang nga ai kun? Nawku jawng hpe gat zawn shing nrai  tinang a nta zawn da ai myit masa hte Karai Kasang hpang de sit shang wa ai lam gaw gara hku shai hkat nga ai hpe anhte san jep ra ai lam tsun lai wa ai. Nawku htingnu hpe gat dut sha ai myit masa hte anhte ni sit shang ai rai yang gaw sagu langai hpe mari la nna nawng jau ai tawn hkungri ntsa hta Karai Kasang hte rau jawm hkam la lu na re ai hpe tsun ai lam rai nga ai. Dai gaw anhte ni kawn mari la ai hte sha kau ai lam sha re ai hpe tsun san lang dan nga ai. Anthe ni Nawku jawng hpe nta zawn myit ai rai yang gaw mi na hte nhtang hku bai rai nga ai, anhte dai shara de sa ai gaw Karai Kasang rau ga shaga mayu nna bai anhte ni shada da kahpu kanau hku hkau ai zawn shi hte rau pyaw tim yak tim shada da garan gachyan na matu rai nga ai.

Bai gat dut sha ai myit masa rawng ai ni gaw marai langai a ra sharawng ai hpe tam ra ai, manu jahpu hpe jahkrum ra ai hte galaw gade ngu ai gumhpraw hti ai hpe galaw ra ai, maga mi de anhte yu ga yang nta hku myit rawng ai ni gaw manu jahpu daw dan ai lam n nga ai sha shada da tsawra myit hte jaw ya hkat ai lam ni sha galaw ai lam hpe tsun shingdaw dan lai wa ai.

Lai wa sai laban shani na kabu gara shiga hta Madu Yesu a gwi gwi galaw ai (zealous action) hpe mu lu ai. “house-temple” hpe “market-temple” galaw ai lam hpe Karai Kasang n hkap la ai lam tsun sanglang dan lai wa ai. Matut nna Wa Sarabyin gaw “market approach” sut masa myit myit ai gaw anhte hpe Karai Kasang hte matut mahkai ai lam hpe tsan shangun nga ai, nta hku na myit la ai ni gaw Karai Kasang hte rau shada da kam nna chye na hkat ai simsa shim lum ai nta (loving family) byin shangun ai hpe tsun lai wa ai. Karai Kasang gaw shi hte rau anhte gaw kahpu kanau ni a lapran na kanawn mazum lam zawn du sa wa ai hpe chye na ai lam tsun lai wa ai. Madu Yesu gaw anhte hpe hku hku hkau hkau rai nga nna, matsan chye dum ai hte shada da kanawn mazum nga na matu du sa wa ai lam rai nga ai

 Wa Sarabyin kawn anhte hpe ndai lusha gam ladaw hkrun lam ngu na gaw anhte a hkum hte anhte a makau grupyin hkan nga ai ni hte rau nta masha zawn re ai myit rawng hkra gawgap ra ai aten mung rai nga ai, dai hta no langai hku nna Karai Kasang hpang de akyu hpyi sit shang ai  hpa n chye ai ma langai kawn Kawa a nta chyinghka (door) hpe n hkring nsa sa akawk ai zawn akyu hpyi ra ai lam tsun lai wa ai. Bai nna anhte shada da kahpu kanau zawn hku hku hkau hkau nga chye ai myit hpe gawgap ra ai, dai gaw kaja wa anhte ni hta ra nga ai lam re nga nna tsun lai wa ai.

Anhte a shani shagu na sak hkrung lam hta tinang hpe masha ni ginhka hkrum ai zawn shing n rai mara tam mayu ai ni grai law la nga ai, dai zawn re lam hpe mung anhte ni myit sawn la chye la ra ai. Anhte ni gaw masha ni hte rau kanawn mazum ai lam hpe galoi mung san jep nga ra ai, shawng ninggam hku nna anhte hte masha ni a lapran hta e nga ai “silence" atsin sha nga chye ai lam hpe shawng jahten kau la kau ra ai shing nrai “emptiness”ngu ai lachyum npru ai lam ni hpe shamat la kau ra ai lam Wa Sarabyin kawn hpaji jaw tsun shadum lai wa ai. Anhte ni gaw Karai Kasang hpe aten yu nna lit langai hku sha aten jaw ai shingnrai Karai Kasang hta kam hpa ai lam hpe kabai nyet kau ai “a time of trusting abandonment in the lord” mi rai tim anhte a akyu hpyi ai lam hpe lit langai hku na galaw nga ai kun ngu ai hpe mung yu ra nga ai lam hpe tsun shadum lai wa ai.